ඇමෙරිකාවේ ධවල මන්දිරයේ ආරක්ෂාව භාරව සිටි එරට බුද්ධි අංශ ප්‍රධානී ජූලියා පියර්සන් සිය ධූරයෙන් ඉල්ලා අස්වී ඇතැයි විදෙස් මාධ්‍ය වාර්තා කරයි. ඇමෙරිකා ජනාධිපති මන්දිරයට පුද්ගලයකු ඇතුළුවීමෙන් ආරක්ෂාව සම්බන්ධයෙන් ඇතිවූ ගැටළු හේතුවෙන් ඇය මෙම තීරණය ගෙන ඇතැයි ද පැවසේ. ඉල්ලා අස්වීමට පෙර ඇමෙරිකා කොංග්‍රස් මණ්ඩලයේ ප්‍රශ්න කිරීම්වලට ද මුහුණ දීමට ඇයට සිදුව තිබිණි.

පසුගිය 19 දා ධවල මන්දිර භූමියට ඇතුළු වූ ආයුධ සන්නද්ධ පුද්ගලයකු ගොඩනැගිල්ල අභ්‍යන්තරයට ම පැමිණීමත්, 16 දා අපරාධ වැරදි සම්බන්ධ චෝදනා ලැබ සිටින හා ආයුධ සන්නද්ධ ආරක්ෂක අංශ කොන්ත්‍රාත් කරුවකු ජනාධිපති ඔබාමා සමග එකම විදුලි සෝපානයක ගමන් කැර තිබීමත් යන කාරණා හේතුවෙන් ධවල මන්දිරයේ ආරක්ෂාව සම්බන්ධ ගැටළු රැසක් සාකච්ඡාවට බඳුන්වෙමින් තිබේ.

ධවල මන්දිරයේ ආරක්ෂක ඒකකය හඳුන්වන්නේ සීක්‍රට් සර්විස් යනුවෙනි. ඇය මේ ධූරයට පත්ව ඇත්තේ මාස 18ට පෙරදීය. ඇයගේ ඉල්ලා අස්වීම භාරගත් බවත් ඇය 30 වසරක ආරක්ෂක අංශ රාජකාරී දිවියේ දී කළ මෙහෙවර අගයකරන බවත් ඇමෙරිකාවේ ආරක්ෂක දෙපාර්තමේන්තුව පවසයි. ජනාධිපති ඔබාමා ද ඇයගේ සේවය අගය කළ බව විදෙස් මාධ්‍ය පවසයි.

ඉල්ලා අස්වීමෙන් අනතුරුව මාධ්‍ය ඇමතූ ජුලියා කියා ඇත්තේ පසුගිය දා වූ සිදුවීම් දෙක හේතුවෙන් තම සේවාව ගැන ගැටළුවක් පැණ නැගී ඇති බැවින් මෙවැනි තීරණයක් ගත් බවයි.