භානුක අමරසිංහ

කොළඹ කොටස් හුවමාරුවේ ලැයිස්තුගත පුනර්ජනනීය බලශක්ති සමාගමක් වන විදුල්ලංකා පීඑල්සී සමාගම සිදු කිරීමට සැලසුම් කර ඇති රුපියල් මිලියන 500ක් වටිනා සුකුක් නිකුතුව (Sukuk Issuance) සඳහා A+(lka) අවසන් ජාතික දිගුකාලීන ශ්‍රේණිගත කිරීමක් ලබා දෙන බව ෆිච් රේටින්ග්ස් ලංකා ආයතනය පවසයි. 
එසේම මෙය එම සමාගම වෙත ලබා දී ඇති ජාතික දිගුකාලීන ශේණිගත කිරීමට සමාන මට්ටමක් බවත් එම ආයතනය සඳහන් කරයි. විදුල්ලංකා පීඑල්සී සමාගම මේ වසරේ ජනවාරි 03 සිදු කළ අනාවරණයකට අනුව මෙම සුකුක් නිකුතුව පිළිබඳව සඳහන් කර තිබුණි. එහිදී වසර පහක කාලයක් සඳහා වන ලැයිස්තුගත, වර්ගකෙරුණු, සුරක්ෂිත, පිරිමුදවාගත හැකි රුපියල් මිලියන 500ක් වටිනා සුකුක් නිකුතුවක් සිදු කිරීම සැලසුම වී තිබේ. සුකුක් නිකුතුවක් යනු ඉස්ලාමිය මූල්‍ය සහතිකකරණයක් වන අතර, එය ෂරියා නීතියට අනුකුල බැඳුම්කර ලෙසින්ද සැලකෙයි. මෙම නිකුතුව හරහා රැස් කරගන්නා මුදල් විදුල්ලංකා සමාගමෙහි කෙටිකාලීන ණය ප්‍රතිමූල්‍යයනය කිරීම සඳහා සහ කාරක ප්‍රාග්ධන අවශ්‍යතා සඳහාත් යොදා ගැනීමට නියමිතව තිබේ.