'කොවිඩ් 19' රෝගීන් කඩිනමින් සුවපත් කළ හැකි ඇමෙරිකාවේ මර්ක් ඖෂධ සමාගම නිපදවා ඇති 'මොල්නුපියවියර්' නමැති වයිරස නාශක බෙහෙත් කරල, දිළිඳු රටවලට මිලදී ගැනීම සඳහා සහාය දක්වන බව ලෝක සෞඛ්‍ය සංවිධානය පවසයි.

ලෝක සෞඛ්‍ය සංවිධානය මෙසේ පැවැසුවේ, 'මොල්නුපියවියර්' බෙහෙත් කරල් මිලදී ගැනීමට ධනවත් රටවල් අතරේ තරගයක් පැවැතීම නිසාය.

'මොල්නුපියවියර්' බෙහෙත් කරලට තවමත් ඇමෙරිකානු ආහාර සහ ඖෂධ පාලන අධිකාරියේ අනුමැතිය හිමි වී නැත. ලෝක සෞඛ්‍ය සංවිධානය මෙම කරල අනුමත කරනු ඇත්තේ ඇමෙරිකානු ආහාර සහ ඖෂධ පාලන අධිකාරියේ අනුමැතිය ලැබීමෙන් පසුවය.

කෙසේ නමුත්, සායනික පර්යේෂණවලදී 'මොල්නුපියවියර්' ඉතා සාර්ථක ප්‍රතිඵල පෙන්නුම් කර ඇති බැවින්, ඇමෙරිකානු ආහාර සහ ඖෂධ පාලන අධිකාරියේ අනුමැතිය ඊට කඩිනමින් හිමිවනු ඇතැයි ද පැවැසෙයි.

ඔස්ට්‍රේලියාව, නවසීලන්තය, දකුණු කොරියාව යන ආසියා පැසිෆික් රටවල් කරල් මිලදී ගැනීමට සූදානමින් සිටින අතර, ඔවුන් මේ වනවිටත් එය ඇණවුම් කර අවසන් බව විදෙස් වාර්තා පෙන්වා දෙයි. ඊට අමතරව, රටේ ජනගහනයෙන් සියයට 80 කට වඩා ප්‍රතිශක්තිකරණ එන්නත් ලබා දී අවසන් බටහිර රටවල් ද 'මොල්නුපියවියර්' කරල ඇණවුම් කර ඇතැයි ද මාධ්‍ය වාර්තා පවසයි.

'කොවිඩ් 19' ප්‍රතිශක්තිකරණ එන්නත් ලොව සෑම රටකටම සමව බෙදී යා යුතු බව ලෝක සෞඛ්‍ය සංවිධානයේ අදහසය. ලෝක සෞඛ්‍ය සංවිධානය මැදිහත් වී, දිළිඳු රටවලට එන්නත් බෙදා දීමට 'කොවැක්ස්' වැඩසටහන ආරම්භ කර ඇත්තේ ද මේ නිසාය. 'කොවැක්ස්' වැඩසටහන හරහා දිළිඳු සහ තුන්වැනි ලෝකයේ රටවලට ලෝක සෞඛ්‍ය සංවිධානය එන්නත් බෙදා දීම සිදු කරයි. ඒ යුනිසෙෆ් සංවිධානය ද හවුල් කර ගනිමිනි.

එන්නත් බෙදා හරින ආකාරයට 'මොල්නුපියවියර්' කරල ද මිලදී ගෙන ඒවා දිළිඳු රටවලට බෙදා දීමට හෝ 'මොල්නුපියවියර්' කරල මිලදී ගැනීමට දිළිඳු රටවලට මුල්‍යමය වශයෙන් ආධාර කිරීමට හෝ තමන් සූදානම් බව ලෝක සෞඛ්‍ය සංවිධානය පැහැදිලි කර තිබේ.

'මර්ක්' සමාගම පෙන්වා දෙන්නේ, 'මොල්නුපියවියර්' කරල භාවිතයට ගනිද්දී 'කොවිඩ් 19' රෝගීන් රෝහල්ගත කිරීමක් අවශ්‍ය නොවනු ඇති බවය. 'මොල්නුපියවියර්' 'කොවිඩ් 19' නිසා මරණයට පත් වීම ද අවම කරයි.

'මර්ක්' යනු ලොව ප්‍රකට ඖෂධ නිෂ්පාදන සමාගමක් වන අතර, බොහෝ දෙනා එදිනෙදා භාවිතයට ගන්නා ඖෂධ රැසක් නිෂ්පාදනය කරන්නේ ද මෙම සමාගමය.

'මර්ක්' සමාගමේ ආරම්භය 1891 දීය. එය ස්වාධීන සමාගමක් බවට පත් වූයේ 1917 වසරේදීය. මූලස්ථානය ඇත්තේ නිව්ජර්සි ජනපදයේ කෙලින්වර්ත් නුවරය.

'මොල්නුපියවියර්' කරල සම්බන්ධයෙන් කළ සායනික අත්හදා බැලීම්වලදී 'කොවිඩ් 19' රෝගීන්ට දිනකට දෙවරක් කරල් 4 ක් බැගින්, දින පහකට 'මොල්නුපියවියර්' නිර්දේශ කෙරුණි.

සායනික අත්හදා බැලීම් සාර්ථක වූයේ රෝගීන් රොහලේ රැඳී සිටිය යුතු කාලය අඩු කරමිනි. එක් රෝගියකුට නියමිත බෙහෙත් වට්ටෝරුව සඳහා වැය වනු ඇත්තේ ඇමෙරිකන් ඩොලර් 10 ක් පමණ යැයි ද පැවැසෙයි.

'මොල්නුපියවියර්' හදිසි භාවිතයට අවසර ඉල්ලා 'මර්ක්' සමාගම සියලු සායනික දත්ත ඇමෙරිකානු ආහාර සහ ඖෂධ පාලන අධිකාරියට යොමු කර තිබේ. ඉදිරි දින කීපයේ දී 'මොල්නුපියවියර්' කරල සම්බන්ධයෙන් තීරණයක් ලබා දෙන බව ඇමෙරිකානු ආහාර සහ ඖෂධ පාලන අධිකාරිය නිකුත් කළ නිවේදනයක දැක්වෙයි. ඇමෙරිකාව තුළ ඖෂධ අනුමත කරන්නේ බව ඇමෙරිකානු ආහාර සහ ඖෂධ පාලන අධිකාරියයි.

(රොයිටර්)