කටුනායක ටී.කේ.ජී.කපිල

කොළඹ, රත්මලාන ගුවන් තොටුපොළ සහ යාපනය ජාත්‍යන්තර ගුවන් තොටුපොළ අතර ඍජු අභ්‍යන්තර ගුවන් ගමන් සේවාවක් ක්‍රියාත්මක කිරීම සදහා ඩේවිඩ් පීරිස් ගුවන් සේවා සමාගම වෙත ශ්‍රී ලංකා සිවිල් ගුවන් සේවා අධිකාරිය විසින් දේශීය වාණිජ ගුවන් ගමන් ක්‍රියාත්මක කිරීම සදහා වූ ගුවන් යානා මෙහෙයුම් බලපත්‍රය  (Air Craft Operation Certificate) පිරිනමා තිබේ.

මෙම ගුවන් ගමන සදහා පැය 01 යි විනාඩි 20 ක කාලයක් ගත වන අතර මේ සදහා මෙම ගුවන් සමාගම සෙස්නා - 280 ගුවන් යානයක් සූදානම් කර තිබේ. කටුනායක ජාත්‍යන්තර ගුවන් තොටුපොළ තුළ ද මේ වනවිට අභ්‍යන්තර ගුවන් මගී පර්යන්තයක් ඉදි වෙමින් පවතින අතර එහි වැඩ කටයුතු නිමවූ පසුව විදේශීය රටවල ගුවන් මගීන්ට එතැන් සිට යාපනය දක්වා ගුවන් ගමන් පහසුකම් සලසා ගත හැකිය . එමගින් සංචාරක ගමනාන්තයක් ලෙස යාපනය සංවර්ධනය කිරීමේ ඉලක්කය ද පහසුවෙන් සපුරා ගත හැකිය.

ශ්‍රී ලංකා සිවිල් ගුවන් සේවා අධ්‍යක්ෂ ජනරාල් සහ ප්‍රධාන විධායක නිලධාරී විශ්‍රාමික එයාර් වයිස් මාර්ෂල් සාගර කොටකදෙණිය මහතා විසින් සීමාසහිත ඩේවිඩ් පීරිස් ගුවන් සේවා සමාගමේ බළයලත් කළමනාකරු විශ්‍රාමික එයාර් වයිස් මාර්ෂල් ඕ.ඩී.එන්.එල්.පෙරේරා මහතා වෙත මෙහෙයුම් බලපත්‍රය පිරිනමන ලදී.