රුසියාවෙන් දිනක් ඇතුළත කොරෝනා වයිරස ආසාදිත මරණ 174ක් වාර්තා වූ බවත් එය දිනක් ඇතුළත එරටින් වාර්තා වූ වැඩිම මරණ ගණන ලෙසත් සටහන් විය.

ගෙවුණු පැය 24ක කාලයේදී කොරෝනා ආසාදිත මරණ 174ක් වාර්තා වූයේ යැයි ද දිනක් ඇතුළත් වාර්තා වූ වැඩිම කොරෝනා ආසාදිත මරණ ගණන එය යැයි ද රුසියානු සෞඛ්‍ය බලධාරීහු අද (26) ප්‍රකාශ කළහ. ඒ අනුව රුසියාවෙන් වාර්තා වන සමස්ත කොරෝනා ආසාදිත මරණ ගණන 3,807ක් දක්වා ඉහළ ගොස් ඇත.

රුසියාවෙන් අද (26) පස්වරු 3න් අවසන් වූ පැය 24ක කාලයේදී නව කොරෝනා ආසාදිතයන් 8,915 දෙනකු වාර්තා වූ අතර ඒ අනුව එරටින් වාර්තා වන සමස්ත කොරෝනා ආසාදිතයන්ගේ ගණන 3,62,342ක් දක්වා ඉහළ ගොස් ඇත.

චීනයේ හුබෙයි පළාතේ වූහාන් නගරයෙන් ව්‍යාප්ත වීමට පටන් ගත් බව කියන නව කොරෝනා වයිරසය හෙවත් ‘කොවිඩ්-19’ ගෝලීය වසංගතයෙන් වැඩිම බලපෑමක් එල්ල වූ රටවල් ගොන්නට රුසියාව ද එක්ව ඇත. මේ වනවිට තෙවැනියට වැඩිම ආසාදිතයන් ගණනක් වාර්තා වන්නේ ද රුසියාවෙනි.

රටවල් හා පරිපාලන ප්‍රදේශ 220කට අධික සංඛ්‍යාවකට ව්‍යාප්ත වී ඇති ‘කොවිඩ්-19’ ගෝලීය වසංගයෙන් වැඩිම බලපෑමක් එල්ල වී ඇත්තේ ඇමෙරිකා එක්සත් ජනපදය ය. වැඩිම ආසාදිතයන් ගණනක් සහ මරණ ගණනක් වාර්තා වන්නේ ඇමෙරිකා එක්සත් ජනපදයෙන් වන අතර දෙවැනියට වැඩිම ආසාදිතයන් ගණනක් වාර්තා වන්නේ බ්‍රසීලයෙනි.

අල්ජසීරා

055