IMG-LOGO

2023 ජුනි මස 07 වන බදාදා


පෞද්ගලික බසයට වද දෙන කප්පම්කරුවෝ


කොරෝනා වසංගතය හේතුවෙන් පෞද්ගලික බස් කර්මාන්තය කඩාවැටී තිබියදීත් මාසයකට රුපියල් කෝටි 20ක පමණ මුදලක් කප්පම්කරුවන්ට ගෙවීමට සිදුවී ඇතැයි ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න මහතා ප්‍රකාශ කළ බව සඳහන් පුවතක් අප පුවත්පත ඉකුත් දා වාර්තා කළේය. දිවයින පුරා තිබෙන පෞද්ගලික බස් රථ 20,000කින් පමණ නිල හා නොනිල ආකාරයට කප්පම්කරුවන් මෙලෙස කප්පම් මුදල් අය කරන බව ද ඒ මහතා ප්‍රකාශ කළ බව එම ප්‍රවෘත්තියේ වැඩිදුරටත් සඳහන්ය.

පෞද්ගලික බස් රථ සේවාව ව්‍යාපාරයකි. ඒ සම්බන්ධයෙන් විවාදයක් නැත. ව්‍යාපාරික ප්‍රධාන අරමුණ ලාභ ලැබීමය. පෞද්ගලික බස් කර්මාන්තයේ අරමුණ ද එයමය. එහෙත් එසේ ලාභ ලැබීම පහසු කටයුත්තක් නොවේ. මගී ජනතාව බහුලව ගැවැසෙන්නේ උදය වරුවේ සහ හවස් වරුවේය. අනෙක් වේලාවට ධාවනය කෙරෙන බසයට ගමන් වාරයට අයත් වියදම ද සොයා ගැනීම දුෂ්කරය. බස් රථයේ අමතර කොටස්වල වියදම ද ඉතා ඉහළය. ඒ අතරවාරයේ දඩ කොළයක් ලැබීම ගහෙන් වැටුණු මිනිහාට ගොනා ඇනීමකි. ලීසිං වාරිකය ගෙවා දමන්නේ කෙසේ දැයි යන්න බස් හිමියා අතැර නොයන සිතිවිල්ලකි.

කරුණු කාරණා එපරිදි වනවිට කප්පම් ගෙවීමට සිදුවීම ඔළුව ඉස්සීමට නොහැකිම අවස්ථාවකි. මෙම කප්පම් ගැනීම සිදුවන්නේ නිල හා නොනිල ආකාරයට බව ගැමුණු විජේරත්න මහතා පවසයි. නිල ආකාරය වන්නේ “රනර්”ට ගෙවන ගාණ වේ. “රනර්” එම මුදල ගන්නේ මගියා බස් රථයට නැංවීමෙනි. “රනර්” කෙනකු සිටිය ද නොසිටිය ද මගියා බස් රථය සොයාගෙන පැමිණ එයට ගොඩවේ. එහෙත් “රනර්” සේවාවක් සපයා මුදලක් අතට ගනී.

මේ කියන “රනර්” සුළු චරිතයක් නොවේ. සෑම නගරයකම බස් ධාවනය ආරම්භ කෙරෙන ස්ථානයට අයිතිකරුවෙක් සිටී. ඔහු ඇතැම් විට ප්‍රදේශයේ දේශපාලන බලවතා විය හැකිය. පළාතේ දේශපාලන හෙංචයියකු විය හැකිය. මැරයකු විය හැකිය. සයිකල් චේන් එකෙන් ඩප්පියෙන් ගනුදෙනු බේරා ගන්නා ත්‍රාඩයකු විය හැකිය. ටී පනස් හයෙන් ගනුදෙනු අහවර කරගන්නා පාතාලයකු විය හැකිය. “රනර්” යනු ඒ බලයේ සජීවී සංකේතය වේ. එහෙයින් “රනර්” අභිබවා යාමට නොහැකිය. ඔහු ඉල්ලන ගණන දීමට සිදුවන්නේ එහෙයිනි.

කප්පම් මුදල නොගෙවීම මත බස් හිමිකරුවන්ට අනේකවිධ වද බන්ධනවලට ලක්වීමට සිදුවේ. ඇතැම් විට ගමන් වාර ආරම්භ කිරීමට වේලාව ලබාගැනීම දුෂ්කර විය හැකිය. බස් රථය නතර කර තැබීමට ස්ථානයක් අහිමි වීමට ඉඩ තිබේ. බස් රථයට සේවකයන් ​ෙසායා ගැනීමට දුෂ්කර වේ. එබඳු පරිසරයක බස් හිමිකරුට සිදුවන්නේ බස් රථය නිවෙසේ ගාල් කර තබා ගැනීමටය.

