ළමුන් අපයෝජනයට ලක්කෙරෙනා අන්තර්ජාල දර්ශනයන් ඇතුළත් ඡායාරූප හා වීඩියෝ අන්තර්ජාලයෙන් ඉවත් කිරීම ගූගල් සමාගමේ ඉලක්කය වී ඇත.

 ඒවා හදුනාගැනීම සදහා අලූත්ම තාක්ෂණයක් හදුන්වාදීමටද ගූගල් සමාගම සැරසේ. එහිදී එවන් ඡායාරූප හා වීඩියෝ වහා හදුනාගැනීමට ගූගල් සමාගමට හැකිවන අතර අනතුරුව ඒවා අන්තර්ජාලය පරිශීලනය කරන්නන්ගෙන්‘‘සගවා‘‘ තබා ගැනීමට හා ඉවත් කිරීමට හැකියාව ගූගල් සමාගමට ලැබෙනු ඇත.

මේ ව්‍යාපෘතිය සදහා නිදහස් මෘදුකාංග සංවර්ධනය කරන්නන්ගේද සහය ගූගල් සමාගම අපේක්ෂා කරයි.වෙන්කර ඇති මුදල පවුම් මිලියනයකටත් අධිකය.

2008 වසරේ සිටම ගූගල් සමාගම ළමයින් හා ලිංගික කි‍්‍රයාකාරකම් ඇතුළත් ඡායාරූප හා වීඩියෝවන් ගැන විමසිල්ලෙන් සිටියද එය පැහැදිලි දැක්මක් ඇතිව සිදුකළ දෙයක් නොවීය. මෙනිසා බොහෝ විවේචන සමාගම වෙත එල්ල වුවද බළධරයෝ ඒවා නොසළකා සිටියහ.

තත්ත්වය වෙනස් වූයේ පසුගිය වසරේදී මාක් බි‍්‍රජර් නම් බි‍්‍රතාන්‍ය ජාතිකයෙකු එයිප‍්‍රල් ජෝන්ස් නම් දොළොස් හැවිරිදි දැරියක් පැහැරගෙන ගොස් වදදී මරා දැමූ සිද්ධියෙන් පසුවයි.

මාක් බි‍්‍රජර්ගේ පරිගණකය පරීක්ෂා කළ අපරාධ පරීක්ෂකයන්ට ළමා අපයෝජන ඇතුළත්ව තිබූ ඡායාරූප හා වීඩියෝ රාශියක් හමුවූ අතර ඒ එකක්වත් මාක් පෞද්ගලිකව ගත් ඒවා නොව අන්තර්ජාලයෙන්ම ලබා ගත් ඒවා බව හෙළිවිය.

නඩුවේදී මාක් එම ඡායාරූප හා වීඩියෝ නරඹා ඒවායින් මනස දුෂිත වී මේ අපරාධය කළේයැයි පැවැසුණු අතර එනිසාම ඔහුට ජීවිතාන්තය දක්වා සිරදඩුවම් නියම විය.

යළිත් එවන් සිදුවීමක් සිදුනොවීමට කටයුතු සම්පාදනය කිරීම ගූගල් සමාගමේ අභිප‍්‍රායයි.