• මැන්ඩරින් ආනයනයෙන් රුපියල් මිලියන 225 ක ආදායමක්
• මෙම වසරේ ආදායම් ඉලක්කයෙන් සියයට 47.3 ක් මේ වනවිටත් සපුරා අවසන්

විමුක්ති එස් රුද්‍රිගු

බදුවලින් බේරීම සඳහා ඇතැම් වෙළෙඳුන් දෙමුහුම් මැන්ඩරින්ද, දෙමුහුම් නොවන මැන්ඩරින් ආනයනය කරන එච්.එස් කේතය යටතේ ආනයනය කරන බව සොයා ගැනීමත් සමග මැන්ඩරින් ආනයනයෙන් රුපියල් මිලියන 225ක ආදායමක් උපයා තිබෙන බව ශ්‍රී ලංකා රේගුව පසුගියදා ප්‍රකාශ කළේය.

එලෙස බදුවලින් බේරෙන අවස්ථා හඳුනාගැනීමත්, මෙරට ආනයනයන් ඉහළ යාමත් හේතුවෙන් පසුගිය 3 වැනිදා රුපියල් ට්‍රිලියනයේ ආදායම් ඉලක්කය පසුකළ බවත්, පසුගිය වසරේදී රුපියල් ට්‍රිලියන ආදායම් ඉලක්කය පසුකර යාමට මාස 9 ක කාලයක් ගතවූ බවත් ශ්‍රී ලංකා රේගුව පැවැසුවේය. මෙම වසරේදී රුපියල් බිලියන 2115 ක් ආදායම් ඉලක්කයක් රජය ලබාදී තිබෙන බවත්, එම ඉලක්කයෙන් සියයට 47.3 ක් මේ වනවිටත් සපුරා අවසන් බවත් ශ්‍රී ලංකා රේගුව ප්‍රකාශ කළේය.

මෙම වසරේ ඉලක්කය සපුරා ගැනීම සඳහා පසුගිය 3 වැනිදා වනවිට ඉපැයිය යුතු ආදායමට වඩා රුපියල් බිලියන 50 අදායමක් උපයා තිබෙන බවත්, ඒ හේතුවෙන් මෙම වසරේ ආදායම් ඉලක්කය සපුරා ගැනීමට හැකිවනු ඇති බවට දැඩි විශ්වාසයක් තිබෙන බවත් ශ්‍රී ලංකා රේගුව පැවැසුවේය.

රජයේ බදු ආදායමෙන් සියයට 40 කට පමණ ශ්‍රී ලංකා රේගුව අතීතයේ සිට දායකත්වය ලබාදුන් අතර 2019 වසරේ සිදු කළ බදු කප්පාදුව සමග ශ්‍රී ලංකා රේගුවේ ආදායම සැළකිය යුතු මට්ටමකින් පහළ ගියේය.