දිවයින පුරාම මූල්‍යමය සේවා කටයුතු පුළුල් කිරීමේ සිය අඛණ්ඩ උත්සාහයේ තවත් එක් පියවරක් ලෙස මර්කන්ටයිල් ඉන්වෙස්ට්මන්ට්ස් සමාගම විසින් සිය නවතම 74 සහ 75 වැනි ශාඛා ද්විත්වය උතුරු පළාතේදී පසුගියදා විවෘත කරන ලදී. 
ඒ අනුව කිලිනොච්චිය නගරයේ A9 මාර්ගයේ අංක 151 දරන ස්ථානයේදී මර්කන්ටයිල් ඉන්වෙස්ට්මන්ට්ස්හි 74 වැනි ශාඛාව සහ පුතුකුඩියිරිප්පු නගරයේ පරන්ත පාරේ අංක 1 දරන ස්ථානයේදී ඔවුන්ගේ 75 වැනි ශාඛාව විවෘත විය. මර්කන්ටයිල් ඉන්වෙස්ට්මන්ට්ස් සමාගමේ කළමනාකාර අධ්‍යක්ෂ ජෙරාඩ් ඔන්ඩට්ජි, ප්‍රධාන මෙහෙයුම් නිලධාරී ලක්සඳ ගුණවර්ධන, ජ්‍යෙෂ්ඨ කළමනාකාරිත්වය නියෝජනය කරන සාමාජිකයෝ ඇතුළු පිරිසක් මෙම අවස්ථාවට සහභාගී වූහ.
මෙරට අවම පහසුකම් සහිත ප්‍රදේශවල සිය ශාඛා ජාලය කඩිනමින් වර්ධනය කිරීම සම්බන්ධයෙන් මර්කන්ටයිල් ඉන්වෙස්ට්මන්ට්ස් සමාගම සතු දැක්ම පිළිබඳ කදිම සාක්ෂියක් ලෙස මෙම දියත් කිරීම හැඳින්විය හැකිය. සියලු‍ම සංස්කෘතික, ආගමික මෙන්ම විවිධ සමාජ පසුබිම් නියෝජනය කරන ප්‍රජාව සඳහා සේවා සැපයීම කෙරෙහි මර්කන්ටයිල් ඉන්වෙස්ට්මන්ට්ස් වැඩි අවධානයක් යොමු කර තිබේ. 
ලීසිං, රන් ණය ස්ථාවර තැන්පතු සහ ළමා ඉතුරුම් ඇතුළු මූල්‍ය සේවා රැසක් මෙම නව ශාඛා ඔස්සේ පාරිභෝගික ජනතාව වෙත පිරිනමනු ලැබේ. මෙලෙස විවිධ පාරිභෝගික කාණ්ඩ වෙත සේවා සැලසීම ඔස්සේ ශ්‍රී ලංකාවේ ග්‍රාමීය ප්‍රදේශවල ව්‍යාපාර සහ පුද්ගලයන් අතර තිරසාර සංවර්ධනයක් ඇති කිරීම මෙම සමාගමේ පරමාර්ථයයි.
එමෙන්ම සාර්ථක නව්‍ය සේවා පිළිබඳ පුළුල් වාර්තාවක් සමඟ වඩාත් විශ්වසනීය, පාරිභෝගික කේන්ද්‍රීය විසඳුම් අඛණ්ඩව පිරිනැමීමට මර්කන්ටයිල් ඉන්වෙස්ට්මන්ට්ස් සමාගම අපේක්ෂා කරයි. 
දිවයින පුරාම තම සේවා ජාලය සවිමත් කරමින් සිය සේවා තවදුරටත් පුළුල් කිරීමට මර්කන්ටයිල් ඉන්වෙස්ට්මන්ට්ස් සමාගම බලාපොරොත්තු වෙයි.