මහජන බැංකුව, Satynmag Women Friendly Workplace Awards 2025 සම්මාන උළෙලේදී ශ්‍රී ලංකාවේ කාන්තාවන්ට වඩාත් හිතකරම සේවා ස්ථානයක් ලෙස නැවත වරක් ඇගයීමට ලක්විය. මෙම සම්මාන උළෙල පසුගියදා කොළඹ, අමාරි හෝටල් පරිශ්‍රයේදී පැවැත්විණි.
මෙම සම්මානය මහජන බැංකුවට හිමිවූයේ අඛණ්ඩව පස්වැනි වරට වන අතර, මේ තුළින් ශ්‍රී ලංකාව තුළ ධනාත්මක වෙනසක් ඇති කරමින්, ස්ත්‍රී පුරුෂ සමානාත්මතාව සහිත ආයතනික සංස්කෘතියක්  පෝෂණය කිරීම වෙනුවෙන් සිය ස්ථිරසාර කැපවීම නැවතත් තහවුරුවී ඇත. එමෙන්ම නායකත්ව සංවර්ධනය, උපදේශන අවස්ථා සහ ආරක්ෂිත පරිසරය මෙන්ම එකිනෙකා කෙරෙහි සහයෝගය දක්වන සේවා වටපිටාවක් සහතික කිරීම සඳහා වන බැංකුවේ භාවිතයන් හා ප්‍රතිපත්ති මෙම සම්මානය මගින් නැවතත් පිළිබිඹු වේ. මහජන බැංකුවේ සමස්ත කාර්ය මණ්ඩලයෙන් සියයට 60ක්  කාන්තාවන්ගෙන් සමන්විත වන අතර, බැංකුකරණයට අදාළ විවිධ ක්ෂේත්‍රවල ඉදිරියට යාම සඳහා මහජන බැංකුව ඔවුන්ව නිරන්තරයෙන් සවිබල ගන්වයි.
මේ අවස්ථාවට මහජන බැංකුවේ ප්‍රධාන විධායක නිලධාරි/සාමාන්‍යාධිකාරි ක්ලයිව් ෆොන්සේකා, නියෝජ්‍ය සාමාන්‍යාධිකාරිනි (ගෙවීම් සහ කාඩ්පත්)/ (ක්‍රමෝපාය සැලසුම්, කාර්යසාධන කළමනාකරණ හා පර්යේෂණ (වැඩබලන) නිල්මිණි ප්‍රේමලාල්, නියෝජ්‍ය සාමාන්‍යාධිකාරි (මානව සම්පත්) මංජුල දිසානායක, නියෝජ්‍ය සාමාන්‍යාධිකාරිනි (පුද්ගල කේන්ද්‍රීය බැංකු කටයුතු හා එතෙර ගනුදෙනු සේවා) අරුණි ලියණගුනවර්ධන සහ සහකාර සාමාන්‍යාධිකාරිනි (මානව සම්පත්) අමල්කා රණසිංහ යන මහත්ම මහත්මීහු එක්වූහ.