චීනයේ සිචුවාන් විශ්ව විද්‍යාලයේ ජ්‍යෙෂ්ඨ නියෝජිත පිරිසක් පසුගිය දා මෙරටට පැමිණි අතර පෑලියගොඩ පිහිටි පාත්ෆයින්ඩර් පදනම මුලස්ථානයට පැමිණ එහි දී සාකච්ඡාවකට සහභාගී වූහ. 2017 වසරේ සිට සිචුවාන් විශ්ව විද්‍යාලයේ දකුණු ආසියානු අංශය පාත්ෆයින්ඩර් පදනම සමග සම්බන්ධ වී කටයුතු කරන අතර තෝරාගත් අංශවල දී ඒකාබද්ධ පර්‌යේෂණ හා අධ්‍යයන පැවැත්වීම සඳහා ගිවිසුමක් 2023 වසරේ දී අත්සන් කරනු ලැබීය.

විශ්ව විද්‍යාලයේ ජාත්‍යන්තර අධ්‍යයන අංශයේ පීඨාධිපති මහාචාර්ය දියැන්ග් ෂුන්ගැයි මහතා ගේ ප්‍රධානත්වයෙන් යුතු නියෝජිත පිරිස මෙහි දී සංවර්ධනය, ආර්ථික වර්ධනය හා වෙළෙඳාම යන ක්ෂේත්‍ර සම්බන්ධයෙන් දෙරට අතර විද්වතුන් නියෝජනය කරන සම්මන්ත්‍රණ කිහිපයක් කෙළඹ දී පැවැත්වීමට තීරණය කර තිබේ. චීනය ක්‍රියාත්මක කරන එක මාවතක් එක තීරයක් වැඩසටහන සම්බන්ධයෙන් ස්වාධීන අධ්‍යයනයක් කෙරෙහි ද මෙහි දී අවධානය යොමු කර ඇත. පාත්ෆයින්ඩර් පදනමේ සභාපති බර්නාඩ් ගුණතිලක මහතා ඇතුළු කණ්ඩායම සිචුවාන් නියෝජිත පිරිස සමග සාකච්ඡා කරන ලද අවස්ථාව මෙහි දැක්වේ.