වත්කම් රු. බිලියන 57 ඉක්මවයි

ශාඛා ජාලය 150 දක්වා පුළුල් වෙයි

2025/26 මූල්‍ය වර්ෂයේදී මේ දක්වා වූ ශක්තිමත්ම මූල්‍ය කාර්ය සාධනය වාර්තා කරමින්, සමාගම සාර්ථක හිමිකම් නිකුතුවක් හරහා ප්‍රාග්ධන පදනම ශක්තිමත් කරයි

බදු ගෙවීමෙන් පසු සමූහ ලාභය: රු. බිලියන 2.05ක් - වාර්ෂිකව සියයට 16ක වර්ධනයක්

මුළු ප්‍රාග්ධන ප්‍රමාණවත්භාව අනුපාතය: සියයට 23.84

2026 මාර්තු 31 වැනිදායින් අවසන් වූ මූල්‍ය වර්ෂය සඳහා සෙන්කඩගල ෆිනෑන්ස් පීඑල්සී සමාගම, සමාගමේ ඉතිහාසයේ ශක්තිමත්ම පහළම රේඛා ප්‍රතිඵලය සනිටුහන් කරමින්, රු. බිලියන 2.05ක සමූහ බදු පසු ලාබයක් වාර්තා කළේය. එය පෙර වර්ෂයට සාපේක්ෂව සියයට 16ක වර්ධනයකි. සමාගම් මට්ටමින් බදු පසු ලාබය රු. බිලියන 1.85ක් දක්වා ළඟා වූ අතර, එය සියයට 14ක වර්ධනයකි. ණය ලබාදීමේ ව්‍යාපාරය, ක්‍රමයෙන් ස්ථාවර වෙමින් පවතින දේශීය ආර්ථික පරිසරයක් තුළ ගම්‍යතාව ලබා ගැනීම මෙයට හේතු වී ඇත.
සමාගමේ ස්වාධීන සභාපති එන්. වසන්ත කුමාර් මහතා අදහස් දක්වමින්, මෙම වාර්තාගත ප්‍රතිඵලය වසර ගණනාවක විනයගරුක ක්‍රියාත්මක කිරීම, විචක්ෂණශීලී අවදානම් කළමනාකරණය සහ තිරසාර වර්ධනයක් කෙරෙහි නොසැලෙන අවධානය පිළිබිඹු කරන බව සඳහන් කළේය. එමෙන්ම මෙය ලංකාවේ ප්‍රමුඛ බලපත්‍රලාභී මූල්‍ය සමාගමක් ලෙස සෙන්කඩගල ෆිනෑන්ස් සිය ස්ථානය තව දුරටත් ශක්තිමත් කරගනිමින් සිටින බවට සාක්ෂියක් බවද ඔහු පැවසීය.
සමාගමේ මුළු වත්කම් සියයට 40කින් වර්ධනය වී රු. බිලියන 57.1ක් දක්වා ළඟා වූ අතර, එමගින් රු. බිලියන 50ක සීමාව ප්‍රථම වතාවට ඉක්මවා ගියේය. විශේෂයෙන් මූල්‍ය කුලී  (finance leasing) සහ කුලී මිලදී ගැනීම් (hire purchase) ව්‍යාපාර අංශ රු. බිලියන 26.5සිට රු. බිලියන 34.6 දක්වා ව්‍යාප්ත වීම සමගින්, සමාගමේ ප්‍රධාන ණය ලබාදීමේ ව්‍යාපාරවල නිරෝගී වර්ධනයක් මෙයට හේතු වී ඇත. ආර්ථික ක්‍රියාකාරකම් වර්ධනය වීමත් සමග වාහන හා වත්කම් මූල්‍යකරණයට ඇති ඉල්ලු‍ම ශක්තිමත්ව පැවතීම මෙහිදී පිළිබිඹු වේ. නෙට් පොලී ආදායම වාර්ෂිකව සියයට 9කින් වර්ධනය වී රු. බිලියන 6.25ක් දක්වා ළඟා විය.
