(සිටිනාමළුව - අනීෂා මානගේ)
තංගල්ල ප්‍රදේශයේ ඔසුසලකින් ඖෂධ ලබාගැනීමට පැමිණි පැය ගණනක් පෝලිමේ සිටි පියකුට ඖෂධ නිකුත් නොකර හරවා යැවීමේ සිද්ධියක් තංගල්ලෙන් වාර්තාවෙයි.

වාර්තාවන අන්දමට සිද්ධිය මෙසේය.

තංගල්ල මූලික රෝහලේදී හිසෙහි ශල්‍යකර්මයක් සිදුකර පෙරේදා 28 වැනිදා ටිකට් කපා රෝහලෙන් නියම කළ අමතර ඖෂධ මිලදී ගැනීම සඳහා තම පුතු සමග පැමිණි මෙම වයෝවෘද්ධ පියා දීර්ඝ වේලාවක් පෝලීමේ රැඳී සිට ඇත. 

දහවල් 1.45ට පමණ තම වාරය පැමිණියත් ඔසුසල් සේවකයන් ඔහුට දැනුම් දුන්නේ තම දහවල් ආහාරය ලබා නොගත් නිසා අද දිනයේදී ඖෂධ නිකුත් කළ නොහැකි බවය. නැවත සඳුදා පැමිණ ඖෂධ ලබා ගන්නා ලෙසද වැඩිදුරටත් දන්වා ඇත.

මේ හේතුවෙන් මොවුන්ට ඖෂධ මිලදී ගැනීම සඳහා තංගල්ලේ සිට කිලෝමීටර 40ක් පමණ දුර ගෙවා මාතර ඔසුසල වෙත යාමට සිදුවිය.  

කෙසේ වුවද මොවුන් පිටව ගිය පසු සිද්ධියට සම්බන්ධ ඔසුසලට පැමිණි අයට ඉන්පසුවද ඖෂධ නිකුත් කර තිබිණි. 

මෙම සිද්ධිය සම්බන්ධයෙන් බලධාරීන්ටද දැන් වූ බව එම රෝගියාගේ දරුවෝ පවසති.