ව්‍යාපාරික ප්‍රජාව තුළ දීප්තිමත් ආර්ථිකයක් පිළිබඳ බලාපොරොත්තු පසුගිය මාසය සමග සංසන්දනය කිරීමේදී පහත වැටී ඇතැයි මෙරට ප්‍රමුඛ පෙළේ ව්‍යාපරික සඟරාවක් වන එල්.එම්.ඩී මැයි සංස්කරණය පවසයි.

මෙරට ව්‍යාපාරික කවයන් තුළ ආර්ථිකය පිළිබඳ මෘදු ඉදිරි දර්ශනයක් තිබෙන බව පෙපර් කියුබ් උපදේශකයන් වාර්තා කිරීමත් සමග සැලකිය යුතු ලෙස පරෙස්සම් සහගත ආර්ථික සහ ව්‍යාපාරික දැක්මක් සමාගම් තුළ ස්ථාපිත වී ඇතැයි එල්.එම්.ඩී සඟරාව ප්‍රකාශ කළේය. එයට හේතුව පසුගිය අප්‍රේල් මාසයේදී මෙරට ව්‍යාපාර විශ්වාසනීය දර්ශකයේ පහළ යෑම බවද එම සඟරාව පැවැසුවේය.

එල්.එම්.ඩී. සහ පෙපර් කියුබ් ව්‍යාපාර විශ්වශනීය දර්ශකයේ නවතම සමීක්ෂණය පසුගිය අප්‍රේල් මාසයේ මුල් සතියේදී පැවැත්වුණු බවත්, එයට සහභාගී වූවන්ගෙන් වැඩි පිරිස ඉදිරි මාස 12 දී මෙරට ආර්ථිකය වැඩි දියුණු වනු ඇතැයි අපේක්ෂා කළ බවත් එම සඟරාව ප්‍රකාශ කළේය.  කෙසේ වෙතත් පෙර සමීක්ෂණයට සාපේක්ෂව නව සමීක්ෂණයේදී ඉදිරි මාස 12 ක කාලයේදී මෙරට ආර්ථිකය වැඩි දියණු වනු ඇතැයි අපේක්ෂා කරන ව්‍යාපාරික ප්‍රජාව සියයට 73 සිට 66 දක්වා සියයට 7 කින් පහළ ගොස් ඇතැයි එල්.එම්.ඩී. මැයි සංස්කරණය පැවැසුවේය.

එසේම සහභාගී වූවන්ගෙන් සියයට 25 ක් ඉදිරි මාස 12 තුළදී මෙරට ආර්ථිකය නොවෙනස්ව පවතිනු ඇතැයි විශ්වාස කරන බවත්, එය පෙර සමීක්ෂණයට සාපේක්ෂව සියයට 6 ක ඉහළ යාමක් බවත් එම සඟරාව ප්‍රකාශ කළේය. සහභාගී වූවන්ගෙන් 10 දෙනෙක්ගෙන් එක් අයෙක් පමණ ඉදිරි මාස 12 තුළදී මෙරට ආර්ථිකය නරක අතට හැරෙනු ඇතැයි අපේක්ෂා කරන බවත්, එය පෙර සමීක්ෂණයට සාපේක්ෂව ඉහළ යාමක් බවත් එල්.එම්.ඩී. සඟරාව පැවැසුවේය.

මෙරට ආර්ථිකය පිළිබඳ දරණ මතය අලෙවිකරණ ප්‍රජාව අතරද යම්තාක් දුරකට පහළ ගොස් ඇති බවත් ඉදිරි මාස 12 ක කාලයේදී සිය සමාගමේ විකුණුම් පරිමාව ඉහළ යනු ඇතැයි විශ්වාස කරන්නේ සහභාගී වූ විධායක නිලධාරීන්ගෙන් සියයට 78 ක් පමණක් බවත් එය පෙර සමීක්ෂණයට සාපේක්ෂව සියයට 6 ක පහළ යාමක් බවත් එල්.එම්.ඩී සඟරාව ප්‍රකාශ කළේය.