• SME වෙත ජාත්‍යන්තරයේ තරගකිරීමට මගපෙන්වීම ලබා දීම අරමුණයි 

ශ්‍රී ලංකා අපනයන සංවර්ධන මණ්ඩලය (EDB) සිය ExpoScaleUp හි තෙවැනි අදියර ආරම්භ කර ඇතැයි පවසයි. ජාත්‍යන්තර මූල්‍ය සංස්ථාව (IFC) සමග එක්ව සහ යුරෝපා සංගමයේ (EU) සහාය ඇතිව දකුණු ආසියාවේ දේශගුණික හිතකාමී සහ ඇතුළත් යටිතල පහසුකම් වේගවත් කිරීමේ (ACSIIS) වැඩසටහන යටතේ එම මණ්ඩලය මෙය ක්‍රියාත්මක කරයි. 
මෙම ප්‍රමුඛතම වැඩසටහන සැලසුම් කර ඇත්තේ ශ්‍රී ලාංකික සුළු හා මධ්‍ය පරිමාණ ව්‍යවසායකයන්ට (SMEs) ජාත්‍යන්තර වෙළෙඳපොළේ තරග කිරීමට සහ වර්ධනය වීමට අවශ්‍ය මගපෙන්වීම ලබා දීම සඳහාය. 
දින හතරක තීව්‍ර පුහුණු වැඩසටහනක් ලෙස ක්‍රියාත්මක වූ මෙයට දිවයින පුරා විසිරී සිටින ඉහළ විභවයක් සහිත සුළු හා මධ්‍ය පරිමාණ ව්‍යවසායකයෝ 25 දෙනෙක් සහභාගී වූහ. 
ප්‍රායෝගික හා වෙළෙඳපොළ ඉලක්ක කරගත් අපනයන අලෙවිකරණ සැලසුම්  (Export Marketing Plans) සකස් කිරීමෙන් ඔවුන්ගේ අපනයන සූදානම ශක්තිමත් කිරීම මෙහි ප්‍රධාන අරමුණ විය. 
සහභාගිවන්නන් හට නෙදර්ලන්තයේ ජාත්‍යන්තරව පිළිගත් අපනයන අලෙවිකරණ විශේෂඥයකුගෙන් සහ EDB පුහුණු කණ්ඩායමෙන් විශේෂඥ මගපෙන්වීම් හිමි විය. 
2025 ජනවාරි මාසයේ ආරම්භ කළ දින සිට ExpoScaleUp වැඩසටහන මගින් මේ වන විට කණ්ඩායම් දෙකක් අවසන් කර ඇති අතර, එමගින් ව්‍යවසාය 50 කට සහාය ලබා දී ඇත. 
මෙම වැඩසටහන හරහා දැනටමත් සමාගම් පහක් ඔවුන්ගේ ප්‍රථම අපනයන ඇණවුම් ලබාගෙන ඇති අතර, තවත් සමාගම් 38 කට ජාත්‍යන්තරව පිළිගත් සහතික ලබා ගැනීමට සහ විදේශීය වෙළෙඳපොළ නිරාවරණ කටයුතුවලට සහභාගී වීමට සහාය ලබා දී ඇත. 
මෙහි සමාරම්භක උත්සවයේදී අදහස් දක්වා ඇති ශ්‍රී ලංකා අපනයන සංවර්ධන මණ්ඩලයේ සභාපති මංගල විජේසිංහ මහතා, ව්‍යවසායකයන්ට අපනයන විභවයේ සිට අපනයන සාර්ථකත්වය දක්වා ගමන් කිරීමට ExpoScaleUp වැනි වැඩසටහන් අත්‍යවශ්‍ය වන බව පවසා තිබේ.