කලින් සිලෝන් ලෙස හැඳින්වූ ශ්‍රී ලංකාවේ ප්‍රමුඛ දේශපාලන නායකයකුගේ පළමු ප්‍රධාන ඝාතනය සිදුවූයේ 1959 සැප්තැම්බර් මාසයේදී ය. එවකට අගමැතිව සිටි එස්. ඩබ්ලිව්. ආර්. ඩී. බණ්ඩාරනායක මහතා බෞද්ධ භික්ෂුවක වූ තල්දූවේ සෝමාරාම හිමියන් විසින් වෙඩි තබා ඝාතනය කෙරුණු විට රටම කම්පනයට පත් විය.

පසුකාලීනව ජනවාර්ගික බෙදීම් නිසා දෙපැත්තේම දේශපාලන නායකයෝ තවත් බොහෝ දෙනෙක් ඝාතනය වූහ. දෙමළ ඊළාම් විමුක්ති කොටි (එල්ටීටීඊ), ජනතා විමුක්ති පෙරමුණේ දේශපාලන ප්‍රචණ්ඩත්වය සහ රාජ්‍යයේ සහ ඊට සම්බන්ධ කොටස්වල ප්‍රතිප්‍රචණ්ඩත්වය ඇතුළු විවිධ දෙමළ සටන්කාමී කණ්ඩායම් විසින් මුදා හරින ලද දේශපාලන ප්‍රචණ්ඩත්වය හේතුවෙන් වසර ගණනාවක් පුරා දේශපාලන නායකයෝ විශාල සංඛ්‍යාවක් ඝාතනයට ලක් වූහ.

ශ්‍රී ලංකාවේ දේශපාලන ඝාතන ඉතිහාසයේ වැදගත් පරිච්ඡේදයක් වන්නේ සුප්‍රසිද්ධ දෙමළ දේශපාලන නායකයකු වූ අප්පාපිල්ලෙයි අමිර්තලිංගම් 1989 ජූලි 13 වැනිදා ඝාතනයට ලක්වීමයි. යාපනයේ පන්නහම් හි උපන් අප්පාපිල්ලෙයි අමිර්තලිංගම්, 1927 අගෝස්තු 26 වැනිදා උපත ලැබීය. ඔහු ඊළාමයේ ගාන්ධි ලෙස හැඳින්වෙන ගෞරවනීය දෙමළ නායක එස්. ජේ. වී. චෙල්වනායගම්ගේ ප්‍රධාන සහායකයා ලෙස වසර ගණනාවක් සේවය කළ ආකර්ෂණීය හා ක්‍රියාශීලී දේශපාලනඥයෙකි.

වෘත්තියෙන් නීතිඥයකු වූ අමිර්තලිංගම්, 1956 සිට 1970 දක්වා වඩුකොඩ්ඩෙයි ආසනයේ ඉලංකෙයි තමිල් අරසු කච්චි මන්ත්‍රීවරයා ලෙසත්, 1977 සිට 1983 දක්වා කන්කසන්තුරේ කොට්ඨාසයේ දෙමළ එක්සත් විමුක්ති පෙරමුණ නියෝජනය කළ මන්ත්‍රීවරයා ලෙසත් කටයුතු කළේය. 1977 සිට 1983 දක්වා ඔහු විපක්ෂ නායක ධුරය හෙබවීය. 1989 දී, ඔහු දෙමළ එක්සත් විමුක්ති පෙරමුණේ ජාතික ලැයිස්තුවෙන් මන්ත්‍රීවරයකු ලෙස පත් විය.

ඉන්දීය හමුදාව

1987 ජූලි 29 වැනිද‌ා ඉන්දීය අගමැති රජීව් ගාන්ධි සහ ශ්‍රී ලංකා ජනාධිපති ජේ. ආර්. ජයවර්ධන අතර ඇති කරගත් ඉන්දු-ලංකා ගිවිසුමේ ප්‍රතිඵලයක් ලෙස ඉන්දීය සාම සාධක හමුදාව ශ්‍රී ලංකාවේ උතුරු හා නැගෙනහිර ප්‍රදේශවල ස්ථානගත කරනු ලැබුණි. වැඩි කල් නොගොස් එල්ටීටීඊය සහ ඉන්දීය හමුදාව අතර යුද්ධයක් ඇති විය. මේ අතර ශ්‍රී ලංකාවේ ඉන්දීය හමුදාව සිටීම ගැන බොහෝ සිංහල ජනතාවද සිය අප්‍රසාදයට පළ කළහ. ඉන්දීය හමුදා පැමිණීමට විරෝධය පළ කරමින් ජනතා විමුක්ති පෙරමුණ ප්‍රචණ්ඩකාරී ව්‍යාපාරයක් ආරම්භ කළේය.

ජයවර්ධනගෙන් පසු 1988 දී ජනාධිපති ධුරයට පත් වූ රණසිංහ ප්‍රේමදාස, ඊට පෙර අගමැති ධුරය හෙබවීය. තමා තේරී පත්වුවහොත් ඉන්දීය හමුදාව ඉවත් කර ගැනීම සහතික කරන බව ප්‍රේමදාසගේ ප්‍රධාන මැතිවරණ පොරොන්දුවක් විය. ජනාධිපති ධුරය ජයග්‍රහණය කිරීමෙන් පසු, ප්‍රේමදාස සාම්ප්‍රදායික නොවන පියවරක් තබමින් එල්ටීටීඊය සමග සාකච්ඡා ආරම්භ කළේය. ජනාධිපති ප්‍රේමදාස සහ එල්ටීටීඊ නායක වේලුපිල්ලේ ප්‍රභාකරන් අතර අභිලාෂයන්ගේ අභිසාරීතාවක් ඇති විය, මන්ද දෙදෙනාටම විවිධ හේතු මත ඉන්දීය හමුදාව ඉවත් කර ගැනීමට අවශ්‍ය වූ බැවිනි.

