(පොල්ගස් ඕවිට එස්. වික‍්‍රමආරච්චි)

පොල් කඩන්නකු ලවා පොල් ගස් දෙකක පොල් කඩවා ගත් කාන්තාවක පොස් ගස්වල උස ප‍්‍රමාණය අනුව පොල් ගස් එකහමාරකට පමණක් ගාස්තුව ගෙවූ පුවතක් අගනුවරට ආසන්න නාගරික ප‍්‍රදේශයකින් අසන්නට ලැබිණි.

ඇයගේ කුඩා ඉඩමේ ඇත්තේ පොල්ගස් දෙකක් පමණි. එකක් අඩි 70ක්  පමණ උස පැරණි ගසක් වන අතර අනෙක් ගස එයින් බාගයක් පමණ උස ගසකි.

සැම වාරයකම  එම ගස් දෙකේ පොල් කැඞීමට පැමිණෙන පොල් කඩන්නා මෙවරද ඉකුත් දිනෙක පැමිණියේය.

”නෝනා,  පොල් ගස් දෙකෙ ගෙඩි කඩමුද” ඔහු විමසුවේය. නෝනාගේ අවසරය මත පොල් කඩන්නා ගස් දෙකේම ගෙඩි කඩා දැම්මේය.

‘කීයද ගාණ? නෝනා විමසුවාය.

‘තුන්සීයයි නෝනා’ ඔහුගේ පිළිතුරෙන් නෝනාගේ ඇස් උඩ ගියේය.

”ඈ..... ගිය සැරේ ගස් දෙකටම ගත්තෙ දෙසීයයි. මේ සැරේ තුන්සීයක්?” ඈ විමතිය  පළ කළාය.

එහෙම තමයි නෝනා ඒ දවස්වල පොල් ගෙඩියක් කීයද දැන් කීයද? පොල් කඩන්නා හේතු දැක්වීය.

නෝනාට හැඳිමිටේ නුවණ පහළ විය. ‘හරි හරි මෙතන ඇත්තටම ගස් දෙකක් නැහැ. මෙතන තියෙන්නේ උස ගහයි මිටි ගහයි. ගස් එක හමාරයි’ කියු ඇය ගස් එකහමාරට රුපියල් 225ක් ඔහු අත තබා ගෙතුළට වැදුණාලූ.