කටුනායක ටී.කේ.ජී.කපිල 

මීගමුව මාරිස්ටෙලා විද්‍යාලයේ ආදී ශිෂ්‍ය සංගමය විසින් වාර්ෂිකව සංවිධානය කරනු ලබන ප්‍රධාන උත්සවය වන “මාරිස් පැනොරාමා - 2025”‍, යටතේ වැදගත් කාලීන ගැටලු‍ සාකච්ඡා කෙරෙන අතර,  මෙවර ”‍ශ්‍රී ලංකාව සම්ප්‍රදායික ආර්ථිකයේ සිට ඩිජිටල් ආර්ථික මාවත වෙත යොමු කිරීම”‍ යන (Transforming Sri Lanka Paving tha Path from Traditional to Digital Economy) තේමාව යටතේ විශේෂ දේශනයක් සහ විද්වත් මණ්ඩල සාකච්ඡාවක්, මීගමුව ග්‍රෑන්ඞ්ඩීසා හෝටලයේ ප්‍රධාන ශාලාවේ දී පසුගියදා පැවැත්වුණි.
මෙම උත්සවයේ ප්‍රධාන විශේෂ දේශනය ඩිජිටල් ආර්ථිකය පිළිබඳ ජනාධිපති උපදේශක ආචාර්ය හාන්ස් විජයසූරිය මහතා විසින් පවත්වන ලදී.
ඉන්පසුව පැවති විද්වත් මණ්ඩල සාකච්ඡාවට ඩිජිටල් ආර්ථික අමාත්‍යාංශයේ ලේකම් වරුණ ශ්‍රී ධනපාල, ජ්‍යෙෂ්ඨ ප්‍රතිපත්ති විශ්ලේෂක මහාචාර්ය රොහාන් සමරජීව, හැටන් නැෂනල් බැංකුවේ උප සභාපති සංජය විජේමාන්න, ඔමේගා ලයින් හි කළමනාකාර අධ්‍යක්ෂ ෆීලික්ස් ප්‍රනාන්දු, නිදහස් වෙළෙඳ කලාප නිෂ්පාදකයන්ගේ සංගමයේ සභාපති ධම්මික ප්‍රනාන්දු යන මහත්වරුන් සහභාගී වූ අතර මෙම සාකච්ඡාව මෙහෙයවීම ඩේලි එෆ්.ටී. (Dally FT) ප්‍රධාන කර්තෘ නිස්තාර් කාසිම් මහතා විසින් සිදු කරනලදී.
මෙම සාකච්ඡාව ඩිජිටල් ආර්ථිකය සහ එහි ප්‍රධාන කොටස්, ඩිජිටල්කරණයේ අභියෝග සහ ඒවා ජය ගන්නේ කෙසේද, ඩිජිටල් ආර්ථිකයක් ජනතාවට සහ රටට උපකාර වන්නේ කෙසේද සහ ඩිජිටල් ආර්ථික පනත යන තේමා ඔස්සේ සිදු කෙරුණි.
මීගමුව මාරිස්ටෙලා විද්‍යාලයීය ආදී ශිෂ්‍ය සංගමය 1928 වසරේ දී ස්ථාපිත කර ඇති අතර, එහි සාමාජිකයෝ ලොව පුරා රටවල් රාශියක සිට ගෝලීය වශයෙන් සම්බන්ධ වී සිටිති.