කෙසේ වෙතත්, දෙමළ එක්සත් විමුක්ති පෙරමුණේ නායක අමිර්තලිංගම් වැනි බොහෝ දෙමළ ජනයාට අවශ්‍ය වූයේ ඉන්දු-ලංකා ගිවිසුමේ විධිවිධාන ක්‍රියාත්මක වන තුරු ඉන්දීය හමුදාව ශ්‍රී ලංකාවේ රැඳී සිටීමයි. පළාත් සභා පිහිටුවීමට හැකි වූයේ එම ගිවිසුම නිසාය. ප්‍රේමදාස රජයට සහ එල්ටීටීඊයට ඉන්දීය හමුදාව පිටත් කර හැරීමට අවශ්‍ය වූ අතර, අමිර්තලිංගම් එයට විරුද්ධ විය. 1989 ජුනි මාසයේදී අමිර්තලිංගම් පාර්ලිමේන්තුවේදී චතුර ලෙස තර්ක කරමින් පැවැසුවේ, මෙම අවස්ථාවේදී ඉන්දීය හමුදාව ශ්‍රී ලංකාවෙන් පිටත් කර නොදැමිය යුතු බවයි. ඔහුගේ දේශපාලන සුදුසුකම් සහ පෞරුෂය නිසා ජාත්‍යන්තරව වැඩි බලපෑමක් ඇති කළේ අහිංසාවාදී දේශපාලන නායක අමිර්තලිංගම්ගේ මතයයි.

ද්‍රෝහියකු ලෙස නම් කිරීම

අමිර්තලිංගම් දෙමළ තරුණයන් අතර වීරයකු වූ කාලයක් තිබුණි. 1976 දී දෙමළ ඊළම නමින් වෙනම රාජ්‍යයක් සඳහා වූ ඉල්ලීම ප්‍රකාශ කිරීමේදී ඔහු ප්‍රමුඛ භූමිකාවක් ඉටු කළේය. කෙසේ වෙතත්, අමිර්තලිංගම් පසුව දෙමළ ඊළම් ඉල්ලීම අවතක්සේරු කර එක්සත් නමුත් අනිවාර්යයෙන්ම ඒකීය නොවන ශ්‍රී ලංකාවක බලය බෙදාගැනීමේ විධිවිධානයක් තෝරා ගත්තේය. මෙය එල්ටීටීඊ සහ සෙසු අනුගාමිකයන් කෝපයට පත් කළ අතර, ඔවුන් අමිර්ව හැඳින්වූයේ ද්‍රෝහියකු ලෙසය. අමිර්තලිංගම් ඉන්දීය හමුදාව කෙරෙහි දැක්වූ ස්ථාවරය හේතුවෙන් ඔහු කෙරෙහි එල්ටීටීඊ සතුරුකම තවත් වැඩි විය.

වසර 36 කට පෙර අප්පාපිල්ලෙයි අමිර්තලිංගම් ඝාතනය සිදු වූයේ මෙම පසුබිම තුළය. එය සිදු වන විට මා සිටියේ කැනඩාවේ ය. කෙසේ වෙතත්, මියගිය එම්. සිවසිතම්පරම්, ආචාර්ය නීලන් තිරුචෙල්වම්, සරෝජින් යෝගේෂ්වරන්, මංගයාර්කරසි අමිර්තලිංගම්, ආචාර්ය බහීරතන් අමිර්තලිංගම්, වී. ආනන්දසංගරී, පී. සූසයිතාසන් සහ සෝමසුන්දරම් (මාවයි) සේනාධිරාජා වැනි දෙමළ එක්සත් විමුක්ති පෙරමුණ සමග සම්බන්ධ විවිධ පුද්ගලයන් සමග මම විවිධ කාලවලදී කතා කර ඇත්තෙමි. මෙම සංවාද, සම්මුඛ සාකච්ඡා සහ අදාළ මාධ්‍ය වාර්තා මත පදනම්ව මම අමිර්තලිංගම් ඝාතනය පිළිබඳව කලින් විස්තරාත්මකව ලියා ඇත්තෙමි. ජූලි 13 වැනිද‌ාට යෙදී ඇති අමිර්තලිංගම්ගේ 36 වැනි මරණ සංවත්සරයේදී පවා, මම මෙම ඝාතනය නැවත සලකා බලමි.

