සිසු සිසුවියන් ලක්ෂ 5 කට සහ ගුරුවරුන් 150,000 ප්‍රතිලාභ

විමුක්ති එස් රුද්‍රිගු

මෙරට අධ්‍යාපනය නවීකරණයේ කිරීමේ ව්‍යාපෘතිය යටතේ පසුගියදා අනුමැතිය ලබාදුන් ඇමෙරිකානු ඩොලර් මිලියන 50 ක අමතර සහායෙන් මෙරට පාසල් සිසු සිසුවියන් ලක්ෂ 5 කට සහ ගුරුවරුන් 150,000 ප්‍රතිලාභ අත්වනු ඇතැයි ලෝක බැංකුව ප්‍රකාශ කළේය.
ලබාදුන් අමතර ඇමෙරිකානු මිලියන 50ක මූල්‍ය සහායෙන් මෙරට අත්‍යවශ්‍ය අධ්‍යාපන ප්‍රතිසංස්කරණ ඉදිරියට රැගෙන යාමට හැකියාව ලැබෙනු ඇති බවත්, ඉගැන්වීමේ ගුණාත්මකභාවය ඉහළ යනු ඇති බවත් ලෝක බැංකුව ප්‍රකාශ කළේය. එසේම වතුකරයේ ප්‍රජාව සහ විශේෂ අවශ්‍යතා ඇති දරුවන්ට සහාය වන පාසල් ඇතුළුව ඌන සේවා ලාභී පාසල් කෙරෙහි දැඩි අවධානයක් යොමු කරමින් පාසල් පහසුකම් වැඩිදියුණු කිරීම සහ සිසුන්ගේ යහපැවැත්ම වැඩිදියුණු කිරීම. පළාත් නවයේ පාසල් සියල්ලටම මෙම ව්‍යාපෘතියෙන් ප්‍රතිලාභ අත්වනු ඇතැයි ලෝක බැංකුව පැවැසුවේය.
වැඩි දියුණුවූ ඉගැන්වීමේ පරිසරයක් තුළ මෙරට සෑම ශිෂ්‍යයකුටම ආරක්ෂිතව අධ්‍යාපනය ලැබිය හැකිවීමත්, තම ශිෂ්‍යයන්ට ඉදිරියට පැමිණීම සඳහා අවශ්‍ය සියලු‍ම මෙවලම් ගුරුවරුන්ට තිබෙන බව සහතික කිරීමත් මෙම ව්‍යාපෘතියේ අරමුණ බව මාලදිවයින, නේපාලය සහ ශ්‍රී ලංකාව සඳහා ලෝක බැංකු අධ්‍යක්ෂක ඩේවිඩ් සිස්ලන් ප්‍රකාශ කළේය.
සිසුන්ට සහ ගුරුවරුන්ට ඔවුන්ගේ පූර්ණ හැකියාව කරා ළඟා වීමට සහායවීම සඳහා ශ්‍රී ලංකාව සමඟ එක්ව කටයුතු කිරීමට ලැබීම ගැන ලෝක බැංකුව  ඉතා සතුටට පත්වෙන බව සිස්ලන් පැවැසුවේය.