ශ්‍රී ලංකාවේ අත්යන්ත්‍ර සහ යාන්ත්‍රීකරණය කරන ලද රෙදි විවිමේ කර්මාන්තයේ නිර්මාණ ශිල්පීන් 30 දෙනෙක් විශේෂ රෙදිපිළි පුහුණු සහ ධාරිතා සංවර්ධන වැඩසටහනකට සහභාගී වීමට පසුගියදා ඉන්දීය සංචාරයක නිරත වූහ. ශ්‍රී ලාංකේය වෘත්තිකයන් සඳහා වාර්ෂිකව විශේෂයෙන් සකසන ලද පුහුණු අවස්ථා 700ක් පිරිනමන බවට 2025 අප්‍රේල් මාසයේ ඉන්දීය අග්‍රාමාත්‍ය ශ්‍රී නරේන්ද්‍ර මෝදි මහතා විසින් සිදු කරන ලද ප්‍රකාශය අනුව මෙම වැඩසටහන සංවිධානය කරන ලදී. 
සතියක් පුරා පැවති මෙම පුහුණු වැඩසටහන ඉන්දීය රජය විසින් තමිල්නාඩුවේ කොයිම්බතූර්හි රෙදිපිළි සහ කළමනාකරණය පිළිබඳ සර්දාර් වල්ලාභායි පටෙල් ජාත්‍යන්තර පාසලේදී පවත්වන ලදී. රෙදි විවීම, නවීන නිර්මාණකරණ තාක්ෂණය, අලෙවිකරණය සහ නායකත්වය පිළිබඳ මොඩියුල ඇතුළු සමස්ත රෙදිපිළි අගය දාමය ආවරණය කරමින් පුළුල් තාක්ෂණික සහ අදාළ තේමාවලට අනුකූල සැසි රැසක් මෙම වැඩසටහන යටතේ පැවැත්විණ. ප්‍රායෝගික කුසලතා වැඩි දියුණු කිරීම, කර්මාන්තය සම්බන්ධයෙන් වැඩිදුර අත්දැකීම් ලබා දීම සහ නිර්මාණකරණය සහ නිෂ්පාදනය සම්බන්ධයෙන් හැකියාව ඉහළ නැංවීම යනාදිය අරමුණු කර ගෙන මෙම සැසි පවත්වන ලදී. 

අත්දැකීම් ඇසුරින් ඉගෙන ගැනීම සඳහා සහභාගීවන්නන්ට අවස්ථාව හිමි වූ අතර ඒ අනුව ප්‍රධාන පෙළේ ආයතන සහ කර්මාන්තශාලා වෙත ක්ෂේත්‍ර චාරිකා ද සංවිධානය කර තිබිණ. මෙම නියැළීම් තුළින් නූතන රෙදිපිළි පරිසර පද්ධති, නිෂ්පාදන තාක්ෂණය, නිර්මාණ සංවර්ධනය සහ නවීන සිල්ලර වෙළෙඳ පරිසරය යනාදිය සම්බන්ධයෙන් වටිනා දැනුම් සම්භාරයක් ලබා දෙන ලදී. 
වෘත්තීය කුසලතා සංවර්ධනයට අමතරව මෙම වැඩසටහනෙන් දූත පිරිසට ඉන්දියාවේ රෙදිපිළි ක්ෂේත්‍රයේ නවෝත්පාදන, කර්මාන්තයේ මනා පිළිවෙත් සහ ක්ෂේත්‍රයේ සහයෝගීතාවට පවතින අවස්ථා සම්බන්ධයෙන් ද මනා අවබෝධයක් ලබා දෙන ලදී. 
ශ්‍රී ලංකාවේ රෙදිපිළි නිර්මාණ ශිල්පීන් සඳහා පවත්වන ලද මෙම විශේෂ පුහුණු වැඩසටහන වෘත්තීය නිපුණතා ශක්තිමත් කිරීමට, දැනුම බෙදා හදා ගැනීම් දිරි ගැන්වීමට සහ ඉන්දියාව සහ ශ්‍රී ලංකාව අතර රෙදිපිළි ක්ෂේත්‍රයේ ආයතනික සබඳතා ගැඹුරු කිරීමට අර්ථවත් දායකත්වයක් ලබා දුන්නේය.