අංක 342/2, බුලර්ස් පාර

අමිර්තලිංගම් සහ ඔහුගේ බිරිඳ මංගයාර්ක්කරසි නැවැතී සිටියේ කොළඹ 7, බෞද්ධාලෝක මාවත/බුලර්ස් පාරේ, අංක 342/2 දරන ස්ථානයේය. එය මන්නාරමේ පදිංචි ඇඟලුම් නිෂ්පාදනයේ නියැළී සිටි ප්‍රමුඛ මුස්ලිම් ව්‍යාපාරිකයකුට අයත් විය. අමිර්තලිංගම්වරුන්ට අමතරව, දෙමළ එක්සත් විමුක්ති පෙරමුණේ හිටපු සභාපති එම්. සිවසිතම්පරම්, යාපනයේ හිටපු පාර්ලිමේන්තු මන්ත්‍රී වී. යෝගේෂ්වරන් සහ ඔහුගේ බිරිඳ සරෝජිනී සහ දෙමළ එක්සත් විමුක්ති පෙරමුණේ තරුණ අංශයේ ප්‍රධානී මාවෙයි සේනාධිරාජා ද එහි රැඳී සිටියහ. හිටපු කැබිනට් අමාත්‍ය ගාමිණී දිසානායක අමාත්‍යවරයකුව සිටියදී දෙමළ එක්සත් විමුක්ති පෙරමුණේ නායකයන්ගේ ආරක්ෂාව සහතික කිරීමට මූලිකත්වය ගත්තේය. මහවැලි අමාත්‍යාංශයට අනුයුක්තව සිටි සමහර පොලිස් නිලධාරීන් දෙමළ එක්සත් විමුක්ති පෙරමුණේ නායකයන්ගේ ආරක්ෂාව සඳහා “අනුයුක්ත” කර තිබුණි.

මේ අතර එල්ටීටීඊය විසින් යාපනයේ හිටපු පාර්ලිමේන්තු මන්ත්‍රී යෝගේෂ්වරන් සමග සන්නිවේදනය ආරම්භ කළේය. යෝගේෂ්වරන්ට අවශ්‍ය වූයේ සමස්ත දෙමළ සමගිය සාකච්ඡා කිරීම සඳහා අමිර්තලිංගම් සමග රැස්වීමක් සංවිධානය කිරීමටය. යෝගේෂ්වරන් අමිර්තලිංගම් සහ සිවසිතම්පරම් සමග කතා කර කොටි සමග රැස්වීමක් සඳහා ඔවුන්ගේ කැමැත්ත ලබා ගත්තේය. යෝගේෂ්වරන් සමග සම්බන්ධකම් පැවැත්වූ කොටි සාමාජිකයන් දෙදෙනා ඇලෝසියස් නොහොත් විග්නා සහ සිවකුමාර් නොහොත් අරිවු ය. අමිර්තලිංගම්ගේ බුලර්ස් පාරේ නිවසේම රැස්වීමක් පැවැත්විය හැකි බව යෝගේෂ්වරන් ඔවුන්ට දැනුම් දුන්නේය.

ඇලෝසියස්

1989 ජූලි 13 වැනිද‌ා බ්‍රහස්පතින්දා පෙරවරු 10 ට පමණ යෝගේෂ්වරන්ට දුරකතන ඇමතුමක් ලබා දුන් ඇලෝසියස්, එල්ටීටීඊය එම යෝජනාවට එකඟ බව පැවසීය. රැස්වීම එදිනම සවස 6 ට පැවැත්වීමට නියමිතව තිබුණි. යෝගේෂ්වරන් මේ බව අමිර්තලිංගම් සහ සිවසිතම්පරම් වෙත දැනුම් දුන්නේය. එවකට කොළඹ ඉන්දීය මහ කොමසාරිස් ලේඛාන් ලාල් මෙහ්රෝත්‍රා විසින් ටාජ් සමුද්‍රා හිදී පවත්වන ලද රාත්‍රී භෝජන සංග්‍රහයකට දෙදෙනාටම සහභාගී වීමට සිදුවීම නිසා ගැටලුවක් ඇති විය. සවස 6 ට නැවතී කොටින් හමුවී ඉන්දීය නියෝජිතයාගේ රාත්‍රී භෝජන සංග්‍රහයට කලින් පිටත් වන ලෙස යෝගේෂ්වරන් ද්‍රවිඩ එක්සත් විමුක්ති පෙරමුණේ නායකයන් දෙදෙනාගෙන්ම ඉල්ලා සිටියේය. ඔවුහු එසේ කිරීමට එකඟ වූහ.

ඇලෝසියස්ගෙන් යෝගේෂ්වරන්ට දෙවැනි දුරකතන ඇමතුමක් ලැබුණේ සවස 4 ට පමණය. එල්ටීටීඊ දේශපාලන අංශ ප්‍රධානී නරේන්ද්‍රන් හෙවත් යෝගි රැස්වීමට සහභාගී වීමට ඉඩ ඇති බව ඇලෝසියස් පැවසීය. කලින් සැලසුම් කළ පරිදි සවස 6 ට නොව සවස 6:30 ත් 7 ත් අතර එල්ටීටීඊය එහි පැමිණෙන බව ඇලෝසියස් පැවසීය.

යෝගේෂ්වරන්

එසේම ඔහු තවත් ඉල්ලීමක් කළේය. එල්ටීටීඊ කණ්ඩායම පැමිණෙන විට ඔවුන් පරීක්ෂා නොකරන ලෙස ආරක්ෂක නිලධාරීන්ට පවසන ලෙස යෝගේෂ්වරන්ගෙන් ඉල්ලා සිටියේය. ඊට හේතුව ලෙස ඔහු පැහැසුවේ යෝගී වැනි ඉහළ මට්ටමේ නායකයකුට එවැනි ක්‍රියාවලින් අපහාසයට ලක් වනු ඇතැයි හැඟෙන නිසාය. සාකච්ඡාවලට යෝගී සහභාගීවීමේ අපේක්ෂාව ගැන යෝගේෂ්වරන් උද්යෝගිමත් විය. සවස් වරුවේ පැමිණීමට නියමිත එල්ටීටීඊ කණ්ඩායම පරීක්ෂා නොකරන ලෙස ඔහු වහාම ආරක්ෂක ප්‍රධානී උපපොලිස් පරීක්ෂක තම්බිරාජා කන්දසාමිට උපදෙස් දුන්නේ ඉන් ඔවුන්ට නින්දාවක් දැනෙන බැවිනි. කන්දසාමි එය ප්‍රතික්ෂේප කළේ “මේ අයව විශ්වාස කරන්න බෑ සර්“ යනුවෙන් පවසමිනි. කිසිවක් සිදු නොවන බවට යෝගේෂ්වරන් ඔහුට සහතික විය.