දුර ගමන් සේවා බස් රථ මුහුණ දෙන අනුවේදනීය ඉරණමක් ද තිබේ. අතරමග නගරයක බස් නැවැතුමේ බස් රථය නතර කිරීමට නම් ඉල්ලන කප්පම් ගෙවීමට සිදුවේ. අවම තරමින් බසයෙන් බැසීමට සිටින මගියා වෙනුවෙන් බස් රථය නතර කිරීමට සිදුවන්නේ ඉල්ලන කප්පම ගෙවන්නේ නම් පමණි. ලංකා පෞද්ගලික බස් හිමියන්ගේ සංගමයේ සභාපතිවරයා පවසන්නේ, එසේ මාසයකට ගෙවන කප්පම් මුදල රුපියල් කෝටි 20ක් පමණ වන බවය.

බස් කර්මාන්තයට අදාළව පවතින මෙම කප්පම් මාෆියාව නොදන්නා අයකු සිටිය නොහැක. විශේෂයෙන්ම පොලිසිය මෙය දනී. එහෙත් කළු ගල්වල ඔළුව හප්පා ගැනීමේ ආදීනව දන්නා පොලිස් නිලධාරීහු ද කිසිවක් නොදන්නා ඉරියව්වෙන් පසුවෙති. කප්පම් ඉල්ලන බවට පැමිණිලි නොලැබීම ද පොලිසියේ නිහඬ බවට හේතුවකි. පොලිසියට පැමිණිලි නොකරන්නේ ද කප්පම් මාෆියාවට ඇති බිය නිසාය.
ලංකා පෞද්ගලික බස් හිමියන්ගේ සංගමයේ සභාපතිවරයා ජනාධිපති ගෝඨාභය රාජපක්ෂ මහතාගෙන් ඉල්ලා සිටින්නේ මත්ද්‍රව්‍ය මාෆියාවට එරෙහිව දියත් කර ඇති මෙහෙයුම මෙන් මෙහෙයුමක් දියත් කර කප්පම් මාෆියාව ද තුරන් කර දෙන ලෙසය. සැබැවින්ම මෙම කප්පම් මාෆියාවේ සැහැසි ග්‍රහණයෙන් මෙම බස් කර්මාන්තය මුදාගත යුතුය.

රටකට තිබිය යුත්තේ එක නීතියකි. ගෝඨාභය රාජපක්ෂ ජනාධිපතිවරයාගේ දර්ශනය හා ප්‍රතිපත්තිය වී තිබෙන්නේ ද “එක රටක්, එක නීතියක්” යන්නය. එය එසේ නම් ප්‍රාදේශීය චණ්ඩින්ට අධිරාජ්‍ය ගොඩනගා ගනිමින් කප්පම් ගනිමින් කටයුතු කිරීමට ඉඩ දිය යුතු නැත. විශේෂයෙන්ම කොරෝනා මාරක වසංගතයෙන් පෞද්ගලික බස් රථ කර්මාන්තය වළ පල්ලට ඇද වැටුණේය. ඒ වැටුණු වැටිල්ලෙන් තවම නැගිට නැත. කවදා නැගී සිටින්නට හැකි වේ දැයි සහතිකයක් ද නැත. එහෙත් මෙම කර්මාන්තය රැකගත යුතුය. කර්මාන්තය රැක ගැනීමට නම් කර්මාන්තයට එදිරිව ඇති අණවින කොඩිවින හදි හූනියම් කපා දැමිය යුතුය. දැන් ආතුරයා සිටී. ආතුරයා බලා සිටින්නේ යකැදුරා තමන්ට පිහිට වනු ඇත යනුවෙනි. ඒ බලාපොරොත්තුව ඉටුවනු ඇතැයි යන්න අපගේ ද විශ්වාසය වේ.

(***)

 



අදහස් (5)

පෞද්ගලික බසයට වද දෙන කප්පම්කරුවෝ

bongo Friday, 11 September 2020 07:59 AM

මගීන් වේශයෙන් සැරසුණු සන්නද්ධ ආරක්ෂක නිලධාරීන්... මේ ප්‍රශ්නයට හොඳ පිළිතුරක් වෙයි නේද?

:       0       19

DharmasiriSunday, 13 September 2020 02:24 PM

බොරු ජෝක් දාන්න එපා.... ඔය කියන විදිහේ චිත්‍රපටිවල දැකපුවා මේ ලංකාවේ ඇත්තට කරන්න බැහැ. පළාතේ දේශපාලුවෝ මේවායේ පිටිපස්සේ ඉන්නේ. රටම දන්න ලොකු මිනිස්සු මේවා හසුරුවන්නේ.. ඔය සිවිල් ඇඳුමින් ගිහින් අන්තිමේ ඒ මිනිස්සුන්ගේ ජොබ් එකටත් කෙළවෙන එකයි වෙන්නේ. මේවා අත්දැකීමෙන් කියන්නේ මේ රටේ මම අවුරුදු 50කට ආසන්නව ජීවත් වෙනවා.

