පරිගණක හැකර්වරුන්ට පමණක් සහභාගී විය හැකි තරගාවලියක් මේ දිනවල බි‍්‍රතාන්‍යයේ කි‍්‍රයාත්මකය.

මින් සිදුකෙරෙන්නේ පරිගණක හැකර්වරුන්ට තම හැකියාවන් ප‍්‍රසිද්ධියේම පෙන්වා සිටීමට අවස්ථාව ලබා දීමයි.

‘‘එසයිග්න්මන්ට් ෆ්ලැග්‘‘ ලෙස හැදින්වෙන මෙම තරගාවලිය සංවිධානය කර ඇත්තේ බි‍්‍රතාන්‍යයේ ඔක්ස්ෆර්ඞ් නගරයේ පිහිටා ඇති ආරක්ෂක සේවා සපයන ආයතනයක් වන සෝපෝස්ය.

‘‘ෆ්ලැග්‘‘ යනු සෝපෝස් ආයතනය නිර්මානය කර ඇති මනංකල්පිත ත‍්‍රස්ත සංවිධානයකි.එම සංවිධානයේ රහස් අනාවරණය කරගැනීම හැකර්වරුන් ඉදිරියේ ඇති අභියෝගයයි.

තරගාවලියේ පළමු අදියර පසුගියදා නිමාව දුටු අතර එහිදී හැකර්වරුන්ට විද්‍යුත් ලිපියක් ලබාදී තිබුණි.

එම විද්‍යුත් ලිපිය එවා ඇත්තේ කවුරුන්ද,කොහේ සිටද ආදී කරුණු සොයාගැනීමට ඔවුනට සිදුවිය.

නිවැරදි ස්ථානය සොයාගත් හැකර්වරුනු ලබා දුන් තොරතුරු වලට අනුව අදාළ ස්ථානය වෙත ගිය සොපෝස් නිළධාරීන්ට එහි තිබී පරිගණක දෘඩ තැටියක් හමුව ඇත.එය පරිගණකයට සවිකර බැලූවද එයට ආරක්ෂක විධිවිධානයන් සකසා දී තිබී ඇති හෙයින් ඉන් ඵලක් වී නොමැත.

ඊළග අභියෝගය වන්නේ මේ දෘඩ තැටියේ ඇති ආරක්ෂක විධිවිධානයන් බිඳ හෙළා එයට ඇතුල්වී එහි දත්ත ලබා ගැනීමය.

මේ ආකාරයට විවිධ අභියෝග ගණනාවක් අවසානයේ ත‍්‍රස්ත සංවිධානයෙ පිළිඹද වැඩිම තොරතුරු ප‍්‍රමාණයක් අනාවරණය කරගන්නා හැකර්වරයා ජයග‍්‍රාහහකයා ලෙස නම් කෙරෙනු ඇත.

සෝපෝස් ආයතනය පවසන ආකාරයට මෙම තරගාවලියේ අරමුණ වන්නේ බි‍්‍රතාන්‍යයේ අනාගත පරිගණක වෘත්තිකයින්ගේ පරම්පරාවේ හැකියාවන් හදුනාගැනීමයි.

දැනටමත් ආධුනික මෙන්ම වෘත්තීමය හැකර්වරු 1000 කට ආසන්න සංඛ්‍යාවක් තරගාවලිය සදහා ලියාපදිංචිව සිටිති.