විමුක්ති එස් රුද්‍රිගු
ශ්‍රී ලාංකිකයන් මේ වනවිට බී.වයි.ඩී විද්‍යුත් හා දෙමුහුම් මෝටර් රථ 5000 ක් ඇණවුම් කර තිබෙන බවත් චීනයෙන් එම නැව්ගත කිරීම් ලැබෙන පිළිවෙළට එම ඇණවුම් මුදා හරින බවත් බී.වයි.ඩී’ සමාගමේ මෙරට නියෝජිත ජෝන් කීල්ස් සමූහයේ ප්‍රධාන විධායක නිලධාරී ක්‍රිෂාන් බාලේන්ද්‍ර මහතා පෙරේදා (27) ප්‍රකාශ කළේය.
බලාපොරොත්තු වූ මට්ටමට වඩා බී.වයි.ඩී’ විද්‍යුත් හා දෙමුහුම් මෝටර් රථ සඳහා ඉල්ලු‍මක් තිබෙන බවත් මෙරට වර්තමානයේ තිබෙන මෝටර් රථ මාදිලිවලට අමතරව තවත් මාදිලි 6 ඉදිරියේදී හඳුන්වා දීමට බලාපොරොත්තු වන බවත් බාලේන්ද්‍ර මහතා පැවැසුවේය.

ආරම්භයේදී බී.වයි.ඩී සීලයන් 6 මෝටර් රථය සඳහා අධික ඉල්ලු‍මක් තිබූ බවත් නමුත් මේ වනවිට පොදුවේ සියලු‍ම විද්‍යුත් මෝටර් රථවලට තිබෙන ඉල්ලු‍ම ඉහළ ගොස් තිබෙන බවත් ඔහු ප්‍රකාශ කළේය. බාලේන්ද්‍ර මහතා වැඩි දුරටත් අදහස් දක්වමින් ප්‍රකාශ කර සිටියේ සිනමන් ලයිෆ් හෝටලය වෙනුවෙන් මෙරටට අලු‍තින් හඳුන්වා දෙන ඩෙන්සා සුඛෝපභෝගී මෝටර් රථ 7 ක් දැනමටත් ලබාගෙන තිබෙන බවයි.
බී.වයි.ඩී ශාර්ක් 6 මෝටර් රථය මෙරට වෙළෙඳපොළට හඳුන්වාදීම සඳහා සිනමන් ලයිෆ් හෝටලයේදී පෙරේදා (27) පැවැති මාධ්‍ය හමුවේදී ඔහු මෙම අදහස් පළ කළේය.එහිදී බී.වයි.ඩී සමාගම මෑතකදී අත්පත් කරගත් ඩෙන්සා සුඛෝපභෝගී මෝටර් රථ සන්නාමය මෙරටට හඳුන්වාදීම සඳහා වන අවබෝධතා ගිවිසුමටද දෙපාර්ශවය අත්සන් තැබුවේය.
එහිදී අදහස් දක්වමින් බී.වයි.ඩී සමාගමේ ආසියා ශාන්තිකර කලාපයේ සාමාන්‍යාධිකාරී ලී සුවෙලින් මහතා ප්‍රකාශ කර සිටියේ මේ වනවිට චීනයේ බී.වයි.ඩී වාහන දැවැන්ත ලෙස මිල අඩු කරමින් ක්‍රියාත්මක වන ප්‍රවර්ධන වැඩසටහන ශ්‍රී ලංකාවට අදාළ නොවන බවයි.