එළවළු සහිත බත් එකක් ආහාරයට ගැනීමට ආ කාන්තාවකට තම බත්පත අනුභව කිරීමට ආපන ශාලාවෙන් ‘චිලිපේස්ට්’ හෝ බැදපු මිරිස් කරලක් නුදුන්නේ යැයි කියන සිද්ධියක් මත බත් පිඟාන සම්පූර්ණයෙන්ම කා දමා මුදල් නොගෙවා ගියේයැයි කියන පුවතක් මහනුවර නගරයෙන් වාර්තා වුණි.

සිද්ධිය මෙසේය.

කාන්තාව තරමක් මැදිවියේ පසුවන්නියකි. නවීන පන්නයේ ඇඳුම් ආයිත්තමින් සැරසුණු ඇය ඉකුත් සෙනසුරාදා දිනෙක මහනුවර නගරයට පැමිණියේ කිසියම් වූ රෝගයකට ප්‍රතිකාර ගැනීමටය. පේරාදෙණිය පාරේ පෞද්ගලික වෛද්‍ය මධ්‍යස්ථානයකට ගිය ඈ තම රාජකාරිය නිමවා පිටතට එනවිට පස්වරු එකත් පසුවී තිබුණි. හොඳටම බඩගිනි දැනුණු ඇය තමන් අත වූ වෛද්‍ය සහතික ආදිය ද එල්ලාගෙන අසල වූ ආපනශාලාවකට ගොඩවැදුණේ කුසගින්න නිවාගන්නා අදහසිනි.

මුලින්ම ‘ෆ්‍රයිඞ් රයිස්’ එකක රස බැලීමට සිතුණු ඇය එහි සේවකයකුගෙන් ඒ ගැන විමසද්දී කියූ මිල ගණන් අනුව “අපෝ ෆ්‍රයිඞ් රයිස් එපා. මට එළවළු කෑම එකක් දෙන්න’ යැයි කීවාය. ඇගේ ඉල්ලීම මත අදාළ සේවකයා එළවළු කෑම එකක් බෙදාගෙනැවිත් ඇයට දුන් අතර කාන්තාව ද වටපිට බලමින් ඒ ගැන වැඩි සතුටක් හෝ අසතුටක් ද නොපෙන්වමින් බත් පිඟාන හිස් කරන්නට වූවාය. බත් පිඟානේ හරි අඩකටත් වඩා වැඩි ප්‍රමාණයක් හිස්කළ ඇයට එතුළ තවත් ඉතිරිව තිබුණේ බත්කටවල් තුනක් හෝ හතරක් පමණි.

එක්වරම අදාළ කත “කෝ අනේ! මට මේක කන්න චිලි පේස්ට් ටිකක් දෙන්නකෝ” යැයි ඇවිටිලි කළාය.

“මෙහෙම නිකන්ම මේක කන්න බෑනේ” යැයි ද ඇය කී අතර එවිට හෝටල් සේවකයා කීවේ “චිලි පේස්ට් දෙන්නේ ෆ්‍රයිඞ් රයිස්වලට විතරයි” යනුවෙනි.

“එහෙනම් බැදපු මිරිස් කරලක්වත් දෙන්නකෝ” යැයි ඇය යළිත් ඇවිටිලි කළාය. “බැදපු මිරිස් නෑ නෝනා. ඇයි ඔය පපඩම් තියෙන්නේ” යැයි සේවකයා කියූ සැණින් කාන්තාව අසුනින් නැගිට්ටේ “අපෝ! එහෙනම් මට මේ කෑම කන්න බෑ” යැයි කියමිනි.

එහෙත් ඒ වන විටත් පිඟානේ එකදු බත් ඇටයක් හෝ නොවිණි.“ඔය කෑම එකට 120ක් ගන්න” යනුවෙන් අදාළ සේවකයා කඩ හිමියාට උස් හඬින් කීය.

“නෑ! නෑ!! මම ඒ කෑම එක කෑවෙ නෑ. ඔයාල ‘චිලිපේස්ට්’ ටිකක් දුන්නැති හින්දා මම කෑම එක කෑවෙ නෑ” යැයි කී කත හෝටල් සේවකයන් නොයෙක් අයුරින් උසුළු විසුළු කරද්දී මුදල් ද නොදී ආපනශාලාවෙන් පිටමං වූයේ කිසිවක් නෑසූ කන්වය.

අමිල දොළපිහිල්ල.