එල්ටීටීඊ යේ ජ්‍යෙෂ්ඨ නායකයකු පැමිණෙතැයි අපේක්ෂා කරන බවත්, ඔහුට අපහාසයක් සිදු නොවිය යුතු බවත් යෝගේස්වරන් පැවසීය. “ඔවුන් අපේ අමුත්තෝ. ඒ නිසා අපි ඔවුන්ට ගෞරවයෙන් සැලකිය යුතුයි. ඔවුන්ට අපහාසයක් දැනේ නම් ඔවුන් ආපහු එන එකක් නැහැ. එහෙම වුණොත් අපේ සාකච්ඡා බිඳ වැටෙනවා” යෝගේස් අවධාරණය කළේය. කන්දසාමි තරමක් අකමැත්තෙන් එකඟ වූ අතර, ඒ අනුව ඔහු යටත් නිලධාරීන්ට සිය උපදෙස් ලබා දුන්නේය.

යෝගේෂ්වරන්, ඔහුගේ බිරිඳ සරෝජිනී සහ සිවසිතම්පරම් නිවසේ ඉහළ මහලේ නවාතැන් ගෙන සිටි අතර, අමිර්තලිංගම් සහ “මාවෙයි” ලෙස හඳුන්වන සෝමසුන්තරම් සේනාධිරාජා බිම් මහලේ නවාතැන් ගෙන සිටියහ.

විසු, විග්නා සහ අරිවු

එල්ටීටීඊ සාමාජිකයන් තිදෙනා කහ පැහැති කැබ් රථයකින් පැමිණෙන විට සවස 6.40 විය. අපේක්ෂා කළ පරිදි යෝගී එහි සිටියේ නැත. කොටි තිදෙනා වූයේ රාසයියා අරවින්දරාජා හෙවත් විසු, පීටර් ලියොන් ඇලෝසියස් හෙවත් විග්නා සහ සිවකුමාර් හෙවත් අරිවු ය. දොරටුවේ මුර කරමින් සිටි පොලිස් නිලධාරි සත්‍යමූර්ති, ඔවුන් තිදෙනාට පරීක්ෂා නොකර ඇතුළු වීමට ඉඩ දුන්නේය.

සත්‍යමූර්ති මේ පිළිබඳව කන්දසාමිට දැනුම් දුන් අතර, ඔහු පැවසුවේ යෝගේෂ්වරන් හමුවීමට පැමිණි පිරිස ඉහළට යවන ලෙසයි. විසු සහ ඇලෝසියස් ඉහළට ගිය අතර, අරිවු පඩිපෙළ පාමුල සිටගෙන සිටියේය. යෝගේෂ්වරන් තම බිරිඳ සමග ඉහළ මාලයේ රූපවාහිනිය නරඹමින් සිටියේය. කොටි පැමිණි බව දැනගත් පසු, ඔහු පඩිපෙළ බැස විසු සහ ඇලෝසියස් අතරමගදී හමු විය. යෝගි නොපැමිණීම ගැන යෝගේෂ්වරන් කලකිරීමට පත් වූ නමුත්, විසුව උණුසුම් ලෙස පිළිගත්තේය.

ඔවුහු වාඩි වී කතාබස් කළහ. සරෝජිනී කෑම පිළියෙල කිරීමට ගියාය. යෝගේෂ්වරන් සේවක පිරිමි ළමයා වන රාජු හරහා අමිර්තලිංගම් වෙත පණිවුඩයක් යැවීය. අමිර්තලිංගම් සිය බිරිඳ, සිවසිතම්පරම් සහ සේනාධිරාජා සමග පහළ මාලයේ තවත් කාමරයක රූපවාහිනිය නරඹමින් සිටියේය. ඉන්දීය නියෝජිතයාගේ රාත්‍රී භෝජන සංග්‍රහයට සහභාගී වීමට සැරසී අමිර් සහ සිවා යන දෙදෙනාම ඉහළ මාලයට ගිය අතර, මංගයර්ක්කරසි සහ සේනාධිරාජා රූපවාහිනිය නැරඹීම දිගටම කරගෙන ගියහ.

අමීර් සහ ශිවා ඇතුළු වූ විට, විසු සහ ඇලෝසියස් යන කොටි සාමාජිකයෝ දෙදෙනා නැගී සිටියහ. අමිර්තලිංගම් එක් අයකුගේ උරහිසට තට්ටු කර ඔවුන් අතර වූ වේවැල් පුටුවක වාඩි විය. සිවසිතම්පරම් තව ටිකක් ඉදිරියට ගොස් වාඩි විය. යෝගේෂ්වරන් නැඟිට තම බිරිඳට සංග්‍රහ කිරීමට උදව් කිරීමට ගියේය. සරෝජිනී තක්කාලි සැන්ඩ්විච් සහ බිස්කට් රැගෙන ආවාය. ඇය ඔවුන්ට බොන්න අවශ්‍ය කුමක්දැයි ඇසුවාය. ශිවා සහ යෝගේස් කිසිවක් බොන්න කැමති වූයේ නැත. සරෝජිනී පැෂන් ෆෘට් බීම දෙකක් සහ තේ කෝප්පයක් පිළියෙල කළාය. ඉන්පසු ඇය ඇගේ කාමරයට ගියාය.

