ආයතනයෙන් ඉවත්ව ගිය සේවකයකු යළි ආයතනයට පැමිණ අමනාපයෙන් පසුවන මිතුරෙකුට දුන් විශේෂ ත්‍යාගය හමුවේ  අමනාප මිතුරා සේවක පිරිස් ඉදිරියේ ලැජ්ජාවට පත්වීමේ පුවතක් වැව් බැඳි පෙදෙසකින් වාර්තා වුණි.

අනාවරණය වෙන ආකාරයට සිද්ධිය මෙසේය.

වසර ගණනාවක් එකට පෞද්ගලික ආයතනයේ සේවය කළ සේවකයෙක් පසුගියදා ඉවත්ව ගියේය. ඔහු සේවය කළ කාලයේ එකට වැඩ කළ අයකු සමග අමනාපයෙන් පසු වූයේය.

ඉවත්ව ගිය සේවකයා දින කිහිපයකට පසුව සේවකයන්ට සංග්‍රහයක් කිරීමට ආයතනයට පැමිණියේය.

ඒ වෙනුවෙන් ආයතනයේ සේවකයෝද ඔහුට ත්‍යාගයක් දීමට සූදානම් වූහ.

සේවකයා වෙන්ව යාම වෙනුවෙන් සමුදීමේ කතාවක් කළේය. ආයතන ප්‍රධානින් හා සේවකයෝද ඒ වෙනුවෙන් කතා කළහ. ඉන් අනතුරුව සියලු දෙනා සංග්‍රහය භුක්ති විඳීමට පටන් ගත්හ.

වෙන්ව යාම නිමිත්තෙන් සේවකයන් දුන් ත්‍යාගය ඔහු පැමිණි රථයෙන් තැබූ සේවකයා රථයේ තිබූ පාර්සලයක් ගෙනැවිත් අමනාපයෙන් පසු වූ මිතුරා අමතා “මෙතැන් පටන් අමනාපකම් අමතක කරමු” යැයි කියා අතට අතට දී සිපගෙන තෑගි පාර්සලය අත තබා යන්නට ගියේය.

මිතුරාද සියල්ල අමතක කරමින් එය සතුටින් බාරගෙන ආයතනයේ සියල්ලන් ඉදිරිපිටදී එය විවෘත කළේය.

 එහි තිබුණේ චීත්තයක් බව දැක ඔහු අන්ද මන්ද වී  පිරිස් ඉදිරියේ දැඩි සේ ලැජ්ජාවට පත් වුණේලු.

එය ආයතනයේම විසිකර දමා නික්ම ගිය මිතුරා ද එදා සිට එම ආයතනයට පැමිණෙන්නේ ද නැතිලු.

මොරගොල්ලාගම සිසිර කැලේගම