(තිහගොඩ උපසේන ලියනගම)
රුපියලේ කාසියක් නිසා මිනීමරා ගැනීමට තැත්කිරීමේ පුවතක් පසුගියදා අසන්නට ලැබුණේ දකුණු පළාතේ ගම්මානයක සිට නගරයට දිවෙන මගම බසයකිනි.

බසයට නැඟගත් මගියකුට රුපියල් හතළිස් තුනක බස් ගාස්තුව සඳහා වූ ටිකට් පත ලබාදුන් කොන්දොස්තරට මගියා දුන්නේ රුපියල් හතළිස් දෙකකි. ඉතිරි රුපියල කොන්දොස්තර ඉල්ලුව ද මගියා එය ගණන් නොගෙන සිනාසුනේය. ‘‘මේකෙ යන හැම එක්කෙනාම රුපියලක් අඩුවෙන් දුන්නම අන්තිමට මට අතින් රුපියල් පනහක් හැටක් ගෙවන්න වෙනවා’’ කොන්දොස්තර කීවේ කෝපයෙනි.

ලජ්ජාවට පත් මගියා, කොන්දොස්තරට රුපියල් දෙකේ කාසියක් දුන්නේ ඉතිරි රුපියල තමාට ආපසු දෙන ලෙස ඉල්ලමිනි.

සිනාසුණ කොන්දොස්තර ආපසු හැරී යාමට සූදානම් වන විට මගියා කීවේ ‘‘මේ විදියට රුපියල ගානේ යටි මඩි ගැහුවාම දවසට සීයක් හමාරක් ගසා ගත හැකි’’ බවයි. මේ කතාවෙන් කෝපයට පත් කොන්දොස්තර ‘‘කට වැඩියි’’ කීවෙන් මගියා ඉදිරියට පැන කොන්දොස්තරට වැරෙන් පහරක් එල්ල කළ අතර, අනතුරුව මහා පොරබැදීමක් සිදුවිය.

මෙය මගීන්ට මහා කරදරයක් වුයෙන් තවත් මගියකු රුපියලක් අතට ගෙන කොන්දොස්තරට දී මේක එයාට දීල වැඩේ නවත්වනවා’’ කීමෙන් මේ අරගලය නැවතුණි.