අසරාම් බාපු වෛද්‍ය සිසුවිය දූෂණයටත් පහර කෑමටත් ලක් වුණේ ඇගේම වරදින් බවත්, ඇයට එම අපරාධය කළ පුද්ගලයන් 6 දෙනා සේම ඇයත් වරදකාරියක බවත් ඉන්දීය ආධ්‍යාත්මික පූජකවරයකු වන 71 ක් හැවිරිදි අසරාම් බාපු කළ ප‍්‍රකාශයක් හේතුවෙන් ඔහු වෙත දැඩි විරෝධයක් එල්ල වී ඇත.
අසරාම් බාපු වැඩි දුරටත් කියා ඇත්තේ දූෂණයට ලක් වෙද්දී, ඇය එම තරුණයන්ට බෑගෑපත් වූවා නම් ඇය දූෂණයටත් පහර කෑමටත් ලක් නොවනු ඇතැයි කියාය.
මියගිය පසුවත් මුළු ලෝකයේම අවධානය දිනා ගැනීමට සමත් වූ 23 හැවිරිදි එම තරුණියගේ ගෞරවය ආරක්ෂා කිරීමේ අරමුණින්, ඉන්දීය මාධ්‍ය එකාමෙන් එක් වී, ඇගේ හෝ ඇගේ පවුලේ අයගේ හෝ අනන්‍යතාව හෙළි නොකිරීමට වග බලා ගත්තේය. කෙසේ නමුත් ඇගේ පියා පෙරේදා (7) පැවැසුවේ ඉන්දීය කාන්තාවන් ආරක්ෂා කිරීමට තම දියණියගේ නමින් නීතීයක් සකස් කරන්නේ නම්, දියණියගේ නම හෙළි කරන බවය. තරුණියගේ පියා උත්තර ප‍්‍රාන්තයේ පදිංචි බඞ්රි සිං පණ්ඬේය. පෙරේදා ඔහුගේ ඡායාරූප ඉන්දීය පුවත් සේවා කිහිපයක පළ වී තිබුණි. මේ අතර ඉකුත් සති අන්තයේදී ඉන්දියාවේ ‘සීටීවී’ පුවත් සේවය සමඟ සම්මුඛ සාකච්ඡාවක් ලබා දුන් තරුණියගේ පෙම්වතාගේ අනන්‍යතාව ද මාධ්‍ය ඔස්සේ ප‍්‍රසිද්ධියට පත්කර ඇත. ඔහු අවින්ද්‍ර පාන්ඬේය.
තරුණිය සමඟ සිට පහර කෑමට ලක් වූ 28 හැවිරිදි අවින්ද්‍ර පාන්ඬේගේ එක් පාදයක් බිඳී ඇති අතර ඔහු තවමත් ප‍්‍රතිකාර ලබන බව ද වාර්තාවේ. ඔවුන් දෙදෙනා ලබන පෙබරවාරියේ විවාහ වීමට නියමිතව සිටි බව ද වාර්තා වේ.