වයඹදිග පාකිස්තානයේ අර්බුදකාරී වාතාවරණයක් පවතින ගෝත‍්‍රික ප‍්‍රදේශයකදී සටන්කාමීන්ගේ කඳවුරක් ඉලක්ක කරගෙන (08) එල්ල කළ ඇමෙරිකානු ඩ්‍රෝන යානා ප‍්‍රහාරයකින් සටන්කාමීහු දසදෙනෙක් ජීවිතක්ෂයට පත්වූහ. උතුරු වසිරිස්තානයේ පිහිටා ඇති සටන්කාමීන්ගේ කඳවුර වෙත ඩ්‍රෝන මිසයිල ප‍්‍රහාර දෙකක් එල්ල වීමෙන් පසුව කඳවුරෙහි ගින්නක් හටගෙන ඇති බව ඇමෙරිකානු හමුදාව පවසයි. ප‍්‍රහාරයෙන් මියගිය සටන්කාමීන් අතර මධ්‍යම ආසියාවෙන් පාකිස්තානයට පැමිණි සටන්කාමීන් කිහිපදෙනෙක් ද සිටින බව වාර්තා වේ. ඇෆ්ගනිස්තානයේ සිටින නේටෝ හමුදාවන්ට ප‍්‍රහාර එල්ල කරන තලෙයිබාන් සටන්කාමීන්ට පාකිස්තානයේ පිහිටි ගෝත‍්‍රික ප‍්‍රදේශ රැකවරණය ලබා දෙන බව ඇමෙරිකාව පවසයි. මේ හේතුවෙන් විටින්විට ඇමෙරිකාව සටන්කාමීන් ඉලක්ක කර ගෙන ඩ්‍රෝන ප‍්‍රහාර දියත් කරයි. ප‍්‍රංශ පුවත් සේවය පවසන ආකාරයට පසුගිය වසරේදී පාකිස්තානයේ ගෝත‍්‍රික ප‍්‍රදේශවල සිටින සටන්කාමීන් ඉලක්ක කරගෙන ඇමෙරිකාව ඩ්‍රෝ්න ප‍්‍රහාර 64ක් එල්ල කර ඇත.