ඇමෙරිකානු ගුවන් හමුදා එල්ල කළ ප‍්‍රහාරයකින් කාන්තාවන් හා ළමයින් ඇතුළු 16 දෙනෙකු මියයාම සම්බන්ධයෙන් ඇෆ්ගන් ජනපති හමීඞ්                        කර්සායි ඇමෙරිකාවට දෝෂාරෝපනය කර සිටියේ.

පාකිස්ථාන දේශ සීමාව ආසන්නයේ පිහිටි කුනාර් ප‍්‍රාන්තයේ වටාපූර් දිස්ත‍්‍රික්කයට පසුගිය සෙනසුරාදා මෙම ප‍්‍රහාරය එල්ල විය.

නේටෝ සංවිධානයේ ප‍්‍රකාශකයෙක් පැවසුවේ ප‍්‍රහාරයෙන් මියගියේ සතුරු කණ්ඩායම් බවයි.

එහෙත් පළාත් ආණ්ඩුකාර මුල්ක් ජලාලාගේ ප‍්‍රකාශයකට අනුව ජනාධිපති කාර්යාල ප‍්‍රකාශ කළ නිවේදනයකින් කියැවුණේ ළමයින් හා කාන්තාවන් ඇතුළුව සිවිල් වැසියන් ගමන් කරමින් සිටි වාහනයකට මෙම ප‍්‍රහාරය එල්ල වූ බවයි.

ජනපති කාර්යාලය නිකුත් කළ එම නිවේදනයේ තවදුරටත් සඳහන් වන්නේ මෙම ප‍්‍රහාරය ජාත්‍යන්තරය පිළිගත් සියලූම නීතීන් හා ප‍්‍රතිමාන උල්ලංඝණය කරන බවත් ප‍්‍රහාරය දැඩි ලෙස හෙලා දකින බවත්ය.

කුනාර් පොලිසියද පැවසුවේ ප‍්‍රහාරයෙන් මියගියේ ට‍්‍රක් රථයක ගමන් කරමින් සිටි ළමුන් හා කාන්තාවන් පිරිසක් බවයි.

නේටෝව යටතේ පවතින ඉන්ටනැෂනල් සෙකියුරිටි ඇසිස්ටන්ස් ෆෝස් (අයි.එස්.ඒ.එෆ්) ආයතනය පැවසුවේ මෙම ප‍්‍රහාරය සම්බන්ධයෙන් පරීක්‍ෂණ පවත්වන බවයි.

එසේම අයි.එස්.ඒ.එෆ්. සංවිධානය ප‍්‍රකාශයක් කරමින් සනාථ කර සිටියේ මීට පෙර එල්ල කළ ප‍්‍රහාරයකින් සතුරු කණ්ඩායමක 10 දෙනෙක් මියගිය බවයි.
එක්සත් ජනපදය හා මිත‍්‍ර කණ්ඩායම් ත‍්‍රස්තවාදයට එරෙහි යුද්ධය ආරම්භ කරමින් 2011 දී ඇෆ්ගනිස්තානය ආක‍්‍රමණය කරන ලදී.

ඇමෙරිකානු හමුදා එල්ල කරන ප‍්‍රහාර වලින් සිවිල් වැසියන් මියයාම වොෂින්ටනයත් කාබුල් නුවරත් අතර පසුගිය අවුරුදු කිහිපය පුරාවටම අර්බුදකාරී තත්ත්වයක් ඇතිකිරීමට ඉවහල් වූ අතර ඇෆ්ගනිස්තානයේ සිටින ඇමෙරිකානු විරෝධී පිරිසද ක‍්‍රමයෙන් වැඩිවන්නට හේතු විය. එමෙන්ම ඔවුහු දිගින් දිගටම ප‍්‍රහාර හෙලා දකිති.