:       0       48

bongoTuesday, 15 September 2020 03:52 AM

කප්පම් කාරයෝ 10-12 දෙනෙකුට ඔලුව කුඩුවෙන්න තියලා බලන්නකෝ... කප්පම් ගන්නෙත් සල්ලිකාරයෝ වගේ ජීවත් වෙන්න නේද?

:       0       0

Wca Friday, 11 September 2020 05:48 PM

අනේ මන්දා, පොලිසිය කියන්න බෑලු, හැමෝම මේ අය දන්නවලු. ඔක්කොම එකතුවෙලා අල්ලලා දෙන්න පොලීසිය එක්ක එකතුවෙලා. ගිහින් කතා කරන්නකෝ ආරක්ෂක ලේකම් හරි ජනාධිපති එක්ක මේ ගැන හදා ගන්න ක්‍රමවේදයක්... ඒ අයව අල්ලලා ගන්න. ඔච්චර ලොකු සමිතිය වෙලත්. ඩීසල් ටිකක් ගණන් ගියා නම් බලන්න තිබුණා මෙයාගේ ගණන්... සාමාන්‍ය ජනතාවට දාන පාට් එක මේ බොරදියේ මාලු බාන්න හදන්නේ. ඇයි කොන්දොස්තරගේ සද්දේ?

:       0       6

මගියෙක් Monday, 14 September 2020 07:08 AM

දවසක් දුන්නා දීමනාවක් ආයේ ජීවිතේට අමතක නොවෙන්න. බස් එකට නගින්න කලින් මාව ෂර්ට් එකෙන් ඇදලා ගත්තා තව පොඩ්ඩෙන් ෂර්ට් එකත් ඉරිලා මාව බස්එකට යටවෙනවා. බස් එක නැවැත්තුවා අම්බලන්ගොඩින් බස්සලා දුන්නා අම්මාගෙන් බීපු කිරි මතක් වෙන්න. ඕකුන්ට කොන්දොස්තරලා පට්ට බයයි. හෙන සංවිධානයක් ඕක... ප්‍රධාන නැවතුම්වල මොවුන්ගේ නියෝජිතයින් ඉන්නවා. ඔවුන් තමයි කෝල් කරකර බස්වල විස්තර සහ මගීන් ලෝඩ් කරන්නේ... නැවතුමෙන් නැවතුමේදී මේ අය මාරුවෙනවා. කතරගම, හම්බන්තොට බස්වල එහෙම අනිවාර්යයෙන් ඉන්නවා. CTB බස්වලින් සෙනඟ ගලවන්න මේ අය මාර ගේමක් දෙන්නේ. CTB ඩ්‍රයිවර්ස්ලාට කොන්දලාට එහෙම කුණුහරපෙන් බනින්නේ. මන් ඕවා සෑහෙන්න ඇනලයිස් කරනවා බස්එකේ යද්දී... ටැටූ ගහලා හැඩි දැඩි හරක් ටිකක් ඉන්නේ ගොඩක් බස්වල... ඔවුන් හිතන්නේ අපිත් බය වෙන්න ඕනෑ කියලා. පොලිසියේ කතන්දරේ ඇත්තටම පොලිසිය බයයි. මොකද ගොඩක් අය බහින්නේ දේශපාලන හයියක් එක්ක. අනික පොලිසියට ලැබෙන ගාන නැති වෙනවනේ... ඒ අය ගාන දීලා ශේප් කරනවා. මගීන් විදියට ඔයාලත් ඕවා ගැන අවධානෙන් ඉන්න ඕනෑ.

:       0       71

ඔබේ අදහස් එවන්න

විශේෂාංග

ආර්ථීකයේ අර්බුදයෙන් ඔබ්බට...
2023 ජුනි මස 07 43 0

මැයි මාසයට අදාල උද්ධමනය පිළිබඳ දත්ත මහ බැංකුව විසින් නිකුත් කරනු ලැබ තිබේ. ඒ අනුව 2023 වර්ෂයේ අප්‍රේල් මාසය හා සන්සන්දනය කරන විට මැයි මාසයේ උද්ධමන අනුපාතය


දරුවන්ගේ කුසලතා වර්ධන වැඩසටහන් නතර කරනු එපා
2023 ජුනි මස 07 12 0

මුදල් ප්‍රතිපාදන වෙන් වී නැති නිසා මේ වසරේ රාජ්‍ය ළමා නාට්‍ය උළෙල නොපැවැත්වීමට ඉඩ ඇති බව නොබෝදා අප පුවත්පත වාර්තා කළේය. වාර්ෂිකව රටේ ළමා නාට්‍ය රචකයන්


