කොරෝනා වයිරසය පැතිරීම මැඩපැවැත්වීම සඳහා ඉන්දියාව සිය රටේ බිලියන 1.3ක ජනතාවක් සම්පූර්ණයෙන් හුදකලා කිරීමට ලක්කර තිබේ.
 
ඊයේ (24) මධ්‍යම රාත්‍රියේ සිට ක්‍රියාත්මක වන මෙම නියෝගය දින 21ක් දක්වා බලපැවැත්වේ. 
 
සම්බන්දව අදහස් දක්වමින් අග්‍රාමාත්‍ය නරේන්ද්‍ර මෝදි මහතා පවසා සිටියේ " ඔබේ නිවෙස් වලින් පිටතට යෑම සම්පූර්ණයෙන් තහනම්, සෑම ඉන්දියානුවෙකුම බේරා ගැනීම අවශ්‍යව තිබෙනවා. ඉදිරි දින 21ක කළමණාකරනය කිරීමට අපොහොසත් වුවහොත් ඉන්දියාව වසර 21කින් පසුබසිනු ඇති", බවයි.

හුදකලා කිරීම සිදුවුවද ඉන්දියාවේ වෙළඳසැල්, බැංකු සහ ඉන්ධන පිරවුම්හල් විවෘතව පවතින බව සඳහන් වන අතර අග්‍රාමාත්‍යවරයා සඳහන් කර ඇත්තේ බටහිර රටවල මෙන් කලබල වී නිවෙස් වල ආහාර ද්‍රව්‍ය ගොඩගසා ගැනීම අවශ්‍ය නොවන බවයි.
අත්‍යාවශ්‍ය භාණ්ඩ සැපයීම සහතික කිරීම සඳහා මධ්‍යම හා ප්‍රාන්ත රජය විසින් සියලු පියවර ගෙන ඇති බවද මෝදි මහතා පැවසී ය.
 
කොරෝනා වයිරසය පැතිරීම හේතුවෙන් ලොවපුරා හුදකලා කර ඇති බිලියන 2.6ක ජනතාවගෙන් අඩක් ඉන්දියාවේ වන බව මාධ්‍ය වාර්තා කර ඇත.
 
ඉන්දියාවෙන් මේවනවිට කොරෝනා වයිරස ආසාදිත මරණ 10ක් සහ රෝගීන් 482ක් වාර්තා වී තිබේ.
 
සමහර පර්යේෂකයන් අනතුරු අඟවා ඇත්තේ මැයි මස මැද භාගය වනවිට ඉන්දියාවේ මිලියනයකට අධික පිරිසකට කොරෝනා වයිරසය ආසාදනය වියහැකි බවයි.
 
කෙසේවුවද සමහර යුරෝපීය රටවල් හා සසඳන විට වර්ථමානයේ ඉන්දියාවේ කිරීටක වෛරසයේ පැතිරීම අවම බවද සඳහන් වේ.
 
( 085)