සම්පත් බැංකුව 2026 වසරේ පළමුවන කාර්තුව සඳහා රුපියල් බිලියන 28.5 ක මුළු මෙහෙයුම් ආදායමක් වාර්තා කරන ලදී. මේ සඳහා කාර්තුව තුළදී ස්ථාවර ලෙස ඉහළ ගිය ශුද්ධ පොලී ආදායම සහ ශුද්ධ ගාස්තු හා කොමිස් ආදායම් හේතු විය. කෙසේ වුවද 2026 වසරේ පළමු කාර්තුව සඳහා බැංකුව රුපියල් බිලියන 6.2 ක බදු පසු ලාබයක් වාර්තා කරන ලද අතර මෙය පසුගිය වසරේ අනුරූප කාර්තුවට සාපේක්ෂව සියයට 26 ක පහත වැටීමකි. මේ සඳහා ණය කළඹෙහි අඛණ්ඩ වර්ධනය හා ගෝලීය අර්බුද තත්වයන් හේතුවෙන් හඳුනා ගන්නා ලද රුපියල් බිලියන 4.5 ක අපහායන ප්‍රතිපාදනද, භාණ්ඩාගාර බිල්පත් හා බැඳුම්කර විකිණීමෙන් ලද ප්‍රාග්ධන ලාබ පෙර වසරේ අනුරූප කාර්තුවට සාපේක්ෂව රුපියල් බිලියන 2.0 කින් පහත වැටීම ද ඍජුවම දායක විය. 
2026 වසරේ පළමුවන කාර්තුවේදී ණය කළඹෙහි රුපියල් බිලියන 127 ක කැපීපෙනෙන වර්ධනය හේතුවෙන් බැංකුවේ මුළු වත්කම් ප්‍රමාණය පළමු වතාවට රුපියල් ට්‍රිලියන 2 පසු කිරීම සුවිශේෂී සන්ධිස්ථානයකි. 
එසේම සම්පත් සමූහයද, 2026 වසරේ පළමු කාර්තුව සඳහා රුපියල් බිලියන 9.4 ක බදු පෙර ලාබයක් ද රුපියල් බිලියන 6.8 ක බදු පසු ලාබයක් ද වාර්තා කරන ලදී. 
බැංකුවේ ශුද්ධ පොලී ආන්තිකය 2025 වසර සඳහා වාර්තා වූ සියයට 4.11 සිට 2026 පළමු කාර්තුව සඳහා පදනම් ලකුණු 2 ක පහත වැටීමක් සහිතව සියයට 4.09 ක් ලෙස වාර්තා විය. මේ සඳහා රාජ්‍ය සුරැකුම්පත්වල පොලී අනුපාත පහත වැටීම හේතුවෙන් බැංකුවේ ආයෝජන කළඹ සඳහා වූ පොලී ආදායම පහත වැටීම මූලික වශයෙන් හේතු විය. 
2026 වසරේ පළමු කාර්තුවේදී සම්පත් බැංකුවේ අරමුදල් මත පදනම් නොවූ ආදායම සියයට 4 ක පහත වැටීමක් සහිතව රුපියල් බිලියන 8.3 ක් ලෙස වාර්තා වූ අතර, මේ සඳහා භාණ්ඩාගාර බිල්පත් හා බැඳුම්කර විකිණීමෙන් ලද ප්‍රාග්ධන ලාබ පහත වැටීම හේතු විය. මෙම ප්‍රාග්ධන ලාබ පෙර වසරේ අනුරූප කාර්තුවේ වාර්තා කරන ලද රුපියල් බිලියන 2.7 ට සාපේක්ෂව සියයට 75 ක පහත වැටීමක් සහිතව රුපියල් බිලියන 0.7ක් ලෙස වාර්තා විය. 
කාඩ්පත් භාවිතය ඉහළ යාම ණය කළඹෙහි අඛණ්ඩ වර්ධනය හා වෙළෙඳාම් ආශ්‍රිත ක්‍රියාකාරකම්වලින් ලද ආදායම් ඉහළ යාම හේතුවෙන් ශුද්ධ ගාස්තු හා කොමිස් ආදායම සියයට 28 ක ඉහළ යාමක් සහිතව රුපියල් බිලියන 6.1 ක් ලෙස වාර්තා විය. 