සුහද සංවාදය

යෝගේෂ්වරන් විසින් හඳුන්වාදීමෙන් පසු, දෙමළ එක්සත් විමුක්ති පෙරමුණේ නායකයන් හමුවීම ගැන ඉතා සතුටු වන බව කොටි සංවිධානය පැවසීය. අමිර්තලිංගම් සහ සිවසිතම්පරම් ද ඒ හා සමාන හැඟීම්වලින් ප්‍රතිචාර දැක්වූහ. දෙමළ එක්සත් විමුක්ති පෙරමුණේ නායකයන් දෙදෙනා පැවසුවේ දෙමළ සටන්කාමීන්ගේ කැපවීම සහ කැපකිරීම් ඔවුන් අගය කරන බවත් ඔවුන්ට ගරු කරන බවත්ය. දැන් සියලුම දෙමළ කණ්ඩායම් එකට එකතු වී එකමුතුකම ගොඩනඟා පොදු ප්‍රවේශයක් වර්ධනය කිරීම අවශ්‍ය වී තිබේ. එසේ නොවුවහොත් ඉන්දු-ලංකා ගිවිසුම හරහා ලබාගත් ජයග්‍රහණ අහිමි වනු ඇත. ඕනෑම දේශපාලන සැකැස්මක් එල්ටීටීඊයට ආඩම්බර ස්ථානයක් ලබා දෙන බවට අමිර්තලිංගම් කොටි සංවිධානයට සහතික විය.

මෙම අදහස් කොටි නායකත්වයට දැනුම් දෙන බව විසු පැවසීය. එල්ටීටීඊ ධූරාවලිය ඔවුන් හමුවී මෙම කරුණු සාකච්ඡා කිරීමට උනන්දු වන බව ඔහු පැවසීය. ජ්‍යෙෂ්ඨ එල්ටීටීඊ නායකයන් කොළඹදී දෙමළ එක්සත් විමුක්ති පෙරමුණ සමඟ හමුවී තවදුරටත් සාකච්ඡා කිරීමට සූදානම් බව විසු පැවසීය. සංවාදය තරමක් සුහදශීලී විය. බොහෝ කතා කළේ අමීර්-සිවා යුගළය සහ විසු විසින් වන අතර, යෝගේෂ්වරන් සහ ඇලෝසියස් සාමාන්‍යයෙන් නිහඬව සිටියහ.

එල්ටීටීඊය සන්නද්ධ අරගලය අතහැර ප්‍රජාතන්ත්‍රවාදී මාවතට හැරවීමට කාලය පැමිණ ඇති බව අමිර්තලිංගම් එක් අවස්ථාවකදී මෘදු ලෙස ප්‍රකාශ කළේය. සිවසිතම්පරම් “ඔබලා වැනි තරුණයන්ට ප්‍රජාතන්ත්‍රවාදය පැරැණි විලාසිතාවක් ලෙස පෙනෙන්නට පුළුවන්, එහෙත් කරුණාකර අපි වැනි මහලු අය ඔබට පවසන දේට ඉවසිලිවන්තව සවන් දෙන්න” යැයි පැවසීය.

ඉහළ මාලයේ සංවාදය දිගටම සුහදව පැවතුණද, පහළ මාලයේ යම් උද්‍යෝගයක් ඇති විය. පහළ මාලයේ බලා සිටි සිවකුමාර් නොහොත් අරිවු සවස 7 න් පසු කලබල වීමට පටන් ගත්තේය. ඔහු තම ඔරලෝසුව දෙස බලමින් නොසන්සුන්ව ඉහළට සහ පහළට ගමන් කළේය. බොහෝ විට කනස්සල්ලෙන් ඉහළට බලා සිටියේය.

නිශ්ශංක තිබ්බොටුමුණුව

සිවකුමාර්ගේ හැසිරීම පිළිබඳව රාජකාරියේ යෙදී සිටි පොලිස් නිලධාරියකු සැක පහළ කළේය. ඔහුගේ නම නිශ්ශංක තිබ්බොටුමුණුව ය. පොලිස් නිලධාරියාගේ උපන් ස්ථානය කෑගල්ල දිස්ත්‍රික්කයේ හෙට්ටිමුල්ලෙහි අකිරියාගල ය. ඔහුව මහවැලි අමාත්‍යාංශයෙන් අමිර්තලිංගම්ගේ ආරක්ෂාව සඳහා අනුයුක්ත කර තිබුණි.

නිශ්ශංක තිබ්බොටුමුණුව සහ සත්‍යමූර්ති විසින් බලහත්කාරයෙන් සිවකුමාර් පරීක්ෂා කළ අතර, ඔහු සන්තකයේ තිබී අත්බෝම්බයක් සහ ජීව උණ්ඩ සොයා ගත්තේය. තම්බිරාජා මේ පිළිබඳව කන්දසාමිට දැනුම් දෙනු ලැබුණි. සිවකුමාර්ව සත්‍යමූර්තිගේ භාරයට පත් කිරීමෙන් පසු, කන්දසාමි සහ නිශ්ශංක නිහඬවම ඉහළ මාලයට ගියහ. කන්දසාමි පඩිපෙළ මුදුනේ රැඳී සිටියදී, නිශ්ශංක බැල්කනියට ගොස් ප්‍රධාන කාමරයේ පදිංචිකරුවන්ට නොපෙනී එහි රැඳී සිටියේය. දෙදෙනාම දිගටම සිදුවන සංවාදයට බාධා කිරීමට අකමැති වූ නමුත්, සිවකුමාර් සතුව තිබී අත්බෝම්බය සහ උණ්ඩ සොයාගත් නිසා විමසිල්ලෙන් සිටියහ. ඇතුළත සුහදතාවයේ ආත්මය දිගටම පැවතුණි. එය සිදුවූයේ ඉන්පසුවය!

