ශ්‍රී ලංකාවේ ප්‍රමුඛතම බැංකු මූල්‍ය ආයතනයක් වන SDB බැංකුව, 2026 LankaPay Technnovation සම්මාන උළෙලේදී විශේෂ ඇගයීමට ලක් විය. එහිදී බැංකුවේ ප්‍රමුඛතම ඩිජිටල් ගෙවීම් විසඳුම වන UPay, “පාරිභෝගික ගෙවීම් සඳහා වන හොඳම ඩිජිටල් ගෙවීම් යෙදුම”‍ යන කාණ්ඩය යටතේ කුසලතා සම්මානයෙන් පිදුම් ලැබීය. මෙම සම්මානය, ඩිජිටල් මූල්‍ය සේවා ප්‍රවර්ධනය කිරීම සහ ලංකාව පුරා සිටින පෞද්ගලික බැංකු ගනුදෙනුකරුවන් සඳහා ආරක්ෂිත සහ පහසු ගෙවීම් විසඳුම් ලබා දීමට බැංකුව දක්වන කැපවීම මැනවින් පිළිබිඹු කරයි.
මූල්‍ය තාක්ෂණ ක්ෂේත්‍රයේ නවෝත්පාදන ඇගයීම සහ විශේෂයෙන්ම ඩිජිටල් ගෙවීම් විසඳුම් දිරිමත් කිරීම අරමුණු කරගනිමින් LankaPay Technnovation සම්මාන උළෙල සංවිධානය කරනු ලබයි. ආරක්ෂිත සහ පහසු පරිශීලක අත්දැකීමක් ලබා දීම කෙරෙහි අවධානය යොමු කරන UPay ඩිජිටල් විසඳුම, කාර්යක්ෂම ගෙවීම් ක්‍රමවේද අපේක්ෂා කරන ගනුදෙනුකරුවන්ට විශ්වාසනීය වේදිකාවක් සපයමින් ලංකාවේ ඩිජිටල් මූල්‍ය ප්‍රවේශය තවදුරටත් ශක්තිමත් කරයි.
මෙම ජයග්‍රහණය පිළිබඳව අදහස් දක්වමින් SDB බැංකුවේ ප්‍රධාන තොරතුරු සහ ඩිජිටල් නිලධාරී දිනේෂ් තෝමස් මහතා මෙසේ ප්‍රකාශ කළේය. “2026 LankaPay Technnovation සම්මාන උළෙලේදී මෙම ඇගයීමට පාත්‍ර වීම අපට මහත් ගෞරවයක්. මෙය අපගේ කණ්ඩායමේ කැපවීම මෙන්ම ලංකාවේ ඩිජිටල් මූල්‍ය සේවා ඉහළ නැංවීමට අප දරන අඛණ්ඩ උත්සාහයේ ප්‍රතිඵලයක්. ගනුදෙනුකරුවන්ට බාධාවකින් තොර සහ ආරක්ෂිත ගෙවීම් අත්දැකීමක් ලබා දීම සඳහාම නිර්මාණය කර ඇති UPay, එදිනෙදා ගනුදෙනු වඩාත් පරෙස්සමෙන් සහ පහසුවෙන් සිදු කිරීමට මග පාදයි. මෙම සම්මානය ඩිජිටල් නවෝත්පාදන ඔස්සේ පෙරමුණ ගැනීමට අප සතු මෙහෙවර තවදුරටත් තහවුරු කරයි.”‍
මෙම සම්මානය හරහා ලංකාවේ මූල්‍ය තාක්ෂණ ක්ෂේත්‍රයේ ප්‍රමුඛයකු ලෙස SDB බැංකුව තවදුරටත් ස්ථාපිත වී ඇති අතර, පෞද්ගලික සහ ඩිජිටල් ගෙවීම් අංශවල විකාශනය වන ඉල්ලු‍මට සරිලන පරිදි ගනුදෙනුකාර - කේන්ද්‍රීය සහ ඉදිරිගාමී විසඳුම් ලබා දීමට බැංකුව සතු හැකියාව මින් මනාව ප්‍රදර්ශනය වේ.