වර්තමානයේදී ක්‍රියාත්මක සියල්ල ඇතුළත් භාණ්ඩ ප්‍රවාහන නියාමනය එලෙසින්ම පවත්වා ගන්නා ලෙස කොළඹ රබර් වෙළෙඳුන්ගේ සංගමයේ සභාපති හරින් ද සිල්වා මහතා රජයෙන් ඉල්ලා සිටියි. 

එම නියාමනය අලු‍ත් කිරීම සඳහා රජය කටයුතු කරන බවට පවතින අදහසට ප්‍රතිචාර දක්වමින් ඔහු මේ බව සඳහන් කර තිබේ. 

වි‍ශේෂයෙන්ම ජාතික තරගකාරිත්වය සහ අපනයන අඛණ්ඩතාව ආරක්ෂා කිරීම සඳහා මෙම නියාමනය එලෙසින්ම පැවතිය යුතු බව ඔහුගේ අදහසයි. හිටපු ජනාධිපති මහින්ද රාජපක්ෂ මහතාගේ පාලනය යටතේ 2013 වසරේදී මෙම නීතිය හඳුන්වා දී තිබේ. 

මෙහිදි අදාළ මෙම නියාමනය මගින් පර්යන්ත හැසිරවීමේ ගාස්තු (THC) ඇතුළුවසියලු‍ම භාණ්ඩ ප්‍රවාහන ගාස්තු, අපැහැදිලි බව සහ අත්තනෝමතික මිලකරණය ඉවත් කරමින්, තනි, සාකච්ඡා කරන ලද භාණ්ඩ ප්‍රවාහන අනුපාතයකට විනිවිද පෙනෙන ලෙස ඒකාබද්ධ කළ යුතු බව නියම කරන බවත් සභාපතිවරයා පවසයි. 

“මෙය ඉවත් කිරීම නිසා විනිවිදභාවයට තර්ජන එල්ල විය හැකියි. ඒ හරහා ශ්‍රී ලංකාවේ අපනයන ක්ෂේත්‍රයේ තරගකාරීත්වයට ගැටලු‍ ඇති වෙන්න පුළුවන්. එකිනෙකට වෙනස් ගාස්තු හඳුන්වාදීමත් සමගින් ඇති වන අමතර පිරිවැය පාරිභෝගිකයන් වෙත පැටවෙන්න පුළුවන්.“ යනුවෙන්ද ඔහු වැඩිදුටරත් සඳහන් කර තිබේ.