ඉන්දීය රජය හඳුන්වා දීමට සැරසෙන නව ආර්ථික ප‍්‍රතිසංස්කරණවලට විරෝධය පාමින්, එරට සන්ධාන රජයේ ප‍්‍රධානතම පක්ෂයක් වන බටහිර බෙංගාල ප‍්‍රාන්ත මහ ඇමැතිනී මම්තා බෙනර්ජීගේ නායකත්වයෙන් යුත් ‘ති‍්‍රණමූල් කොංග‍්‍රසය’ රජයෙන් ඉවත් වීමට සූදානම් වෙයි. 2009 වසරේ පැවැති මහ මැතිවරණයෙන් පසු අගමැති මන්මෝහන් සිංගේ කොංග‍්‍රස් පක්ෂය ප‍්‍රමුඛ සන්ධාන රජයට ශක්තියක් වූයේ ති‍්‍රණමූල් පක්ෂයයි. රජයෙන් ඉවත් වීමට තමන් තීරණය කළේ රජය හඳුන්වා දීමට සැරසෙන නව ආර්ථික ප‍්‍රතිසංස්කරණ පැකේජය ජනතා හිතකාමී නොවන නිසා යැයි මහ ඇමැතිනී බෙනර්ජී පවසයි. ඉන්ධන මිල ඉහළ දැමීමටත්, විදෙස් ආයෝජකයන් ළං කර ගැනීමටත් ඉන්දීය රජය එම නව ආර්ථික ප‍්‍රතිසංස්කරණ හරහා සූදානම් වේ. එය රටේ මිලියන ගණනින් සිල්ලර වෙළෙඳාමට ‘මරු පහරක්’ වනු ඇතැයි බටහිර බෙංගාල මහ ඇමැතිනිය වැඩිදුරටත් කියා සිටී. ” ඕනෑම ජනතා හිතකාමී කටයුත්තකදී රජය ගන්නා තීරණවලට අප එකඟ වෙනවා. සෑම විටම රජය සමඟ සිටිනවා. ඒත් රජය කි‍්‍රයාත්මක කිරීමට සැරසෙන මෙම නව ආර්ථික ප‍්‍රතිසංස්කරණවලට අප විරුද්ධයි. ඒවායින් සිදුවන්නේ රටේ ආර්ථිකය අගාධයට ඇද දැමීමක්” යැයි ති‍්‍රණමූල් පක්ෂය පෙන්වා දෙයි. තම පක්ෂය සන්ධාන රජයෙන් ඉවත්වීමට සූදානම් වන්නේ අගමැති සිංගේ රජය පෙරළා දැමීමට නොවන බව ද මහ ඇමැතිනී බෙනර්ජි අවධාරණය කරඇත. ඇය ඉන්දීය මුදල් ඇමැති චිදම්බරම් සමඟ සාකච්ඡුා කළ අවස්ථාවක පවසා ඇත්තේ රටේ ආර්ථිකය ඉහළ දැමීමට නම් ජනතාවට වඩා හිතකර අයුරින් ආර්ථික ප‍්‍රතිසංස්කරණ හඳුන්වා දිය යුතුයි කියාය.