පීපල්ස් ලීසිං ඇන්ඩ් ෆිනෑන්ස් පී.එල්.සී. සමාගමේ 25 වැනි සංවත්සරයට සමගාමීව, ගෝලීය කොරෝනා වසංගතයට එරෙහි සුව සටනේ යෙදී සිටින රජයේ රෝහල්වල රෝගීන් හඳුනාගැනීම සහ ප‍්‍රතිකාර ලබාදීමට සහාය දැක්වීමක් ලෙසින් සිදුකරන සමාජ සත්කාරක වැඩසටහන් මාලාවේ තවත් එක් දිගුවක් ලෙස දකුණු පළාතේ රජයේ රෝහල් 03කට රුපියල් මිලියන 6ක වටිනාකමකින් යුත් අත්‍යවශ්‍ය වෛද්‍ය උපකරණ ප‍්‍රදානයක් පසුගියදා සිදු කෙරුණි.

තංගල්ල මූලික රෝහලේ පැවැති මෙම වෛද්‍ය උපකරණ කට්ටල ප‍්‍රදානය කිරීමේ අවස්ථාවට වාරිමාර්ග කැබිනට් ආමාත්‍ය ස්වදේශ කටයුතු සහ ආපදා කළමනාකරණ රාජ්‍ය ආරක්‍ෂක ආමාත්‍ය චමල් රාජපක්ෂ, ක‍්‍රීඩා හා තරුණ කටයුතු සහ ඩිජිටල් යටිතල පහසුකම් රාජ්‍ය අමාත්‍ය නාමල් රාජපක්ෂ, සිවිල් ගුවන් සේවා සහ ආයෝජන කලාප අමාත්‍ය ඩී.වී. චානක මහතා, මහජන බැංකු හා පීපල්ස් ලීසිං මූල්‍ය සමාගමෙහි සභාපති සුජීව රාජපක්‍ෂ මහතා, පීපල්ස් ලීසිං ප‍්‍රධාන විධායක නිළධාරී සාමාන්‍යාධිකාරී ෂමීන්ද්‍ර මාසිලීන් මහතා සහ පීපල්ස් ලීසිං සහකාර ප‍්‍රාදේශීය කළමනාකරු දකුණු පළාත්භාර නිශාන්ත වීරසිංහ මහතා ඇතුලුව හම්බන්තොට පී.එල්.සී. ශාඛා ප‍්‍රධානී අමිල වන්නිආරච්චි, තංගල්ල පීඑල්සී ශාඛා ප‍්‍රධානී ශානක චමින්ද මහතා සහ පීපල්ස් ලීසිං ආයතනික හා සමාජ සත්කාරක අංශයේ කළමනාකාරිණී රොෂ්නි මෝතා යන මහත්ම මහත්මීහු සහභාගි වුහ.

කොරෝනා වසංගතය පාලනය කිරීමේ ජාතික කි‍්‍රයාන්විතය සදහා පීපල්ස් ලීසිං සමාගම විසින් හම්බන්තොට දිස්ත‍්‍රික් මහ රෝහල වෙත කොරෝනා රෝගීන් හඳුනා ගැනීමට යොදා ගන්නා ජංගම පී.සී.ආර්. යන්ත‍්‍රය (PCR) පරිත්‍යාග කළ අතර තංගල්ල මූලික රෝහල සහ බෙලිඅත්ත ප‍්‍රාදේශීය රෝහල්වලට අඩුපාඩුවක්ව පවතින අත්‍යවශ්‍ය වෛද්‍ය උපකරණ රැසක් රුපියල් මිලියන 6 ක පිරිවැයක් දරා රෝහල් කාර්යක්‍ෂමතාවය ඉහල නැංවීම සඳහා පරිත්‍යාග කෙරුණි.