සුභාවිත ගීතයේ රත්න ශ්‍රී ලකුණ
2023 ජුනි මස 06 273 0

ප්‍රවීණ කිවියර ආචාර්ය රත්න ශ්‍රී විජේසිංහ මහතාගේ සැත්තෑවැනි ජන්ම දිනයත් අඩසියවසක නිර්මාණ දිවියත් නිමිත්තෙන් ඇගැයුම් උළෙලක් කොළඹ පදනම් ආයතනයේදී පසු


ආර්ථික ප්‍රතිසංස්කරණ ඉන්දියාවෙන් පාඩමක්
2023 ජුනි මස 06 199 0

සංවර්ධන සැලැසුම් හා ප්‍රතිපත්ති සකස් කිරීම, ව්‍යාපෘති ක්‍රියාවට නැංවීම හා මහජනතාව රැකබලාගැනීම යන සියලු පැති ආණ්ඩුවකට පමණක්, සාර්ථකව කළ නොහැකි බව නවී


මෙහෙම වරප්‍රසාද තිබිලා මොකටද?
2023 ජුනි මස 06 685 0

පාර්ලිමේන්තු මන්ත්‍රීවරුන්ට ගුවන් තොටුපොළේ ප්‍රභූ පර්යන්තවලින් පරීක්ෂාවකින් තොරව පැමිණීමට දී ඇති වරප්‍රසාද ඉවත් කළ යුතු යැයි කෘෂිකර්ම අමාත්‍ය මහි


සමෘද්ධියෙන් දුප්පත්කම නැතිවේද?
2023 ජුනි මස 05 373 0

මනුෂ්‍යයකුට නොමැරී ජීවත් වීමට අවශ්‍ය ආහාර, බෙහෙත්හේත්, ඇඳුම් පැලඳුම් ආදී මූලික දේවල් නොලැබෙන තත්ත්වයක් දරිද්‍රතාව ලෙස හැඳින්විය හැකිය. එකී මූලික අවශ


මේවාටත් කැමතිවනු ඇති

ශ්‍රී ලංකා ඉන්ෂුවරන්ස් 2022 වසර සඳහා රු. බිලියන 12.47 ක දැවැන්ත බදු පෙර ලාභයක් වාර්තා කරයි 2023 මැයි මස 29 258 1
ශ්‍රී ලංකා ඉන්ෂුවරන්ස් 2022 වසර සඳහා රු. බිලියන 12.47 ක දැවැන්ත බදු පෙර ලාභයක් වාර්තා කරයි

මැයි 23, 2023 - කොළඹ දී. දේශයේ රක්ෂකයා ශ්‍රී ලංකා ඉන්ෂුවරන්ස් 2022 වසර සඳහා රු. බිලියන 12.47 ක බදුපෙර ලාභයක් සහ රු. බිලියන 41.2 ක ඒකාබද්ධ රක්ෂණ වාරික අදායම් අගයක් වාර්තා

ආබාධිත පුද්ගලයින් සමාජගත කිරීම සඳහා අපි වඩාත් ක්‍රියාකාරී විය යුතුයි 2023 මැයි මස 26 1440 2
ආබාධිත පුද්ගලයින් සමාජගත කිරීම සඳහා අපි වඩාත් ක්‍රියාකාරී විය යුතුයි

ආබාධිත තත්ත්වයන් හේතුවෙන් වෙනස්ව සැළකීම හා සබැඳි කථිකාවන් වෙනස් කිරීම තුළින් ඒ පිළිබඳව ඇති අපකීර්තිය වෙනස් කිරීම පිණිස Linea Aqua සමාගම හා එක්ව, ආබාධිත පුද්

ශ්‍රී ලාංකික සිසුන්ට 1+2 සුදුසුකම් සමග ජීව වෛද්ය විද්‍යා උපාධිය (ව්‍යාධිවේදය පිළිබඳ විශේෂ) දක්වා අධ්‍යාපනය හැදෑරීමට පහසුකම් සැලසීම සඳහා Amrak වෛද්ය විද්‍ය 2023 මැයි මස 23 776 0
ශ්‍රී ලාංකික සිසුන්ට 1+2 සුදුසුකම් සමග ජීව වෛද්ය විද්‍යා උපාධිය (ව්‍යාධිවේදය පිළිබඳ විශේෂ) දක්වා අධ්‍යාපනය හැදෑරීමට පහසුකම් සැලසීම සඳහා Amrak වෛද්ය විද්‍ය

කොළඹ ඩර්ඩන්ස් රෝහලේ අධ්‍යාපනික අංශය වන Amrak වෛද්‍ය විද්‍යා අධ්‍යාපන ආයතනය, පසුගියදා ඕස්ට්‍රේලියාවේ ප්‍රමුඛතම විශ්ව විද්‍යාලයක් වන සිඩ්නි තාක්ෂණ

Our Group Site