අප්‍රිකාවේ විශාලතම ජාත්‍යන්තර වෛද්‍ය සහ සෞඛ්‍ය සේවා වෙළෙඳ ප්‍රදර්ශනය ලෙස සැලකෙන මෙඩ් එක්ස්පෝ 2025’ පසුගිය 14 වැනිදා 16 දක්වා කෙන්යාවේ නයිරෝබි අගනුවර සාරිට් ප්‍රදර්ශන මධ්‍යස්ථානයේ පැවැත්වුණු අතර, ශ්‍රී ලංකා නාමය ජාත්‍යන්තරයට ගෙන යමින්, ශ්‍රී ලංකාවේ අභිමානය කියා පාමින්, යැඩන් ලැබෝරටරීස්’ ඖෂධ නිෂ්පාදන සමාගම ද ඊට සහභාගී විය.

මෙම ප්‍රදර්ශනය, කෙන්යා සෞඛ්‍ය අමාත්‍යාංශය සමඟ සහයෝගයෙන් සංවිධානය කර තිබුණු අතර, නයිරෝබි නගර සභාව, කෙන්යා ඖෂධවේදීන්ගේ සංගමය, කෙන්යා පෞද්ගලික රෝහල් සංගමය සහ කෝපරේට් අප්‍රිකා සන්ධානය ඇතුළු තවත් බොහෝ පාර්ශවකරුවෝ ඊට එක් වී සිටියහ.

ප්‍රදර්ශනයට 120 කට අධික පිරිසක් සහභාගී වූ අතර, 7,000 කට වැඩි නරඹන්නන් පිරිසක් පැමිණි බව ද පැවැසෙයි. ශ්‍රී ලංකාවට අමතරව, කැනඩාව, චීනය, ඉන්දියාව සහ ප්‍රංශය ඇතුළු රටවල් 30 කට වැඩි ගණනකින් ප්‍රදර්ශකයෝ ඊට සහභාගී වූහ.

නැගෙනහිර අප්‍රිකානු කලාපය පුරා, ඖෂධ සඳහා, ගුණාත්මක සැපයුම්කරුවන් සොයන ගැනුම්කරුවන්ගේ බොහෝ දෙනකුගේ අවධානයි යැඩන් ලැබෝරටරීස්’ සඳහා යොමු වීම විශේෂත්වයක් විය. 

යැඩන් ලැබෝරටරීස්’ කණ්ඩායම මෙහෙයවනු ලැබුවේ ශ්‍රී ලාංකීය ඖෂධ ක්ෂේත්‍රයේ ප්‍රධානියකු වන යැඩන් ලැබෝරටරීස්’ කළමනාකාර අධ්‍යක්ෂ ශෂිමාල් දිසානායක මහතා විසිනි. 

ශෂිමාල් දිසානායක මහතාගේ දැක්ම, ශ්‍රී ලංකාව ඖෂධ සම්බන්ධයෙන් ස්වයංපෝෂිත කිරීම සහ අපගේ අසල්වැසි ඉන්දියාව සහ පිළිවෙළින් සියයට 98 සහ සියයට 70 ක ස්වයංපෝෂිත කර්මාන්තයක් ඇති බංග්ලාදේශය සහ පකිස්ථානය වැනි රටවලට සමානව දේශීය ඖෂධ නිෂ්පාදන කර්මාන්තය අපනයන ඉලක්ක කරගත් උපාය මාර්ග වෙත යොමු කිරීම යැයි පැවැසෙයි. ඉන්දියාව සැලකෙන්නේ ලෝකයේ ඔසුහල’ යන නමිනි. 

මේ වනවිට ශ්‍රී ලංකාව, ඖෂධවල ශුද්ධ ආනයනකරුවකු වන අතර දේශීය කර්මාන්තය සපයන්නේ සියයට 15 ක පමණ ස්වයංපෝෂිතතාවකි. ‘යැඩන් ලැබෝරටරීස්’ මෙරටට සැලකිය යුතු විදේශ විනිමය සංචිත ඉතිරි කරන අතර, රටේ ආර්ථිකය නංවාලීම සඳහා අපනයන ඉලක්ක කරගත් උපාය මාර්ගයක් හරහා තවත් සංචිත උත්පාදනය කිරීම ඔවුන්ගේ ඉලක්කයයි.