(ගල්ගමුව - නිහාල් ජයවීර)
අලුත් අවුරුදු සාදයක දී ශබ්ද නඟා නොනවත්වා දෙඩවූ තරුණයකුට දත් දෙකක් අහිමිවී අවසානයේ රෝහල් ගතවීමට සිදුවූ සිද්ධියක් ගල්ගමුව පොලිසියෙන් වාර්තා වේ.

ගල්ගමුව පොලිස් වසමේ ගමක පදිංචි අයකු සිය හිතමිතුරන්ට අවුරුදු සාදයක් පැවැත්වීමට තීරණය කොට ඇත්තේ අප්‍රියෙල් මස උදා වීමටත් පෙරය. ඒ අනුව අලුත් අවුරුදු දිනය ගෙවි දින තුන හතරකට පසු යෙදුණු දිනයක් ඔහු තෝරා ගත්තේය. හිතවතුන්ට ඒ සඳහා සහභාගිවීමට කල්තියාම ඇරියුම් කොට තිබේ.

දිනය උදාවිය. හිතවත්හු මිතුරාගේ නිවසට පැමිණියහ. සාදයට මත්පැන් ද කටගැස්ම ද සරුවට එක් කිරීමට ගෙහිමියා වගබලාගෙන තිබුණි. පැමිණි ආරාධිතයෝ ද, හොඳහැටි මත්පැනින් සප්පායම් වූහ.

ඒ අතර සිටි ආරාධිත මිතුරකුගේ ‘රතුකට්ට’ පැන තිබුණි. හේ මහවේගයෙන් කතා කරමින් වචාලකම් කියන්නට පටන් ගත්තේය. ගෙහිමියා සිය මිතුරාට සෙමින් කථා කරන්න යැයි කීප වරක්ම කී නමුත් ඔහු ඊට අවනත නොවීය.

“කටවහ ගන්න” යයි කියමින් ගෙහිමියා ආරාධිත මිතුරා පසෙකට තල්ලු කොට තිබේ. බමන මතින් සිටි මිතුරා පසෙකට විසිවී ගොස් මුණින් අතට බිම වැටී තිබේ. ඔහුගේ දත් දෙකෙක් ද බිම පතිතවී තිබෙන අතර කටින් ලේ ගලා එන්නට විය.

වහාම ඔහුව ගල්ගමුව මූලික රෝහලටත් පසුව කුරුණෑගල මහ රෝහලටත් මාරු කර යවා තිබේ.

ගෙහිමියා පොලිස් අත්අඩංගුවට පත්ව පසුව ගල්ගමුව මහේස්ත්‍රාත් අධිකරණයට ඉදිරිපත් කිරීමෙන් පසු රුපියල් ලක්ෂයක ශරීර ඇප මත මුදා හැර තිබේ.

ගල්ගමුව පොලිසියේ වැඩබලන ස්ථානාධිපති පොලිස් පරීක්ෂක දුමින්ද නයනසිරි මහතාගේ උපදෙස් මත පොලිසිය පරීක්ෂණ පවත්වයි.