භානුක අමරසිංහ

මහ බැංකුවේ ලියාපදිංචි බලපත්‍රලාභී වාණිජ බැංකුවක් වන කාර්ගිල්ස් බැංකුව වෙත රුපියල් බිලියන 20ක අවම ප්‍රාග්ධන අවශ්‍යතාව සැපිරීම සඳහා 2029 වසරේ අවසානය තෙක් කල් ලබා දීමට ශ්‍රී ලංකා මහ බැංකුවේ පාලක මණ්ඩලය තීරණය කර ඇතැයි වාර්තා වෙයි. 
එම බැංකුව විසින් මහ බැංකුවේ බැංකු අධීක්ෂණ දෙපාර්තමේන්තු අධ්‍යක්ෂවරයා වෙත කළ ඉල්ලිමකට අනුව මෙම කල් ලබාදීම සිදු කර තිබේ. කෙසේ වෙතත් එම බැංකුව 2025 මාර්තු 31 වැනිදායින් අවසන් වූ කාර්තුව සඳහා නිකුත් කළ මූල්‍ය ප්‍රකාශනය තුළ එම අවශ්‍යතාව 2025 වසරේ අවසන් වනවිට සැපිරිය යුතුව ඇතැයි සඳහන්ව තිබුණි.
ඒ අනුව මෙම අවම ප්‍රාග්ධන අවශ්‍යතාව සැපිරීම සදහා කාර්ගිල්ස් බැංකුව වෙත තවත් වසර හතරක කාලයක් හිමිව තිබේ. අද වනවිට බැංකුව සතු ප්‍රකාශිත ප්‍රාග්ධනය රුපියල් බිලියන 11.89 කි. මහ බැංකුව නිකුත් කර ඇති උපදෙස් අනුව බලපත්‍රලාභී වාණිජ බැංකුවක අවම ප්‍රාග්ධන අවශ්‍යතාව රුපියල් බිලියන 20ක් ලෙසත්, බලපත්‍රලාභී විශේෂිත බැංකුවක එය රුපියල් බිලියන 7.5ක් ලෙසත් පවතී.
මේ අතර, කාර්ගිල්ස් බැංකුවට මෙම වසර අවසන් වීමට පෙරාතුව කොටස් ප්‍රාග්ධන යටතේ ආසන්න වශයෙන් රුපියල් බිලියන 2.5ක් රැස් කරගන්නා ලෙසත් මහ බැංකුව උපදෙස් ලබා දී තිබේ. මේ හරහා බැංකුවේ ප්‍රධානම කොටස් හිමිකරුවන් සතු කොටස් ප්‍රතිශතය සියයට 50ක් දක්වා අඩු කළ හැකි බවත් මහ බැංකුව පවසයි. එසේම මෙම ප්‍රධාන කොටස්හිමිකරුවන් සතුව ඇති උපරිම කොටස් හිමිකාරීත්වයේ ප්‍රතිශතය 2029 අවසන් වන විට සියයට 15ක් බවට පත්විය යුතු බවත් මහ බැංකුව වැඩිදුරටත් සඳහන් කර තිබේ.