පෝලියෝ රෝගය ලෝකයෙන් තුරන්කැර දැමිය හැකි එන්නතක පර්යේෂණ කටයුතු සාර්ථක වෙමින් පවතින බව විදෙස් මාධ්‍ය වාර්තා කරයි. මෙය කෘතිම රසායනික භාවිතයෙන් නිපදවූවකි.

වෛද්‍යවරු පවසන්නේ ලෝකයෙන් දැනට වර්ෂයකට වාර්තාවන පෝලියෝ රෝගීන් සංඛ්‍යාව තුන්සියත් පන්සියයත් අතර ප්‍රමාණයක් දක්වා පහත වැටී ඇති බවයි. නව එන්නත මගින් පැරණි මුඛ එන්නතේ තිබූ දුර්වලතා කිහිපයක් මගහැරී ඇතැයි ද පර්යේෂකයෝ කියති.

එන්නත නිපදවීම සඳහා බිල් ඇන්ඩ් මෙලින්ඩ් ගේට්ස් පදනම හා ලෝක සෞඛ්‍ය සංවිධානය ඇමෙරිකානු ඩොලර් 674,000ක් හෙවත් රුපියල් කෝටි 8.76ක මුදලක් පරිත්‍යාග කැර ඇත.

පර්යේෂණය සිදුකරන්නේ ඇමෙරිකානු හා බ්‍රිතාන්‍ය පර්යේෂකයන් පිරිසක් විසිනි. මේ සඳහා ඔක්ස්ෆර්ඩ් විශ්වවිද්‍යාලයේ සහය ද හිමිව ඇත. කැලිෆෝර්නියාවේ සැන් ජෝස් හි පැවති වෛද්‍ය විද්‍යා පර්යේෂණ ප්‍රගතිය පිළිබඳ ඇමෙරිකානු සම්මේලනයේ දී මෙහි ප්‍රගතිය පිළිබඳ වාර්තා ඉදිරිපත් කැරිණි.

එම වාර්තාවට අනුව පසුගිය වසරේ වැඩිම පෝලියෝ රෝගීන් වාර්තා වී ඇත්තේ පකිස්ථානයෙනි. පසුගිය වර්ෂයේ ලෝකයෙන් ම වාර්තා වූ පෝලියෝ රෝගීන් 350කි. ඔක්ස්ෆර්ඩ් විශ්වවිද්‍යාලයේ මහාචාර්ය ඩේව් ස්ටුවර්ට් පවසන්නේ දැනට පෝලියෝ රෝගය මර්ධනය සඳහා යොදා ගන්නා මුඛ එන්නත වෙනුවට මේ නව එන්නත යොදා ගැනීමෙන් වැඩි කාලයක් නොගොස් පෝලියෝ රෝගය මිහිතලයෙන් ඉවත් කළ හැකිවන බවයි.