(කරන්දෙණිය එම්. සුසිල් ප්‍රියන්ත)
ගුරු වර්ජනයට සහය දැක්වීමට අසනීප නිවාඩු දැමීම සඳහා විදුලි පණිවිඩයක් යැවීමට තැපැල් කාර්යාලයට ඊයේ (25 වැනිදා) ගිය ගුරුවරයකු අලි අමාරුවක වැටුණු පුවතක් අම්බලන්ගොඩින් අසන්නට ලැබේ.

ගුරු යුවළකි. යාබද පාසල් දෙකකය. ගුරු වර්ජනයට සහයෝගය දැක්වීමට මේ දෙදෙනා තීරණය කළෝය. තමන් සේවය කරන පාසල්වලට අසනීප නිවාඩු දමා විදුලි පුවත් යැවීමට සැලසුම් කෙරුණේ ඒ අනුවය.

විදුලි පණිවිඩ යැවීමට තැපැල් කාර්යාලයට ගියේ ගුරුවරයාය. භාර්යාව වූ ගුරුවරියගේ ද අසනීප නිවාඩු විදුලි පණිවිඩය ද ඔහු යැව්වේය. යැවූ විදුලි පණිවිඩ දෙකේම රිසිට් ගුරුවරයා සිය නිවෙසට ගෙන ගියේය.

තමාගේ පාසලට විදුලි පණිවිඩය යැවූ රිසිට් පත ගුරුවරිය සිය සැමියාවූ ගුරුවරයාගෙන් ඉල්ලා සිටියාය.
රිසිට් පත අතට ගෙන බැලූ ගුරුවරියට තරු පෙනුණි. ‘කවද්ද මනුස්සයෝ මම ඔයාගේ පාසලට මාරු වෙලා ආවේ’ යැයි ගුරු භාර්යාව ගුරු සැමියාට දොස් මුරය දැම්මාය. සිදුව ඇති දේ තේරුම් ගිය ගුරුවරයා වහාම විදුලි පණිවිඩ යැවූ තැපැල් කාර්යාලයට ගියේය.

‘අනේ මිස් අලි වැරැද්දක්නේ වෙලා තියෙන්නේ. මම උගන්වන ඉස්කෝලේටම තමයි අල්ලපු පාසලේ උගන්වන මගේ නෝනගේ විදුලි පණිවිඩයත් යවලා තියෙන්නේ’. ඔහු එසේ කීවේ තරමක් බියපත් අයුරෙනි. ඔහු දුන් රිසිට් පත පරික්ෂා කර බැලූ තැපැල් කාර්යාලයේ නිලධාරිනිය ‘හොඳ වෙලාවට තමයි ඒක තවම යවලා නැත්තේ’ යයි කියමින් ගුරුවරයාගේ අතට විදුලි පණිවිඩය දුන්නේ එය නිවැරැදි කර දෙන ලෙස ඉල්ලා සිටිමින්ය.

‘හොර ලෙඩ අරන් බොරු නිවාඩු දමන්න යන කොට ඔහොම වැඩ වෙනවා’ යැයි ඒ අවස්ථාවේදී තැපැල් කාර්යාලයේ සිටි අයකු කියා සිටියේ උපහාසාත්මක අයුරෙනි.