ඉස්ලාම් දහමට හෝ නබි නායකතුමන්ට නිගරු කිරීමට කිසිවකුටවත් ඉඩ නොදෙන බවත්, ලෝක අර්බුද විසඳා ගැනීමට සැවොම එකමුතු වී, අහිංසාවාදයේ පියා ලෙස සැලකෙන ගාන්ධිතුමන්ගේ දර්ශනය අනුගමනය කළ යුතු බවත් ඇමෙරිකා ජනාධිපතිවරයා පවසයි. ජනපති ඔබාමා මේ බව කියා සිටියේ පෙරේදා (25) ඇමෙරිකාවේ නිව්යෝක් නුවර පැවැත්වෙන 67 වැනි එක්සත් ජාතීන්ගේ මහා මණ්ඩල සැසිවාරය ඇමැතූ අවස්ථාවේදීය. ඉස්ලාම් දහමටත් නබි නායකතුමන්ටත් අපහාස වන අයුරින් නිර්මාණය කළ ‘ඉනසන්ස් ඔෆ් ද මුස්ලිම්ස්’ නමැති එම චිත‍්‍රපටය ඇමෙරිකා රජයට කැළැලක් බවත් එම චිත‍්‍රපටය හරහා ඇමෙරිකා රජයට නිගරු වූ බවත් ජනපති ඔබාමා අවධාරණය කළේය. එම චිත‍්‍රපටයට ඇමෙරිකා රජයේ කිසිදු සම්බන්ධයක් නැති බව ද ජනපති ඔබාමා යළිත් වරක් කියා සිටියේය. මහ මණ්ඩල සැසිවාරයට සහභාගී වූ මුස්ලිම් රටවල රාජ්‍ය නායකයන් ඇමෙරිකා ජනපති බැරැක් ඔබාමාගෙන් ඉල්ලා සිටියේ මෙවැනි සිදුවීම් යළි සිදු නොවීමට ඇමෙරිකා රජය වගබලාගත යුතු බවය.