(කාංචන කුමාර ආරියදාස)

සෙනසුරු මාරුවෙන් ජය ලැබීමට සතරවරම් දෙවියන්ට පූජාවක් පවත්වන්නට ගිය පිරිසකට හතළිස් දහසක මුදලක් අහිමි වීමේ අපූරු පුවතක් දඹුල්ලට නුදුරු ප‍්‍රදේශයකින් වාර්තා විය.

පසුගියදා ඇති වූ ග‍්‍රහ මාරුවෙන් යුවළකට අපල ඇති බව පවසා දේවාලයක් පවත්වාගෙන යන කට්ටඩියකු ලවා ශාන්ති කර්මයක් සිදුකර ගැනීමට පියවර ගෙන තිබේ.

 ඒ අනුව නිවැසියන්ගේ ආරාධනාව පරිදි ග‍්‍රහ  මාරුව පවතින අවස්ථාවේ නිවසට කැඳවාගෙන පුද පූජාවක් පවත්වා ඇත. නිවෙසට පැමිණි කට්ටඩියා කියා ඇත්තේ ප‍්‍රබල  ග‍්‍රහ මාරුවෙන් නිවැසියන් සියලූ දෙනාටම අපල ඇති බැවින් සතරවරම් දෙවියන්ට පුද පූජාවක් පැවැත්විය යුතු බවය. නිවැසියන් ඊට එකඟතාව පළකොට ඇත. ඒ නිසා සතර වරම් දේව රූප හතරක් නිවෙසේ සාලය මැද තබා පුද පූජාවක් පැවැත්වීමට කට්ටඩියා දැනුම් දී ඇත.

සතර වරම් දේව රූප ඉදිරියෙන් බුලත් කොළ මත එක දෙවියකුට රුපියල් දසදහසක මුදල් තැබිය යුතු බවත් එම මුදල් නැවත තමන් විසින් රැගෙන නොයන බවත් ඒවා නිවැසියන්ටම නැවත ලබාගැනීමට හැකි බවත් කට්ටඩියා වැසියන්ට දැනුම් දී තිබේ. කට්ටඩියා දේව කන්නලව්ව ආරම්භ කොට නිවසේ රැඳී සිටි බිරිඳට කියා ඇත්තේ අසල නිවෙසකින් හිල් පොල්කටු තුනක් රැගෙන ආ යුතු බවය.

ඇය නිවෙසින් පොල්කටු ගෙන ඒම සඳහා පිටත් වනවාත් සමග සැමියාට කියා ඇත්තේ අසල නිවෙසකින් පැසුණු නැති කෙසෙල් ගසකින් අලූ නැති කෙසෙල් කොළයක් හැකි ඉක්මනින් කපාගෙන එන ලෙසය. ඒ අනුව ඔහු ද පිහියක් ද රැගෙන නිවසින් පිටව ගොස් ඇත්තේ කෙසෙල් කොළය ගෙන ඒම සඳහා ය. සැමියාත් බිරිඳත් හිල් පොල් කටු සහ කෙසෙල් කොළ ද රැගෙන නිවසේ සාලය මැදට පැමිණෙද්දී කට්ටඩි මහතාගේ දේව කන්නලව්වේ ශබ්දයක් නොමැති නිසා විපරම් කොට බලා ඇත. විනාඩි කිහිපයක් කට්ටඩියා සෙව්වද ඔහු නිවසින් පලාගොස් ඇති බව දැනගෙන තිබේ.

සතරවරම් දෙවියන් ඉදිරියේ තැබූ රුපියල් 10000 බැගින් රුපියල් 40,000 ක මුදල තැබූ  බුලත් කොළ පමණක් ඉතිරිව මුදල් නොමැති බව නිවැසියන් පසුව දැනගෙන තිබේ. මෙම දෙදෙනා කෑකෝ ගසමින් කට්ටඩියා සොයා ගම පුරා දිව  යද්දී මේ සිද්ධිය ගම්මුන්ට  අනාවරණය වන්නට වූහ.

ගමේ වැඩිහිටි බොහෝ අයකු කීවේ ග‍්‍රහ මාරුව ඉතා සාර්ථකව සිදුව ඇති නිසා කට්ටඩියා සෙවීමෙන් ඵලක් නොවන බවත් මින් ඉදිරියට මෙවැනි මෝඩ වැඩ නොකර ගෙදර යන ලෙසත්ය. නිවැසියන්ට මුදලත් අහිමි වී ලැජ්ජාව පමණක් ඉතිරි විය.