විමුක්ති එස් රුද්‍රිගු

ණය ගෙවීම් මාධ්‍යයේ මෙම වසරේ මැයි මාසය අවසන් වනවිට ඇමෙරිකානු ඩොලර් බිලියන 6.9 ක් වූ මෙරට දළ නිල සංචිත ප්‍රමාණය ජූනි මස අවසන් වන විට ඇමෙරිකානු ඩොලර් බිලියන 6.5 දක්වා පහළ ගොස් ඇතැයි ශ්‍රී ලංකා මහ බැංකුවේ නවතම දත්ත වාර්තා පෙන්වා දුන්නේය.

මෙරට ඇමෙරිකානු ඩොලර් බිලියන 6.5 දළ නිල සංචිත ප්‍රමාණයට චීන මහජන බැංකුව සමග වන ඇමෙරිකානු ඩොලර් බිලියන 1.4 ක පමණ විදේශ විනිමය හුවමාරු පහසුකමද ඇතුළත් වේ. එහෙත් එම හුවමාරු පහසුකම භාවිත කිරීමට නම් ශ්‍රී ලංකාව සතුව මාස තුනක ආනයනවලට ප්‍රමාණවත් දළ නිල සංචිත ප්‍රමාණයක් තිබිය යුතුය.

චීන මහජන බැංකුව සමග ඇති ඩොලර් බිලියන 1.4ක විදේශ විනිමය හුවමාරු පහසුකම භාවිත කළ හැක්කේ, එම හුවමාරුව ගණන් නොගෙන ශ්‍රී ලංකාවේ දළ නිල සංචිත පසුගිය වසරේ ආනයන සඳහා මාස තුනක ආවරණය ඉක්මවා ඇති විට පමණි. මෙම වසරේ මැයි මාසය අවසන් වනවිට මෙරට සතුව මාස 3.5 සඳහා වන දළ නිල සංචිත ප්‍රමාණයක් තිබූ අතර, එය ජුනි මාසය අවසන් වන විට මාස 3.2 දක්වා අඩුවී ඇත.