මීට අමතරව ඇමරිකානු ඩොලරයට සාපේක්ෂව ශ්‍රී ලංකා රුපියල, රුපියල් 5.52 කින් අවප්‍රමාණය වීම හේතුවෙන් පෙර වසරේ පළමු කාර්තුවට සාපේක්ෂව සියයට 24 ක වාර්ෂික වර්ධනයක් සහිතව 2026 වසරේ පළමු කාර්තුව සඳහා රුපියල් බිලියන 1.5 ක විනිමය ආදායමක් වාර්තා කිරීමටද බැංකුව සමත් විය. 
2026 වසරේ පළමු කාර්තුව සඳහා රුපියල් බිලියන 4.5 ක අපහායන අය කිරීමක් හඳුනා ගන්නා ලද අතර, මෙය පෙර වසරේ පළමු කාර්තුවට වාර්තා කරන ලද රුපියල් බිලියන 0.2 ක අපහායන නැවත හැරවීමට සාපේක්ෂව රුපියල් බිලියන 4.6 ක ඉහළ යාමකි. මෙය මූලිකවම ණය කළඹ වර්ධනය වීම හේතුවෙන් හා ගෝලීය අස්ථාවරත්වය වෙනුවෙන් ණය හා අත්තිකාරම් සඳහා වෙන්කරන ලද රුපියල් බිලියන 4.1 ක අපහායන අය කිරීමකින් ද, වෙනත් මුල්‍ය උපකරණ සඳහා හඳුනා ගන්නා ලද රුපියල් බිලියන 0.4 ක අපහායන අය කිරීමකින් ද සමන්විත විය. 
2026 වසරේ පළමු කාර්තුව සඳහා මෙහෙයුම් වියදම පෙර වසරට සාපේක්ෂව සියයට 19 ක ඉහළ යාමක් වාර්තා කරන ලද අතර, මේ සඳහා වාර්ෂික වැටුප් වර්ධකය හා නව උපායමාර්ගික මුලපිරීම් ක්‍රියාවට නැංවීම සඳහා කළ නව සේවක බඳවා ගැනීම් හේතුවෙන් පුද්ගල පිරිවැය ඉහළ යාම, තොරතුරු තාක්ෂණය ආශ්‍රිත වියදම් ඉහළ යාම මූලික වශයෙන් හේතු විය. 
බැංකුවේ මුළු බදු වියදම පෙර වසරේ අනුරූප කාර්තුවට සාපේක්ෂව 43% ක පහත වැටීමක් සහිතව රුපියල් බිලියන 5 ක් ලෙස වාර්තා කරන ලදී.
සියලු‍ම ප්‍රාග්ධන අනුපාතයන් අවම නියාමන අවශ්‍යතාවලට වඩා ඉහළ මට්ටමක පවත්වාගෙන යාමට බැංකුව සමත් වූ අතර, 2026 මාර්තු 31 දිනට පළමු පෙළ සාමාන්‍ය ස්කන්ධ ප්‍රාග්ධන අනුපාතය, පළමු පෙළ ප්‍රාග්ධන අනුපාතය හා මුළු ප්‍රාග්ධන අනුපාතයන් පිළිවෙළින් සියයට 13.17, සියයට 13.17 හා සියයට 15.79 ක් ලෙස වාර්තා කරන ලදී. 
2026 වසරේ පළමු කාර්තුව තුළදී ණය කළඹ රුපියල් බිලියන 127.5 කින් වර්ධනය වූ අතර, මේ හේතුවෙන් බැංකුවේ මුළු වත්කම් පෙර වසරේ අවසානයට සාපේක්ෂව සියයට 6 කින් ඉහළ යමින් (සියයට 24 ක වාර්ෂික වර්ධනයක්), 2026 මාර්තු 31 දිනට රුපියල් ට්‍රිලියන 2.1 ක් ලෙස වාර්තා විය. තවද තැන්පතු ප්‍රමාණය ඉහළ යාම හේතුවෙන් බැංකුවේ මුළු වගකීම් ද 2025 වසර අවසානයට සාපේක්ෂව සියයට 7 ක වර්ධනයක් (සියයට 28 ක වාර්ෂික වර්ධනයක්) සහිතව රුපියල් ට්‍රිලියන 1.92 ක් දක්වා ඉහළ යන ලදී.