නිමල කොඩිතුවක්කු

මධ්‍යම අධිවේගී මාර්ග ව්‍යාපෘතියේ තුන්වැනි කොටසේ (පොතුහැර සිට ගලගෙදර දක්වා) පළමු අදියරේ පැකේජ 3 ක් සඳහා කොන්ත්‍රාත්තු ප්‍රදානය කිරීමට කැබිනට් අනුමැතිය ලැබී ඇත.

පොතුහැර සිට රඹුක්කන දක්වා වන මධ්‍යම අධිවේගී මාර්ග ව්‍යාපෘතියේ තුන්වැනි කොටසේ පළමු අදියර පැකේජ 19කට බෙදා ඇත. එම මාර්ගයේ පළමු අදියර (කිලෝමීටර 0+000 සිට කිලෝමීටර 13+800 දක්වා කොටස) මෙහෙයුම් කටයුතු කළ හැකි මට්ටම තෙක් ගෙන ඒම පිණිස සමාහාර පාවරිය ආශ්‍රිත කටයුතු  (Aggregate Base Course), ඇස්බෝල්ට්  (Asphalt Concrete) යෙදීම, මාර්ගය සලකුණු කිරීම, සංඥා පුවරු ස්ථාපනය කිරීම, අධිවේගී මාර්ග මෙහෙයුම් කටයුතු සඳහා ගොඩනැගිලි ඉදිකිරීම සහ ගාස්තු අය කිරීමේ පද්ධති ස්ථාපනය කිරීම වැනි ඉතිරි වැඩ නිම කිරීම අවශ්‍ය වේ.

ඒ අනුව, එකී කාර්යයන් සඳහා ඉදිකිරීම් පැකේජ 3 ක් යටතේ ජාතික තරගකාරී ලංසු කැඳවා ඇත. ලැබී ඇති ලංසු ඇගයීමෙන් අනතුරුව ඉහළ මට්ටමේ ස්ථාවර ප්‍රසම්පාදන කමිටුව විසින් ඉදිරිපත් කරනු ලැබ ඇති නිර්දේශ මත පදනම්ව, එකී සියලු‍ පැකේජ සඳහා අවම ලංසුකරු වූ මාගා ඉංජිනියරින් ප්‍රයිවට් ලිමිටඞ් වෙත කොන්ත්‍රාත්තු ප්‍රදානය කිරීම පිණිස ප්‍රවාහන, මහා මාර්ග, වරාය සහ සිවිල් ගුවන් සේවා අමාත්‍යවරයා  ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.