සමාගමේ ලාබදායිත්ව දර්ශක කර්මාන්තයේ අනෙකුත් සමාගම්වලට වඩා ඉදිරියෙන් සිටිමින් වසර පුරාම එසේ පැවතුනි. හිමිකම් මත ප්‍රතිලාභ අනුපාතය සියයට 16.42ක් ලෙසත්, ශුද්ධ පොලී ආන්තිකය කර්මාන්තයේ සාමාන්‍ය
යය වන සියයට 10.01ට සාපේක්ෂව සියයට 14.50ක් ලෙසත්, වියදම් - ආදායම් අනුපාතය කර්මාන්තයේ සියයට 46.92ට සාපේක්ෂව සියයට 42.62ක් ලෙසත් වාර්තා විය. 
වර්ෂය තුළ වත්කම් තත්වය තව දුරටත් ශක්තිමත් වූ අතර, දළ 3 වන අදියර ණය අනුපාතය සියයට 7.24සිට සියයට 5.43 දක්වා පහත වැටිණි. එය විනයගරුක ණය ලබාදීමේ ක්‍රියාවලීන් සහ ඵලදායී ණය අයකැරීම් ක්‍රියාමාර්ග පිළිබිඹු කරයි. සමාගම මුළු විධිවිධාන ආවරණ අනුපාතය සියයට 7.18 ක් ලෙස පවත්වාගෙන ගිය අතර, එය ණය අවදානම් කළමනාකරණය සහ පාඩු අවශෝෂණය සම්බන්ධයෙන් සමාගම දක්වන විචක්ෂණශීලී ප්‍රවේශය පැහැදිලි කරයි.
වර්ෂය තුළ නව ශාඛා 24ක් විවෘත කිරීමෙන් සමාගම සිය දිවයින පුරා විහිදුනු ජාලය පුළුල් කළ අතර, 2026 ජූනි මාසයේදී සිය සන්ධිස්ථානාත්මක 150 වන ශාඛාව විවෘත කරන ලදී. එමගින් ලංකාවේ වඩාත් පුළුල්ව බෙදාහරින ලද බලපත්‍රලාභී මූල්‍ය සමාගමක් ලෙස සිය ස්ථානය තව දුරටත් ශක්තිමත් කරගනිමින්, උසස් තත්වයේ පාරිභෝගික අත්දැකීමක් ලබාදීමට ඇති කැපවීම තහවුරු කරයි. සමාගමේ සේවක බලකාය පෙර වර්ෂයේ 985සිට සියයට 23කින් වර්ධනය වී 1,215 දක්වා ළඟා විය. එය සමාගමේ වර්ධන ගමන්මගට ඇති විශ්වාසය පිළිබිඹු කරයි.
ප්‍රාග්ධන පදනම සම්බන්ධයෙන්, 2026 පෙබරවාරි මාසයේදී අවසන් කරන ලද අයිතිවාසිකම් නිකුතුවක් හරහා නව කොටස් ප්‍රාග්ධනය ලෙස රු. මිලියන 1,035ක් රැස් කරගන්නා ලදී. එමගින් සමාගමේ ප්‍රාග්ධන තත්වය ශක්තිමත් කරගනිමින්, විචක්ෂණශීලී නියාමන බාපර පවත්වාගෙන යමින්ම, අනාගත ව්‍යාපාරික වර්ධනයට ශක්තිමත් වේදිකාවක් සලසා දෙන ලදී. මුළු හිමිකම් වර්ෂය අවසානයේදී රු. බිලියන 12.57ක් දක්වා ළඟා වූ අතර, ප්‍රාග්ධන ප්‍රමාණවත්භාව සහ ද්‍රවශීලතා අනුපාත නියාමන අවම මට්ටම්වලට වඩා බෙහෙවින් ඉහළින් පවතී. මුළු ප්‍රාග්ධන ප්‍රමාණවත්භාව අනුපාතය සියයට 12.50ක නියාමන අවම මට්ටමට සාපේක්ෂව සියයට 23.84ක් ලෙසත්, පවතින ද්‍රව්‍ය වත්කම් අවශ්‍ය මට්ටමට සාපේක්ෂව සියයට 485ක් ලෙසත් වාර්තා විය. ෆිච් රේටිංග්ස් ලංකා සමාගම, ස්ථාවර දැක්මක් සහිත BBB (lka) ණය ශ්‍රේණිගත කිරීමක් සමාගමට පවරා ඇත.