භානුක අමරසිංහ 

මෙරට ජාතික ගෙවීම් ජාලය වන ලංකාපේ මගින් 2024 වසර තුළදී සිදුකළ ගනුදෙනුවල වටිනාකම රුපියල් ට්‍රිලියන 34ක් වන බව එහි ප්‍රධාන විධායක නිලධාරී චන්නද සිල්වා මහතා පවසයි. ඒ අනුව මෙම වටිනාකම මෙරට දළ ජාතික නිෂ්පාදිතයට වඩා වැඩි අගයක් බවත් ඔහු සඳහන් කරයි. 

ලබන සැප්තැම්බර් මාසයේදී පැවැත්වෙන මෙරට පළමු ෆින්ටෙක් සමුළුව සම්බන්ධයෙන් පැවැති මාධ්‍ය හමුවේදී ඒ මහතා මේ පිළිබඳව අනාවරණය කළේය. 

“ඒ වගේම 2024 වසරේදී ලංකාපේ ආයතනය සිදු කළ තත්‍ය-කාල ගනුදෙනු (රියල්-ටයිම් ට්‍රාන්ස්ඇක්ෂන්ස්) ප්‍රමාණය රුපියල් ට්‍රිලියන 17ක්. එය මෙරට දළ ජාතික නිෂ්පාදිතයෙන් සියයට 50කට අධිකයි.“ 

ඒ අනුව අද වන විට රට තුළ මෙම ඩිජිටල් ගනුදෙනුවල සාර්ථක ප්‍රවණතාවක් පවතින බවත් ඒ මහතා පවසයි.

කෙසේ වෙතත් මෙම ඩිජිටල් තාක්ෂණය නාගරිකව ක්‍රියාත්මක සමාගම් අතර, භාවිත වන බවත්, ගැටලු‍ව වන්නේ මෙම තාක්ෂණය සිල්ලර වෙළෙඳාම සහ ග්‍රාමීය ප්‍රදේශය වෙත ව්‍යාප්ත නොවීම බවත් ඒ මහතා පෙන්වා දෙයි. 

“ලංකාවේ මිලියන 22ක් පමණ වන ජනගහනෙයන් සියයට 80ක්ම ග්‍රාමීයව වාසය කරන්නේ. ඩිජිටල් ක්‍රමය හරහා ඔවුන් වෙත ළඟා වීම තමයි අභියෝගය. එතැනදී තමයි මේ ෆින්ටෙක් සමාගම්වල දායකත්වය අවශ්‍ය වෙන්නේ’’ ඒ මහතා වැඩිදුරටත් සඳහන් කළේය. 

ඡායාරූපය - ප්‍රදීප් පතිරණ