අසල්වැසි මියන්මාරයේ ප්‍රචණ්ඩ ක්‍රියා හේතුවෙන් පලා ආ රෝහින්ග්‍යා සරණාගතයින්ට තාවකාලික නිවාස සකස් කිරීම සඳහා බෙංගාල බොක්කේ පිහිටි බෂාන් චා දූපත සංවර්ධනය කිරීමට බංගලාදේශ රජය සැලසුම් කර ඇත. 
 
මේ සඳහා ඩොලර් මිලියන 280ක් වෙන් කර ඇති බවත් ව්‍යාපෘති සැලැස්ම අගමැති ශෙයික් හසීනා විසින් අනුමත කළ බව බංගලාදේශ රජය පවසයි. 
 
මෙම දූපතෙහි තාවකාලික නිවාස ලක්ෂයක් සෑදීමට සැලසුම් කර ඇති නමුත් සෑම වසරකම මෝසම් කාලයේ ගංවතුරින් යටවන මෙම දූපත මිනිස් වාසයට නුසුදුසු බවට මානව හිමිකම් සංවිධාන විසින් චොදනා කර තිබිණි. 
 
බංගලාදේශයට රෝහිනග්‍යා සරණාගතයින් 620000කට වැඩි ප්‍රමාණයක් පැමිණ ඇති බව බලධාරීහු පවසති.
 
ඔවුන් වැඩිදුරටත් පවසන්නේ ලෝකයේ දුප්පත්ම සහ ජනගහනයෙන් වැඩි රටක් ලෙස සැලකෙන බංගලාදේශය මෙම දූපතේ පවතින අවහිරතා නොසලකා සරණාගතයින්ට පිහිට වීම යුතුකමක් ලෙස සලකන බවයි.
 
මෙම සරණාගතයින් නැවත මියන්මාරය වෙත යවන තෙක් ඔවුන් රඳවා තැබීමට ස්ථානයක් අවශ්‍ය හෙයින් මෙම තීරණය ගත් බවද බංගලාදේශ රජය පවසයි.
 
(රොයිටර් පුවත් ඇසුරිණි - 085)