උඹලා තමයි නියම “අරක්කාර්” (රාක්ෂයන්)

වේලාව රාත්‍රී 7.20 පමණ විය. බීම බී ඉවර කොට හිස් වීදුරුව මේසය මත තැබූ විසු සිටගෙන සිටි තැනින් නැගී සිටියේය. පසුව ඔහු හැරි අමිර්තලිංගම් දෙස බලා “හැමෝම හිතන්නේ කොටි සංවිධානයේ අපි “අරක්කාර්” (රාක්ෂයන්) කියලා, ඒත් ඇත්තටම උඹලා හැමෝම නියම රාක්ෂයෝ” යැයි පැවැසීය. දෙමළ එක්සත් විමුක්ති පෙරමුණේ සාමාජිකයන් ත්‍රිත්වය හිතුවේ විසු විහිළු කරන බවය. අමීර් සහ සිවා සිනාසෙද්දී යෝගේෂ්වරන් ගොත ගැසුවේය. අනතුරුව ගිනි අවියක් එළියට ගත් විසු, අමිර්තලිංගම්ට වෙඩි තැබීමට පටන් ගත්තේය. යෝගේෂ්වරන් කෑ ගසමින් පුටුවෙන් නැගිට්ටේය. ගිනි අවියක් එළියට ගත් ඇලෝසියස් ඔහුට වෙඩි තැබීය. ඈතින් ඉඳගෙන සිටි සිවසිතම්පරම් තිගැස්සී නැගිට “වේන්දම්. වේන්දම්” (“එපා, එපා”) කියමින් දෙමළෙන් කෑ ගැසුවේය. විසූ ඔහුගේ දකුණු උරහිසටද වෙඩි තැබුවේය.

වෙඩි හඬ ඇසුණු නිශ්ශංක තිබ්බොටුමුණුව ඇතුළට එබී බැලුවේය. සිදුවන්නේ කුමක්දැයි දුටු ඔහු වීදුරුව හරහා වෙඩි තැබීමට පටන් ගත්තේය. ඔහු වෙඩි පහරින් දෙදෙනාටම තුවාල විය. පසුව විසු සහ ඇලෝසියස් පිටතට දිව ගියේය. වෙඩි හඬ ඇසුණු කන්දසාමි දෙදෙනාම වෙඩි තබන අදහසින් ඒ දෙසට දිව ගියේය. තුවාල ලැබූ විසු සහ ඇලෝසියස් පෙරළා වෙඩි තබමින් පඩිපෙළෙන් බැස යාමට උත්සාහ කළ නමුත්, නිශ්ශංක ඔහු සතුවූ දෙවැනි ගිනි අවිය ගෙන වෙඩි තැබීම දිගටම කරගෙන ගියේය. ඔහු දෙදෙනාම මරා දැමීය. වෙඩි හඬ ඇසුණු සැණින් සත්‍යමූර්ති විසින් සිවකුමාර් අල්ලා ගත්තේය. ඔහු පොරබදන්නට විය.

සත්‍යමූර්තිගේ ග්‍රහණයෙන් මිදුණු සිවකුමාර් හෙවත් අරිවු, ඔහු සතුව තිබී කලින් අල්ලා ගත් අත්බෝම්බය ගැනීමට උත්සාහ කළේය. ඔහු එය විසි කිරීමට පෙර, ඒ දෙසට දිව ගිය නිශ්ශංක ඔහුට වෙඩි තබා තුවාල කළේය. පසුව සිවකුමාර් දුවන්නට උත්සාහ කළ නමුත්, නිශ්ශංක නැවතත් වෙඩි තබා ඔහුව බිම හෙළුවේය. ඝාතකයන් තිදෙනාම නිශ්ශංක විසින් එම ස්ථානයේදීම මරා දමනු ලැබුණි.

මාරාන්තික වෙඩි ප්‍රහාරය නිශ්ශංක සිදුකළද, අනෙක් අයද ප්‍රහාරයට එක්ව තිබුණි. උපපොලිස් පරීක්ෂක කන්දසාමි ඇලෝසියස්ට වෙඩි තබා තුවාල කළ අතර, අරවින්දරාජා හෙවත් විසු සහ සිවකුමාර් හෙවත් අරිවු යන දෙදෙනාටම වෙඩි තබා තුවාල සිදු කළේ කොස්තාපල් ලක්ෂ්මන් විසිනි. නිලධාරීන් දෙදෙනාම දෙමළ ජාතිකයන් වූ බැවින්, ඔවුන්ගේ පවුල් එල්ටීටීඊ පලිගැනීම්වලින් ආරක්ෂා කර ගැනීම සඳහා ඔවුන්ගේ වෙඩි තැබීම් පිළිබඳ තොරතුරු එවකට පුවත්පත්වලින් වසන් කරනු ලැබුණි.

