භානුක අමරසිංහ

වසර 70 කට අධික කාලයක් පුරා මෙරට බිස්කට් නිෂ්පාදන ක්ෂේත්‍රයේ ප්‍රමුඛතම සන්නාමයක් වන මැලිබන් සන්නාමය ඉන්දියානු වෙළෙඳපොළට පිවිසීමේ සූදානමකින් පසුවන බව වාර්තා පවසයි. ඉන්දියාවේ රිලායන්ස් රිටේල් සමාගම යටතේ ක්‍රියාත්මක රිලයන්ස් කන්සියුමර් ප්‍රඩක්ට්ස් ලිමිටඩ් සමාගම හා ඇති කරගත් උපායමාර්ගික හවුල්කාරීත්වයක් යටතේ මෙලෙස මැලිබන් නිෂ්පාදන ඉන්දියානු වෙළෙඳපොළ වෙත අවතීර්ණ වන බව සඳහන් වෙයි. 
මෙම පිවිසීමත් සමගින්ම මැලිබන් සමාගම කලාපයේ සිය මෙහෙයුම් තවදුරටත් පුළුල් කිරීමේ අවස්ථාවකටද පත්ව සිටින බව පවසයි. දැනටමත් මැලිබන් සන්නාමය හිමි මැලිබන් සමූහ ව්‍යාපාරය සිය නිෂ්පාදන ලොව පුරා රටවල් 40 කට වැඩි සංඛ්‍යාවකට අපනයනය කරයි. මෙලෙස ඉන්දියානු වෙළෙඳපොළ වෙත පිවිසීම එම සන්නාමය බිලියන 1.4කට අධික ජනතාවක් වාසය කරන දකුණු ආසියාවේ විශාලතම වෙළෙඳපොළ වෙත පිවිසීමක්ද සනිටුහන් කරයි.
මෙම හවුල්කාරීත්වය සම්බන්ධයෙන් අදහස් දක්වන රිලයන්ස් කන්සියුමර් ප්‍රඩක්ට්ස් හි අධ්‍යක්ෂ ටී ක්‍රිෂ්ණකුමාර් මහතා, “සුවිශේෂී උරුමය සහ විවිධාංගීකරණය වූ නිෂ්පාදන කළඹත් සමගින් එන මැලිබන් අපගේ දැක්ම වෙත උපරිම දායකත්වයක් ලබා දෙනවා’’ යනුවෙන් පවසා තිබේ. 
මේ අතර රිලයන්ස් කන්සියුමර් ප්‍රඩක්ට්ස් ලිමිටඩ් සමාගම හා ඇති කරගන්නා හවුල්කාරීත්වයක් යටතේ මැලිබන් නිෂ්පාදන ඉන්දියානු වෙළෙඳ පොළ වෙත හඳුන්වාදීමේ මූලික සාකච්ඡා 2023 වසරේදී ආරම්භවී තිබෙන බව ඉන්දියානු මාධ්‍ය සඳහන් කර තිබේ. එසේම මැලිබන් නිෂ්පාදන තායිලන්ත වෙළෙඳ පොළ වෙතත් හඳුන්වාදීම සඳහා වන සාකච්ඡාද මේ වන විට සිදු කරමින් පවතින බවද වාර්තා පවසයි.