‘යුටිප්’ නමැති ප‍්‍රචණ්ඩ සුළි කුණාටුව ඊයේ (1) වියට්නාමයට කඩා වැදුණේය. සුළි කුණාටුව සමඟ මහ වැසි ඇද හැළීමෙන් හටගත් ජල ගැලීම්වලට විසි පස් දෙනෙක් බිලිවූහ.

ජල ගැලීම් සහ නායයෑම් හේතුවෙන් උන්හිටිතැන් අහිමි වූ පිරිස ලක්ෂය ඉක්මවයි.

වියට්නාම කාලගුණ බලධාරීන් සුළි කුණාටුව ගැන කල් තියා අනතුරු ඇඟවීමත් සමඟ, වෙරළාශි‍්‍රත ප‍්‍රදේශවලින් ජනයා ඉවත් කිරීම් ද සිදු කෙරුණි.
රජය කළ අනතුරු ඇඟවීම් සැලකිල්ලට නොගෙන මූදු ගිය ධීවරයන් සය දෙනකු අතුරුදන්ව ඇතැයි ද වියට්නාම බලධාරීහු පවසති. ජල ගැලීම්වලින් විශාල හානියක් සිදුවී ඇත්තේ ‘හුයේ’ නමැති පළාතටය.

හුයේ පළාතේ නිවාස 95,000 ක් මුළුමනින්ම ජලයෙන් යටවී ඇති බව ද පැවැසෙයි. ගස් කඩා වැටීමෙන් සහ නායයෑම් හේතුවෙන් මාර්ග අවහිර වී සහන සේවා කටයුතුවලට බාධා එල්ල වෙමින් පවතී.

එක්සත් ජාතීන්ගේ සංවිධානය විසින් ලෝක උරුමයක් යැයි නම් කරනු ලැබූ වියට්නාමයේ ඉපැරණි ‘හොයි අන්’ භූමිය ද ජල ගැලීම්වලට හසුවී ඇති බව බලධාරීහු වැඩි දුරටත් කියා සිටිති.

‘යුටිප්’ සුළි කුණාටුව වියට්නාමයට කඩා වැදුණේ, පැයට කිලෝ මීටර් 103 ක වේගයකිනි. එය වියට්නාමය දෙසට පැමිණියේ චීන මුහුද හරහා යැයි ද කාලගුණ විද්‍යා දෙපාර්තමේන්තු කියා සිටී.