භානුක අමරසිංහ

මෙරට ප්‍රමුඛතම සෞඛ්‍ය සත්කාරක සේවා සමාගමක් වන හේමාස් හෝල්ඩිංග්ස් සමාගමේ ජාතික දිගුකාලීන ණය ශ්‍රේණිගත කිරීම, ස්ථාවර ඉදිරි දැක්මක් සහිතව AAA(lka) මට්ටම ලෙස තහවුරු කරන බව ණය ශ්‍රේණිගත කිරීමේ ආයතනයක් වන ෆිච් රේටින්ග්ස් ලංකා ආයතනය පවසයි. 

ඒ අනුව හේමාස් සමාගමෙහි සෞඛ්‍ය සත්කාර සේවා සහ පාරිභෝගික භාණ්ඩ ව්‍යාපාරය මගින් ලබාදෙන මූල්‍ය ප්‍රවාහය සතු ආරක්ෂිත බව මෙම ශ්‍රේණිගත කිරීම මගින් පෙන්නුම් කරන බව එම ආයතනය පෙන්වා දෙයි. අද වනවිට හේමාස් සමූහයෙහි පොලී සහ බදු පෙර ආදායම් අතරින් සියයට 90ක්ම මෙම ව්‍යාපාර අංශ හරහා හිමි වෙයි. එසේම ස්ථාවර ඉදිරි දැක්ම මගින් සමාගම වෙත වඩාත් ශක්තිමත් ශේෂ පත්‍රයක් පවත්වාගෙන යාමට සහයෝගයක් ලබා දෙනු ඇතැයිද එම ආයතනය අපේක්ෂා කරයි. විශේෂයෙන්ම ගත වූ වසර කිහිපයේදී පැවැති ආනයන අභියෝග නිසා කුඩා සමාගම් වෙත එල්ල වූ බලපෑම හේතුවෙන් තරගකාරීත්වයේ ඇති වූ පහළ වැටීම හේමාස් සමාගම වෙත තවදුරටත් ඖෂධ ආනයනය සහ බෙදාහැරීමේ ප්‍රමුඛයා ලෙස කටයුතු කිරීමට අවස්ථාව   හිමිවනු ඇති බව අපේක්ෂාව බවත් ෆිච් රේටින්ග්ස් වැඩිදුරටත් පවසයි.