දෙවැනි ගිනි අවිය

කොටින් සමග වෙඩි හුවමාරුවේදී නිශ්ශංක තිබ්බොටුමුණුවගේ වාසියට බලපෑ ප්‍රධාන සාධකය වූයේ ඔහු සතුව තිබූ දෙවැනි ගිනි අවියයි. නිශ්ශංකට කොටි පරාජය කිරීමට උපකාරී වූයේ මේ දෙවැනි ගිනි අවියයි. විශේෂයෙන් අරිවුට පළමුව වෙඩි තැබූ විට ඔහුගේ අතෙහි අත් බෝම්බයක්ද තිබුණි. මෙයට හේතුව වූයේ එදින අමිර්තලිංගම් නිවසේ ආරක්ෂක රාජකාරියේ යෙදී සිටි තවත් සගයකු නිවාඩු ලබා සිටීමයි. සිල්වා නම් මෙම පුද්ගලයා තම ආයුධය නිශ්ශංකට භාර දී තිබුණි. වෙඩි තැබීම ආරම්භ වන විට නිශ්ශංක සතුව අවි දෙකක් තිබුණේ එලෙසිනි. නිශ්ශංක සහ සිල්වා යන දෙදෙනාම මහවැලි ආරක්ෂක අංශයේ අය වූ අතර, ගාමිණී දිසානායක විසින් අමිර්තලිංගම්ගේ ආරක්ෂාව සඳහා විශ්වාසවන්ත නිලධාරීන් ලෙස ඔවුන්ව පෞද්ගලිකව පත්කර තිබුණි.

“අවජාතකයෝ, අවජාතකයෝ”

මංගයාර්ක්කරසි, සරෝජිනී සහ සේනාධිරාජා වෙඩි හඬ ඇසී පිටුපස දෙවැනි පඩිපෙළ අසලින් ඉහළ මාලයට දිව ගියහ. අමිර්තලිංගම් ලේ ගලමින් තම පුටුව මත නොසෙල්වී වාඩිවී සිටියේය. තම සැමියා මිය ගොස් ඇති බව නොදත් ඔහුගේ බිරිඳ, ඔහුගේ හිස පිටුපසට කුෂන් එකක් තබා හිස ඔසවා ගත්තේය. බිම ලේ විලක් මැද වැතිරී පණ අදිමින් සිටි යෝගේෂ්වරන් ඉංග්‍රීසියෙන් “අවජාතකයෝ, අවජාතකයෝ” යැයි මුමුණමින් සිටි අතර, සරෝජිනී ඔහුගේ පැත්තේ දණ ගසා සිටියේය. සිවසිතම්පරම් කතා කළ නොහැකිව බිත්තියට හේත්තු වී සිටියේය. ගිලන් රථ පැමිණි අතර, වින්දිතයන් රෝහල් ගත කරනු ලැබුණි.

කොළඹ අධිකරණ වෛද්‍ය නිලධාරී වෛද්‍ය එම්. එස්. එල්. සල්ගාදු විසින් අමිර්තලිංගම් මහතාගේ මරණ පරීක්ෂණය පවත්වා හිසට සහ පපුවට සිදු වූ තුවාල හේතුවෙන් මරණය සිදුවී ඇති බව ප්‍රකාශ කළේය. නියෝජ්‍ය වෛද්‍ය නිලධාරී වෛද්‍ය එල්. බී. එල්. ද අල්විස් විසින් යෝගේෂ්වරන්ගේ මරණ පරීක්ෂණය සිදු කළ අතර, හදවතට සහ අක්මාවට වෙඩි වැදීමෙන් මරණය සිදුවී ඇති බව ප්‍රකාශ කළේය.

එල්ටීටීඊ යේ “ප්‍රතික්ෂේප කිරීම”

ඝාතකයන්ගේ මරණ පරීක්ෂණය ජූලි 21 වැනි දින පැවැත්විණි. කිසිවෙකු මළ සිරුරු ඉල්ලා සිටීමට ඉදිරිපත් නොවූ බැවින්, සාධාරණ කාලයකට පසු රජය විසින් සිරුරු තුන වළ දමනු ලැබුණි. එල්ටීටීඊය නිල වශයෙන් ප්‍රහාරයේ වගකීම ප්‍රතික්ෂේප කළ අතර, “ප්‍රතික්ෂේප කිරීම” දිගටම කරගෙන ගිය නමුත් අනන්තපුරම්හි ව්‍යාජ අවමංගල්‍යයක් පැවැත්වූ බවට වාර්තා තිබුණි. කෙසේ වෙතත්, දෙමළ ප්‍රජාව විශ්වාස කළේ කොටි සංවිධානය සැබවින්ම වගකිව යුතු බවටයි.

ඝාතකයන් තිදෙනා පණපිටින් බේරී පළා ගියේ නම්, එල්ටීටීඊයට ඝාතනය සම්බන්ධයෙන් දොස් පැවරීමෙන් තොරව බේරෙන්නට ඉඩ තිබුණි. එසේනම්, එවකට පැවැති ප්‍රේමදාස රජය විසින්ම ප්‍රහාරයට කොටින්ගේ ඇති සම්බන්ධය ප්‍රතික්ෂේප කිරීමට සියලු උත්සාහ ගැනීමට ඉඩ තිබුණි. ජනතා විමුක්ති පෙරමුණ හෝ නවදිල්ලියට අනුබද්ධ දෙමළ කණ්ඩායමක් මත දොස් පැවරිය හැකිව තිබුණි. එවිට ඝාතනයට කොටින් සම්බන්ධ කර ගැනීමට සහ එමඟින් රජය-එල්ටීටීඊ සාකච්ඡා කඩාකප්පල් කිරීමට කුමන්ත්‍රණයක් ක්‍රියාත්මක වන බවට නඩුවක් ඵලදායී ලෙස ඔප්පු කළ හැකිව තිබුණි. කෙසේ වෙතත්, කොටි තිදෙනා වෙඩි තබා ඝාතනය කර ඔවුන්ගේ අනන්‍යතාව හෙළි කළ බැවින් මෙම තත්ත්වය අපේක්ෂා කළ පරිදි දිග හැරිය නොහැකි විය.

