කරන්දෙණිය එම්. සුසිල් පියන්ත සහ පිටිගල – ඩී.ජේ. විජේසිංහ

ස්වයංරැකියාවක් ලෙස දකුණු පළාතේ ග්‍රාමීය ප්‍රදේශවල මී මැසි පාලනය ව්‍යාප්ත කිරීමට දකුණු පළාත් කෘෂිකර්ම දෙපාර්තමේන්තුව පියවර ගෙන තිබේ.
දකුණු පළාත් කෘෂිකර්ම අධ්‍යක්ෂිකා අනූෂා පලිහවඩන, නියෝජ්‍ය පළාත් කෘෂිකර්ම අධ්‍යක්ෂ (සංවර්ධන) බුද්ධික මොහොට්ටි මහතා ඇතුළු පිරිසකගේ අදහසක් අනුව මේ වැඩසටහන ක්‍රියාවට නැංවේ.
ලෝක මී මැසි දිනයට සමගාමීව මේ වැඩසටහන ක්‍රියාවට නැංවූ බව දකුණු පළාත් කෘෂිකර්ම අමාත්‍යාංශය කියයි.
නියමු ව්‍යාපෘතියක් ලෙස ඌරගස්මං හන්දිය ගොවිජන බල ප්‍රදේශයට අයත් සිරිපුර ප්‍රදේශයේදී මෙම වැඩසටහන ක්‍රියාවට නැංවූ බව ද දකුණු පළාත් කෘෂිකර්ම අමාත්‍යාංශය කියයි.
මීට සමගාමීව මී මැසි පාලනය පිළිබඳව පාසල් සිසුන් හා මී මැසි පාලනයට කැමැත්තක් දක්වන ඌරගස්මංහන්දියේ ජනතාව දැනුම්වත් කිරීම ද සිදු කෙරිණ.
එම දැනුවත් කිරීම ඌරගස්මංහන්දිය සිරිපුර මී මැසි පාලනය සාර්ථකව කරගෙන යනු ලබන ජනිඳු හයේෂ් මහතාගේ මී මැසි පාලන පරිශ්‍රයේ දී පැවැත්විණ.
මේ අවස්ථාවට දකුණු පළාත් කෘෂිකර්ම අධ්‍යක්ෂිකා අනූෂා පලිහවඩන, නියෝජ්‍ය අධ්‍යක්ෂ (සංවර්ධන) බුද්ධි මොහොට්ටි, ගාල්ල බටහිර කලාපයේ සහකාර කෘෂිකර්ම අධ්‍යක්ෂ අංජලිකා ඉන්දුමතී, කරන්දෙණිය ප්‍රාදේශීය ලේකම් ප්‍රසන්ති, ඌරගස්මංහන්දිය ගොවිජන සේවා මධ්‍යස්ථානයේ ස්ථාන භාර කෘෂිකර්ම උපදේශක කේ.ඩබ්ලිව්. මදුරංග ක්ෂේත්‍ර කෘෂිකර්ම උපදේශක සරණි ඉමාෂා යන මහත්ම මහත්මීහු ද සහභාගි වූහ.