(රංජිත් රාජපක්ෂ )

නුවරඑලිය දිස්ත්‍රික්කයේ බගවන්තලාව පොලිස් වසමට අයත් කොටියාගල වත්තපහල කොටස අද (02) උදෑසන සිට හුදෙකලා කළ බව බගවන්තලාව සෞඛ්‍ය වෛද්‍ය නිලධාරි කාර්යාලයේ මහජන සෞඛ්‍ය පරික්ෂකවරයෙකු පැවසිය.

එම වතු යායේ පහල කොටසෙන් කොවිඩ් 19 වෛරසය අසාදනය වු අසාදිතයන් විශාල පිරිසක් මේ වන විට හදුනාගෙන ඇති බවත්,ඉකුත් (29) දින එම වතු යායෙන් අසාදිතයන් 14 දෙනෙකු හමුවිම නිසා කොටියාගල වත්ත පහල කොටස හුදකලා කිරිමට පියවර ගත් බවයි මහජන සෞඛ්‍ය පරික්ෂකවරයා කියා සිටියේ.

පෙර අසාදිතයන්ගේ සහ නව අසාදිතයන්ගේ ආශ්‍රිතයන් විශාල පිරිසක් සිටින බවත්, එම පිරිස මේ වන විට ස්වයං නිරෝධානයට යොමු කර ඇති බවද මහජන සෞඛ්‍ය පරික්ෂකවරයා පැවසිය.

හුදකලා කරන ලද බගවන්තලාව වත්ත පහල කොටසට පිවිසෙන මාර්ග සියල්ලකම දැඩි පොලිස් ආරක්ෂාවක් යොදවා ඇත.

මේ අතර බගවන්තලාව නගරයේ පිහිටි රාජ්‍ය සහ පෞද්ගලික බැංකු ශාඛා දෙකක කාර්ය මණ්ඩලයේ තිදෙනෙකුට කොවිඩ් 19 වෛරසය අසාදනය විම නිසා එම බැංකු ශාඛා දෙක (01) දින සිට තාවකාලිකව වසා දමා එම බැංකු ශාඛා දෙකේ කාර්ය මණ්ඩලය ස්වයං නිරෝධානයට යොමු කල බවද මහජන සෞඛ්‍ය පරික්ෂකවරයා පැවසිය.