මෙම ශෝකජනක කතා පුවතේ වීරයා වූයේ කොටි ඝාතකයන් තිදෙනාම වෙඩි තබා ඝාතනය කළ සිංහල පොලිස් නිලධාරි නිශ්ශංක තිබ්බොටුමුණුව ය. ඝාතන උත්සාහයකට සම්බන්ධ වූ සියලුම කොටි ඝාතකයන් වෙඩි තබා ඝාතනය කළ පළමු සහ සමහර විට එකම අවස්ථාව එය විය හැකිය.

සිවසිතම්පරම්

අමිර්තලිංගම් ඝාතනය පිළිබඳ සත්‍යය වඩාත් පුළුල් ලෙස හෙළිදරව් කළ හැකිව තිබුණේ මීට වසර ගණනාවකට පෙර දෙමළ එක්සත් විමුක්ති පෙරමුණ හෝ ඉලංකෙයි තමිල් අරසු කච්චි පක්ෂය ඒ සඳහා මූලිකත්වය ගෙන තිබුණේ නම් ය. ඇසින් දුටු එකම සාක්ෂිකරු මුරුගේසු සිවසිතම්පරම් මේ කාරණය සම්බන්ධයෙන් ප්‍රසිද්ධියේ නිහඬතාවක් පවත්වා ගෙන ගියේය. ඒ කාලයේ පැවති තත්වයන් අනුව මෙය තේරුම් ගත හැකි විය. කෙසේ වෙතත්, සිවසිතම්පරම් තෝරාගත් කිහිප දෙනෙකුට සිදු වූ දේ පෞද්ගලිකව විස්තර කර ඇත.

“සිවා අයියා” ලෙස හඳුන්වන ඔහු වරක් මට දුරකතන සංවාදයකදී හරියටම සිදු වූ දේ පැවැසීය. එය ඉතා සියුම් විස්තරවලින් පිරුණු ඉතා පැහැදිලි විස්තරයක් විය. ඔහුගේ මතකය ගැන මම ඔහුට ප්‍රශංසා කළ විට, සිවසිතම්පරම් පිළිතුරු දුන්නේ: “එදා සිදු වූ දේ මම අමතක කරන්නේ කොහොමද තම්බි?” යනුවෙනි.

මෙම දුරකතනයේ සංවාදය පැවැත්වුණේ සිද්ධියෙන් වසර කිහිපයකට පසුවය. කෙසේ වෙතත්, ඔහු මට පැවසූ දේ ප්‍රකාශයට පත් කිරීමෙන් වළකින බවට සහතිකයක් ලබා ගැනීමට සිවාට අවශ්‍ය විය. “මගේ මරණයෙන් පසු ඔබට මේ ගැන ලිවිය හැකියි”යැයි ඔහු පැවසීය. සිවා 2000 දී මිය ගියේය. මම මංගයියර්ක්කරසි අමිර්තලිංගම් මහත්මිය සහ සරෝජිනී යෝගේෂ්වරන් මහත්මිය සමග ඔවුන්ගේ මතකයන් ගැන කතා කර ඇත්තෙමි. කනගාටුවට කරුණක් නම්, යාපනය නගරාධිපතිනිය ලෙස තේරී පත් වූ යෝගේෂ්වරන් මහත්මියද 1998 දී එල්ටීටීඊය විසින් ඝාතනය කරනු ලැබීමයි. අමිර්තලිංගම් මහත්මිය 2016 දී සාමකාමීව මිය ගියාය.

සිරිමාවෝගේ සහනය

මෙය එල්ටීටීඊය විසින් හිටපු විපක්ෂ නායක අප්පාපිල්ලෙයි අමිර්තලිංගම් සහ වෙට්ටිවෙලු යෝගේෂ්වරන් ඝාතනය කරන ලද ආකාරය පිළිබඳ ඛේදජනක කතාවයි. ලසන්ත වික්‍රමතුංග විසින් එවකට විපක්ෂ නායිකා සිරිමාවෝ බණ්ඩාරනායක මහත්මියට සිද්ධිය දැනුම් දුන් විට, ඇය කඩිමුඩියේ විමසුවේ “කවුද ඒක කළේ?” යනුවෙනි. එය කළේ එල්ටීටීඊ සංවිධානය බව පැවසූ විට, බණ්ඩාරනායක මහත්මිය සැනසුම් සුසුමක් හෙළමින් පැවැසුවේ “සිංහලයෙක් විසින් ඔහු මරා නොදැමීම ගැන මට හරිම සතුටුයි” යනුවෙනි.

සිංහලයන් බොහෝ දෙනකු අමිර්තලිංගම්ගේ දේශපාලනයට වෛර කරන්නට ඇත, එහෙත් ඔවුන් ඔහු මරා දැමුවේ නැත. ඔහු ඝාතනය කෙරුණේ කලින් ඔහු තම වීරයා ලෙස සැලකූ දෙමළ තරුණයන් විසිනි.

(***)
“ඩේලි එෆ්ටී” පුවත්පතේ පළවූ ලිපිය
සිංහලට පරිවර්තනය කළේ
අනිල් කරුණාරත්න